بسما الله الرحمن الرحيم
شاءت الظروف اني اروح اقضي العيد مع بعض الاقارب في منطقه قريبه من رفح , وشجعني على كده ان الظروف كانت ابتدت تهدأ والامور تستقر . لكن للاسف وانا متواجد هناك انقلبت الامور راسا على عقب وتوترت الاجواء وده اللى عمل من مشوار الرجوع رجله لازم تتحكي .
في البدايه كان شغلي الشاغل هو موضوع البنزين , لان البنزين في شمال سيناء بالكامل نادر جدا وموجود في مدن معينه (العريش - بئر العبد) , ومع ان اقاربي كانوا بيشجعوني ويقولوا هتلاقي بنزين في السكه الا اني اصريت ان اجيب بنزين من السوق السوداء وامون قبل ما اطلع (المسافه 350 كيلو حتى القاهره) .
ابتدت الرحله الساعه 6:45 صباحا وكانت اول محطه قابلتني هي مدينه الشيخ زويد , كانت هادئه تماما وثكنات الجيش في كل حته , وللاسف الجيش كان قاطع الطريق الدولي على مدخل المدينه !!!!
طيب نعمل ايه ؟؟؟ وقفت شويه لقيت عربيات جايه من ورايا وبتاخد طرق فرعيه مش باين هي بتودي فين , لكن طبعا اضطريت امشي وراهم لمده 10 دقائق والحمد لله رجعت تاني للطريق الدولي وكملت الرحله .
استمريت في المشي حوالي 30 كيلو حتى مدينه العريش , وللاسف المفاجاءه الغير لطيفه اتكررت تاني , الجيش قافل المداخل وبيمنع المرور !!!
طيب اعمل ايه ؟؟؟ العسكري قالي ما اعرفش .
طيب الشيخ زويد كانت صغيره وبسيطه لكن العريش مدينه كبيره وانا ما اعرفش فيها طرق داخليه !!!!.
المهم خدت طريق فرعي وفضلت ماشي , كل كيلو فيه كمين للجيش , اسئل الطريق للقنطره ازاي يشاورلي على طريق مختلف , المهم ربنا هداني لما لقيت تاكسي 7 راكب مكتوب عليه العريش- الاسماعيليه , قلت التاكسي ده يا اما هيدلني على الطريق يا اما هيوديني الموقف وهناك هلاقي اللي يدلني , فضلت ماشي وراه ((مستحيل حد هيوقف علشان تسئله)) وفي الطريق لاحظت اكتر من ميكروباص و تاكسي للمحافظات , اطمنت شويه رغم ان الطرق مهجوره واثار المظاهرات في كل حته . في خلال المشوار ده كل البنزينات الموجوده سواء شل او توتال او التعاون كانت خاليه من البنزين .
بعد نص ساعه ربنا كرمني وكنت على الطرف التاني من مدينه العريش على الطريق الدولي , مع ملاحظه ان من اسباب اطمئناني هو متابعتي الدائمه لبرنامج Sygic على الموبايل وبصراحه البرنامج اكثر من رائع وكنت وانا ماشي شايف الطريق الدولي وشايف تحركاتي بتقترب منه .
استمرت الرحله بعد مدينه العريش في اتجاهي ناحيه ثاني اكبر مدينه بشمال سيناء وهي بئر العبد , المسافه بينهم حوالي 80 كيلوا يتخللها الكثير من المراكز والقرى , لكن الطريق صحراوي وسريع , وخلال الرحله كانت الاثار واضحه جدا للمظاهرات وقطع الطرق وحرق الكاوتش .
وصلت والحمدلله لبئر العبد ولاحظت ايضا ان البنزينات وطنيه وموبيل وشل خاليه من البنزين وكان بعدهم بنزينه توتال اعتقد ان البنزين متواجد ولكني لم اتاكد بنفسي لانها كانت في الاتجاه المقابل .
باقي حوالي 80 كيلو حتى القنطره شرق , قطعتهم بنفس السيناريو السابق وللعلم فالطريق من الشيخ زويد وحتى القنطره متميز بانه مستوى وبدون مطبات وتستطيع الوصول لسرعه 150 بدون مشاكل , طريق صحراوي سريع , كثبان رمليه خطره في بعض الاماكن قفلت نصف الطريق مع اثار قطع طرق واحتراق كاوتش خصوصا عند المراكز والقرى والبنزينات كما هو معتاد خاليه تماما .
وصلت والحمد لله للقنطره شرق وكان هناك كمين للجيش يقوم بالتفتيش بدقه على مدخل المدينه , بعدها صدمت بخبر ان كوبري السلام مغلق !!!!!
الحل البديل هو المعديه والمشكله في المعديه انك مضطر لدخول داخل المدينه التي لاتعرفها اصلا , بخلاف ان المعديه تكون مزدحمه جدا وغير منظمه .
مره اخرى تظهر اهميه برامج GPS استخدمت البرنامج لتحديد طريقي مع اعاده استخدام الطرق القديمه ((امشي ورا التاكسي والميكروباص :Oc_sun1[1]: )) . فعلا دخلت الى المدينه وتتبعت البرنامج مع الميكروباصات الى ان وصلت للمعديه .:welcome2:
عند المعديه كان هناك طوابير للانتظار وعمليه تفتيش من الجيش ممله جدا ولكن والحمد لله بعد نصف ساعه وصلت المعديه وبدأت عمليه التحميل والمفاجاءه ان المعديه رغم حجمها الذي يبدوا صغيرا الا انها تستوعب كميه لا باس بها من السيارات والشاحنات , والحمدلله صعدت عليها وانطلفت الى الضفه الاخرى .
دقائق من الانتظار تفصلك لتنهى الكابوس وتبداء في السير على طرق مأهوله ومعروفه .
وصلت المعديه الى القنطره غرب , واحتجت مره اخرى لبرنامج Sygic لتحديد كيفيه الخروج من المدينه للطريق السريع ( بورسعيد - الاسماعيليه) . بعد حوالي ربع ساعه كنت على الطريق السريع ابداء رحلتي من القنطره غرب نحو الاسماعيليه , المسافه حوالي 30 كيلو ولكنهم للامانه اصعب 50 كيلو من ناحيه المطبات و جوده الطريق . فالمطبات امام كل منزل تقريبا والطريق غير مستوى وحاراته في اماكن كثيره ضيقه , والحمدلله قابلتني اول بنزينه فيها بنزين موجوده في القنطره غرب قبل كوبري السلام مباشره , بعدها بنزينه اخر (( طاقه )) بعد الكوبري بحوالي 5 كيلو .
بعد حوالي نصف ساعه والحمد لله كنت على طريق مصر الاسماعيليه الصحراوي متجها نحول القاهره , وبفضل الله وصلت للقاهره الساعه 11 تقريبا .
انا عارف ان المشوار غريب وتقريبا محدش هيجربه لكني حبيت اشارككم تجربتي .