محتار والله محتار وعاوز نصيحه بجد ولوجه الله وما تبخلوش بالردود

**teeka** · 04-09-2008 01:09 PM

السلام عليكم ورحمة الله وبركاته
وكل عام وانتم بخير
مش عارف ابتدى منين بس بجد انا تعبت
من ثلاث شهور قررت اشترى عربية جديدة زيرو فى حدود 100ألف جنيه وتقريبا شفت كل الموضات فى المنتدى خلال الفترة دية وده زود حيرتى
المهم علشان ما اطولش عليكم
فى الاول كنت معجب باليارس علشان الاوبشنز اللى فيها وكمان كل ماليكها فى المنتدى بيشكرو فيها بسسسسسسس المشكلة فى ثباتها وده مشكله بالنسبة لى
رحت محول على اللنسر 1300 اتوماتيك وهنا اختلاف كبير بين الاعضاء عليها ولما ركبتها ما عجبتنيش قوى (راى شخصى)
المهم لقيت الاعضاء بيشكرو فى الصنى وخاصة المهندس سبعاوى صاحب الخبرة الكبيرة فرحت مغير اتجاهى عليها بسسسسسسسسسس سألت السوقيين عندى فى الشغل الراكبين على الصنى بتاعت الشغل وكان عندهم اجماع على ان العربية مش اووى واحد منهم قلى عمله زى 128 (راى غيرى) وكمان أنا متوقع ان الشكل بتاعها حيتغير السنة دى وانا مستعجل علشان انا بيعت عربيتى
انا عارف ان الكمال لله وحدة بس عاوز عربية تكون كويسه وما ازعلش منها بعد ما اشتريها احنا مش بنلاقى الفلوس
اهم حاجة فى العربية بالنسبة لى ان ثابته على الارض و سعر اعادة البيع كويس وقطاع غيار معقولة ويفضل ان تكون اتوماتيك
وهنا مشكلة تانيه لانى شبه مقتنع انى اكمل واجيب اكوتفيا A4 زيرو موديل 2009 حاجة فخمة وثابته ونفس ماتور A5 وكماليات كويسه وهى المانى تشيكى ، بسسسسسسسس مش حاتنزل من بعد 2009 و مانيوال ومفيش منها اتوماتيك ( ولو فى معيش فلوسه)
بجد انا فى حيره محتاج ارائكم وبسرعة وما تبخلوش على با ارائكم
وشكر مقدما واسف على الإطالة

**sab3aawy** · 04-09-2008 02:23 PM

طب ما دام فيه نيه انك تكمل كمل وهات لانسر شارك هاف سبورت، يبقى كسبت الشكل الللى لسة قدامه كام سنة وجودة اللانسر

انا بصراحة لو هركب اوكتافيا حرام اركب A4 وبعد سنة الاقى شكلها راح خصوصا انها مش رخيصة، لو هروح للأوكتافيا تبقى ال A5 ، لكن فى حدود فلوس ال A4 تبقى اللانسر افضل

لو انت مش عايز تخرج من فئة ال 100 ألف، بيقى عندك الثلاثى المرح ، الانترا وصنى واوبترا، والتلاتة معقولين والفروق بينهم مش كتيرة

**askoda** · 04-09-2008 02:56 PM

Optraaaaaa

**dr_abooody** · 04-09-2008 04:29 PM

i 30 هيونداي هي الحل لو عايز حاجة شكلها جديد مش منتشرة ب 109 بعد ما كانت ب 104 بس غبور بيه زودها من غير سبب ؟؟؟؟؟
او هيونداي النترا العربية تحفة ثبات رهيب و التابلوة فخم و التكييف تلج و هتتبسط بيها جدااا
انا خالي معاه العربي موديل 2007ة و ماشاء الله بقالها سنتين و كويسة جدا

**menamakram2003** · 04-09-2008 05:00 PM

المشاركة الأصلية كتبت بواسطة teeka

السلام عليكم ورحمة الله وبركاته
المهم لقيت الاعضاء بيشكرو فى الصنى وخاصة المهندس سبعاوى صاحب الخبرة الكبيرة فرحت مغير اتجاهى عليها بسسسسسسسسسس سألت السوقيين عندى فى الشغل الراكبين على الصنى بتاعت الشغل وكان عندهم اجماع على ان العربية مش اووى واحد منهم قلى عمله زى 128 (راى غيرى) وكمان أنا متوقع ان الشكل بتاعها حيتغير السنة دى وانا مستعجل علشان انا بيعت عربيتى
وشكر مقدما واسف على الإطالة

الصنى زى ال128 يالهوى؟؟؟؟؟؟؟!!!!!!!!!!!! يبقى الفيرنا متبقاش عربية اساسا

**alivara** · 04-09-2008 05:07 PM

ارشحلك النترا و اوبترا بس النترا اكتر باعتبارها اجمل و اكثر شياكة و فخامة و اكثر ثبات و كمان متقفلة فى كوريا ماعدا السنتر لوك و وحدة رفع الزجاج اما اوبترا متقفلة هنا فى مصر

**alivara** · 04-09-2008 05:09 PM

المشاركة الأصلية كتبت بواسطة sab3aawy

طب ما دام فيه نيه انك تكمل كمل وهات لانسر شارك هاف سبورت، يبقى كسبت الشكل الللى لسة قدامه كام سنة وجودة اللانسر

انا بصراحة لو هركب اوكتافيا حرام اركب A4 وبعد سنة الاقى شكلها راح خصوصا انها مش رخيصة، لو هروح للأوكتافيا تبقى ال A5 ، لكن فى حدود فلوس ال A4 تبقى اللانسر افضل

لو انت مش عايز تخرج من فئة ال 100 ألف، بيقى عندك الثلاثى المرح ، الانترا وصنى واوبترا، والتلاتة معقولين والفروق بينهم مش كتيرة

صاحب الموضوع بيقول معاه فى حدود 100 الف جنيه و بيتهيألى ان سعر شارك اغلى من كده انا سمعت ان اقل فئة فيها ب 130 الف .. بس ممكن عشان حضرتك قولت هاف سبورت تنزل ده كله ؟