بدء توزيع كروت البنزين

**خالد** · 20-08-2013 12:46 AM

بدء توزيع كروت البنزين

النهاردة العصر واحدة أتصلت بيا على الموبيل ومستعجلة جداً وقالت أنها بتكلمنى بخصوص كروت البنزين وبتسأل ممكن نيجى لحضرتك فين يوم الأربعاء القادم علشان نسلمك الكارت ، قولتلها بكون فى الشغل فى مدينة السلام فى منطقة سبيكو قالت ماشى ماشى ، حاولت أستفهم منها طيب أنت حضرتك تبع ايه ؟ قالت شكراً شكراً وقفلت !!!!!!!!
مش عارف هل فعلاً بيسلموا الكروت ولا دى نصباية ؟

**ahmedhilmy** · 20-08-2013 12:54 AM

متابع

**eslamsubaru** · 20-08-2013 01:19 AM

الكروت وقف الموضوع بتاعها حتى الأن و لم يستكمل ... و الكروت لو اشتغلت التسليم بيكون فى اماكن محددة المفروض تكون عارفه لو عملت البيانات على النت ..
دول غالبا نصابين خلى بالك و عايزين يعرفوا هتكون فين يوم الأربعاء خلى بالك بقى ممكن يكونوا حرامية , حرص على بيتك و حاجاتك المهمة ... و لو حد جالك يوم الأربع و ده صعب ابقى اتحقق من هويته الشخصية و أعرف مين , ممكن يحاول ينصب عليك و يقولك الكارت بفلوس ( للعلم الكارت حسب كلام الموقع هتستلمه مجانا من مكان التسليم حسب اشتراكك على النت حسب العنوان التابع له الرخصة)

**Optiplex** · 20-08-2013 02:21 AM

زى ما قال الاخ دة شكلها نصباية

**S O P H O S** · 20-08-2013 02:38 AM

مش منطقي يكلموا 40 مليون مثلا
ويوصلوا ليهم الكروت
والله اعلم

**Land_Cruiser** · 20-08-2013 02:44 AM

انا ما سمعتش عن حد استلم الكروت دي بس عامه لو حضرتك كنت سجلت في الموقع هتلاقي اسم الجهه اللي هتستلم منها الكارت و مكان التسليم في الورقه اللي طلبوا منك تطبعها في الاخر فبعض الناس هتلاقيها كانت بتستلم من فروع بنوك او مكاتب بريد او شركات شحن خاصه و ممكن من الدليل تجيب رقم تليفون المكان اللي كات مكتوب انك هتستلم منه الكارت و تتصل بيه و تتأكد هل في حد كلمك من عندهم و لا لأ أما لو ما عملتش تسجيل اصلا علي الموقع هيبقي بدون شك اللي كلموك دول نصابين و خللي بالك منهم

**أحمد الجندى** · 20-08-2013 10:26 AM

انا اتصلوا بيا امبارح وقالولى عايزن نبعت لحضرتك مندوب بكره يديلك الكارت وحاتدفعله 20 جنيه ... انا تنحت معاها شوية وقلتلها انا ايه اللى يضمنى ان دى مش نصبايه... البنت اتلخمت وقالتى احنا شركة ايجيبت اكسبريس شركة شحن معروفة ودى اوردرات بتجيلنا .... فقلتلها طيب انا عايز اجل الموضوع يومين لغاية اما اسأل واطمن فقالتلى مفيش مشكلة فحددت معاد المندوب يوم الاربع ودلوقتى حارجع للموقع تانى وكويس انى كنت ساعتها محتفظ بالرقم اللى سجلت بيه على الموقع وحاتصل بيهم استفسر وابلغكم

**amr011111** · 20-08-2013 10:35 AM

اتصلوا باخى امبارح برضه وقالوا انها شركة اكسبريس واتفقوا على ميعاد التسليم
ان شاء الله مش نصبايه ولا حاجه

**mohamed hussei** · 20-08-2013 10:42 AM

طب اية دة ازاي عرفوا رقم تلفونات بتعتنا لو هي نصباية يبئا كدة الموقع كمان نصباية

**أحمد الجندى** · 20-08-2013 10:45 AM

انا اتصلت بيهم على 19680، 19683 وقالى ان هما استعانوا بشركات للتوصيل والمبلغ مظبوط فعلا ولو انا حابب استلم من غير دفع فلوس فبيبقى عن طريق انى احدد اقرب مكتب بريد ... والمفروض ان المندوب وهو بيسلمنى الكارت بيفعله