الموضوع: تقرير مصور : عزل السياره بالكامل وتركيب فرش جديد بالكامل

السلام عليكم ورحمه الله وبركاته

أهلا وسهلا بكم
أقدم لكم تقريرى المتواضع عن عزل سيارتى بالكامل
والذى سوف نتعرض فيه للاتى
1-فرش سقف جديد
2-عزل السياره بالكامل
3-فرش كراسى جديد
4-فرش أرضيه
___________________________

1-قمت بالذهاب لمصنع الأستاذ بمدينه طلخا التابعه لمدينه المنصوره وتم الأتفاق على كسوه جاهذه

بلونيين بيج *بنى بخياطه بنط (9 ملى ) بيج

وتم الاتفاق على الأستلام بعد أسبوع من تاريخه

بمبلغ 600 جنيه بدون التركيب

2-أشتريت 4 متر فرش أرضيه سعر المتر 28 جنيه من مدينه دكرنس

3- 4متر عازل حرارى زو وجه سلفر والأخر فوم سعر المتر 13 جنيه

4-4 علب كله الشعله الذهبيه صناعه مصريه سعر العلبه 9 جنيه

5- متر ونصه عازل حرارى (صوف زجاجى ) من عند بتاع قطع غيار السخانات سعر المتر 15 جنيه

6- متر ونصف قماش أستفه للسقف سعر المتر 30 جنيه


__________________________________

قمت بفك جميع أجزاء الفرش والفبر بالسياره

وبعدها خلعت فرش الأرضيه بالكامل

وطلعت على البانيو ونقعتهم فى الكلور لمده يوم ومش هقدر اوصف كميه التراب والوساخه ألى طلعت منهم وبعديها غلست الأرضيه كلها بالبنزين وأشتريت علبه فازليين وفرشتها فى الأرضيه دى بتمنع البارومه وكان فيه طبب جلد ركبتها كويس وقفلت عليها بالأمير

قطعت العازل الحرارى على مساحات وفرشت الأجو (الكله) فى الأرضيه



وعزل الأرضيه كلها لغايه القوايم




وده الضمان من شركه تصنيع الكسوه (ضمان سنه )





ركب الكسوه وفرش الأرضيه وأخد 170 جنيه






ساعتها خطرت ببالى أغير كسوه السقف لانها كانت منهاره والسقف لوه لمسته ينزل كميه تراب رهيبه

وكمان أنا عندى مشكله أن لو حتى قطه طلعت فوق سقف العربيه يتطبق ويكون نهار ما يعلم بيه ألا ربنا

أستعت بالله وفكيت السقف

عندك الشماستيين تفكهم الأول وبعدين تفك اللمبات

وبعدين تفك الأربع أيادى

كده أنت عنك كلبسات وراء تفكهم بالعقل علشان تستخدمهم تانى لأن الأصلى حاجه تانيه

كده السقف متشال على الست قوايم فقط بالعقل وبالراحه وفكهم

السقف هيخرج معاك من الباب الأودامانى وبكل سهوله

أنا صعقت لما شفت منظر السقف على الصاج ومكنش فيه ومكنش فيه أيه دعامه نهائيا








تانى يوم روحت التنايه ودى بتشتغل فى الساج وبتشكل الساج زى منتى عايز

وهو أخد المقاسات بتاعت السقف وكمله دعمتيين

حسابك كام ياعم قالى 20 جنيه

أخدتهم ورحت للسمكرى وركبهم فى السقف وأدالهم بنططتين نحاس

وكان السقف متخبط وظبطه حسابك كام قالى 50 جنيه ليه ياعم

أديتله 40 جنيه

ودى النتيجه







المهم السقف بقى حديد وتمام

أشتريت 1متر لباد ولزقته فى السقف بطوله كله



وأخدت السقف وطلعت الشقه

ظبط مساحاتك ومسافاتك الجديده وأبتدى افرش الكله بخطوط عرضيه بقيمه 20 سنتى متر

وألزه براحه أيدك علشان الهواء كله يطلع وبعدين أستنى شويه لغايه ما الكله تشد وبعدين ألزه يعنى 5 دقايق كده ومتكترش علشان متنقعش على القماش الجديد



على فكره أنا لزقت على القديم لأنى حاولت أفكه منفعش السقف ممكن يتكسر

هو عباره عن كارتون مقوى



قلبت السقف على ضهره




ولزقت الفوم (الصوف الزجاجى ) على وجهه السلفر







وأبتديت أركب السقف بنفس طريقه تركيبه

لو تلاحظون بالصوره اللباد ألى لزقته على السقف وبعدين الصوف الزجاجى وبعدين السقف





ودى النتيجه







والحمد لله


كل الشكر للأخ عصام غنايم والأخ فادى محمد من قسم الأوبل

لأن مواضعهم فادتنى كتيير

وأنتظرونى فى المشاركه التاليه لعزل الشنطه والكبوت قريبا
أن شاء الله