محاوله سرقه سيراتو 2010 خليجى .. طلب مساعده لو سمحتو

السلام عليكم

يا جماعه الخير انا معايا سيراتو خليجى 2010 وكنت فى الساحل من يوم الحد ويوم الثلاثاء الصبح صحيت لاقيتهم حاولو يسرقو العربيه .. كسروا الكونتاكت كله وفكوه من بعضه والضفيره وكله والعربيه مفيش مكان اصلا احط المفتاح علشان تشتغل ومتبهدله من جوا وعلبه الدريكسيون مكسوره تماما بكل الاسلاك الىل جواها ..

والسر فى دخول العربيه السهل من غير اى كسر حصل معايا ... بيفتحو الهوايه للازاز الخلفى للباب الخلفى وبيشيلو الكاوتش اللى بين الهوايه والازاز ويطلعو الازاز من مكانه ويفتحو اللوك والباب يتفتح معاهم بكل سهوله من غير نقطه ازاز !!! ده الى حصل معايا وده اللى لاقيته


اللهم لك الحمد يا رب حفظ العربيه الخمدلله انا دايما بستودعها الله قبل ما اسيبها وامشى والحمدلله ربنا حفظها من السرقه


انا محتاج مساعدتهم يا رجاله اودي العربيه تتصلح فى التوكيل فى ابو رواش احسن ولا فى القطاميه ؟؟ وهل فى حد هنا فى المنتدى جوا كيا يقدر يساعدنى ؟؟

وربنا الحافظ

ألحمد لله رب العالمين ربنا ينتقم من المجرمين والحراميه ويسلمنا شر الطريق

ربنا يعوض عليك
الواحد حاسس ان البلد ملاينة حرامية ربنا ينتقم منهم
بص حضرتك ممكن تعمل محضر تحفظ بيه حقك ولو انت مأمن شوف حوار التأمين ممكن تتعمل العربية علي حسابهم وله ايه
ربنا معاك ويسلم المصريين من كل شر

الحمد لله ربنا ستر وعدت على خير
بالنسبه لموضوع التوكيل شوف انت بتعمل صيانتك فين

الحمد لله ربنا سترها مع حضرتك
عربية حضرتك فيها ايموبيليزر ؟

معلش يا باشا حصلت معايا و ربنا ستر :) الاضمن تشيل العربية على كساحة توديها التوكيل كفاية منظرها و الفضحية و الناس و هيا شيافاه و كلمتين حمضانين منك حتخليهم جزم و صور صورتين و هيا بتنزل و كدة يعني حتلاقيهم اتلموا بالجزمة

حيغيرلوك طقم طبل بكونتاك و يشوف باقي الاضرارا و العربية ترجع احسن من الاول بمفتاح جديد على نفس الريموت و ركب انزاز عندهم بالمرة :)

الاميوليزر نفعك معرفوش يطفشو الكونتاكت او يدوروها بالسلك

الحمد لله ربنا ينجيك من كل سوء

فى توكيل ابو رواش غيرت الكوالين بحوالى 1750 جنيه وجابولى مفتاحين جداد قالولي الاتنين القدام مالهومش لازمة
الحمدلله على كل حال وربنا يبعد عنك و عننا كل سوء

الحمد الله انهم معرفوش يدوروها