رجالة الستروين وبخاصة رابطة الإليزية ... محتاج مساعدتكم .. أعانكم الله :)

رجالة الستروين معلش هتقل عليكم محتاج اعرف منكم شوية حاجات عارف ان الاجابات هتكون مرهقة ليكم بس ربنا يجازيكم كل خير .. باختصار انا كنت بسوق عربية موجودة فى البيت وهى مانويل .. واليزية هى اول عربية ان شاء الله هامتلكها ان شاء الله الفئة الاوتوماتك الكاملة .. فمحتاج اعرف طريقة التعامل مع الفتيس بتاعها .. والأهم انى لاحظت من كلام ناس كتير ان العربية ما شاء الله عليها روووعة ومفيهاش مشاكل للى يعرف يسوق الفرنساوى ويتعامل معاه اهى بقى الجملة دى محتاجة شرح اكتررررررررر معلش ..
وياريت شرح للتابلوه الزراير دى كلها خاصة انكوا قلتوا مش هينزل كاتلوج عربى ..
والتكييف العربية اللى كانو بيخلونى اسقوها فى البيت مكنش فيها تكييف ايه النظام بتاعه :)
وكمان لما استلم ايه المفروض اعملة بخصوص البنزين 92 ولا 95 والعجل وايه الحاجات اللى ممكن تخلينى محافظ على العربية بالنسبة للفترة الاولى لغاية ما اروح التوكيل هو تقريبا بعد 1000 !! .. ويعنى نصايحكم ايه وكمان المفروض امشى بيها على كام اول 1000 كيلو وكده .. واخيرا ياريتكم باعتباركم خبراء فى الفرنساوى تكون النصائح متركبة بالظبط على العربيات الفرنساوى لان كل الكلام انى اللى يفهم فى الفرنساوى هيستمتع بالعربية جداااا .. ومش عارف اشكركم ازاى وان شاء الله اول ما استلم هعمل تقرير جامد يا أجدع ناس :)

ودول يارجاله صور لما كنت فى المعرض بالاضافة لصورتين من على النت وهتعرفوا اكيد الفرق بينهم .. مكنش فاضل غير الدراعات اللى وراء الدريكسيون بس ملقتش لها صور كنت عاوز اعرفها .. بس والنبى باستفاضة ومحدش يبخل عليا بكلمه رجاااء انتو مش عارفين انتو بتساعدونى قد ايه :)
وجزاكم الله كل خير :)

http://im38.gulfup.com/TQyVn.jpg

http://im42.gulfup.com/iul61.jpg

http://im34.gulfup.com/BUvT8.jpg

http://im34.gulfup.com/54eRo.jpg

http://im33.gulfup.com/LJjeP.jpg

الصورتين دول الاولى اللى نازله مصر الفئة الكاملة والتانية من على النت ايه الفرق :

http://im35.gulfup.com/H01UR.jpg

http://im36.gulfup.com/VWyoa.jpg

اقتباس:

---

المشاركة الأصلية كتبت بواسطة elsayed mohame

باختصار انا كنت بسوق عربية موجودة فى البيت وهى مانويل .. واليزية هى اول عربية ان شاء الله هامتلكها ان شاء الله الفئة الاوتوماتك الكاملة .. فمحتاج اعرف طريقة التعامل مع الفتيس بتاعها .. والأهم انى لاحظت من كلام ناس كتير ان العربية ما شاء الله عليها روووعة ومفيهاش مشاكل للى يعرف يسوق الفرنساوى ويتعامل معاه اهى بقى الجملة دى محتاجة شرح اكتررررررررر معلش ..
http://im38.gulfup.com/TQyVn.jpg

---

أولاً بالنسبة للفتيس, هوا أوتوماتيك تيب ترونيك - أربع سرعات,
وبما أنك بتقول أنك سوقت مانيوال بس, هقولك عال أوتو بتاعها بالتفصيل,

ال P هوا الباركنج, تحطها عليه لما تيجي تركنها وهتخرج بره العربية وتمشي منها بس, وغير كدا خليها علي ال N.

وال N هوا الموور زي المانيوال بتبقي مش واخدة غيار, ودا الوضع اللي بتحطة عليها لما بتقف في بنزينه تفول, أو تقف تتكلم مع واحد صاحبك, متحطش P في الأوقات دي..
عشان ال P ليه حساس خاص بيه, وأنا بحب أحافظ عليه عشان ساعات بيحصل فيه مشاكل علي المدي الطويل,, والتكة بتاعتة بتزعجني,, ولو عطلت علي P مش هتعرف تحركها.

والعربية لما بتكون علي P مش هتعرف تحرك العصاية من عليه عشان تنزل لل R و ال D من غير تدوس فرامل, فتدوس فرامل قبل ما تنزل من علي ال P لأي غيار.

ولما تيجي تحط العربية علي ال P ممكن تطلع من غير فرامل عادي,, دا لو أخدت العصاية خطف كدا من الN لل P ودا الطبيعي ومفهوش ضرر علي الفتيس او العصاية,
بس لو حركة أيديك مش سريعة يفضل تدوس فرامل,,, عشان لو أيديك بطيئة العربية هتاخد R منك وأنت طالع بالعصاية لل P وهترجع بضهرها منك فخد بالك كويس..


ال D هوا ال Drive أو وضع الحركة اللي بيمشي العربية,
يفضل قبل ما تجيبه تدوس فرامل بس مش شرط,, عشان العربية هتبدأ تتحرك ولو في مكان ضيق أو جراش أو قدامك عربية ممكن تخبط فيها.
طبعا هتخبطها علي سرعة بطئية مش هتنط بيك, بس عود نفسك من دلوقتي أنك قبل ما تجيب D أو R تكون دايس فرامل تحسبها لظروف المكان اللي حواليك.



ال R هوا اللي بيرجع العربية ورا, مفيش كلام كتير يتقالي عليه,
قبل ما تنقل لل R يفضل أن العربية تكون واقف علي الأرض خالص, مع العلم إن الفتيس فيه خاصية أمان بتمنع العربية تاخد R وهيا ماشية عشان مفيش فاصل ما بينهم زي العربيات الاوتوماتيك العادية اللي بتبقي بزرار, بس أنا محبتش أجرب, وبقف خالص قبل ما أجيب R.


ال M
لما تكون جايب D وماشي بالعربية أو واقف,
في حارة في الجنب الشمال من ال D في الفتيس مكتوب جمبها M
M أختصار لمانيوال ودي اللي بتخليك تتحكم في نقل الغيارات, وتثبت العربية علي غيار معين, وتحرق علي الغيار وتنقل متأخر أو بدري وتسقط غيارات زي الفتيس المانيوال بالظبط.
ولما بتحرك العصاية ناحيتك للشمال بيظهر لك في الطابلوة الغيار اللي أنت عليه, لو كنت واقف مش بتتحرك هتلاقيها كاتبة 1 بدل D يعني الغيار الأول,,

ولما تمشي بالعربية مش هتنقل طبعاً وهتزق عصاية الفتيس لقدام ناحية الطابلوة واللي مرسوم عندك في الفتيس + عشان تنقل للتاني, ولما توصل للرابع وعايز تجري في منطقة مثلاً هتزق العصاية لتحت عشان تجيب التالت وهكذا.

ملحوظة : ممكن في اي وقت تنقل ما بين D لل M وانت ماشي أو واقف, والعكس صحيح,
لو كنت علي ال M وحارق علي غيار ونقلت لل D العربية هتاخد أفضل غيار مناسب للسرعة اللي أنت ماشي بيها وهتكتب لك D علي الشاشة وتنقل الغيارات لوحدها تاني أكنك طلعت عليه من البداية.

أخر حاجة بقي وضع ال D العادي, ليه وضعين تابعين ليه,,
وليهم زرارين منفصلين اللي هما S و النجمة * فوق علي الشمال في الفتيس,

ال S دا الوضع الرياضي Sport : لما بتضغط عليه, بيتكب علي الشاشة قدام في الطابلوة Ds
بيخلي العربية سحبها أسرع وتنقل الغيار متأخر عشان تديك تجميع أعلي في الغيارات, وطبعاً دا بينعكس علي استهلاك البنزين بيزيد بشكل ملحوظ.

ال * دا وضع الجليد Snow: لما بتضغط عليه, بيتكب علي الشاشة قدام في الطابلوة *D
دا في الأساس مصمم للدول اللي فيها جليد وطرق زلقة كتير, لما بتغط عليه العربية بتطلع علي التاني دايماً وتاخد تالت ورابع بس, والحكمة من أنها متاخدش الأول دا عشان تقلل ال Wheel Spin والكاوتش

ميفركش علي الأرض ويفضل محافظ علي تماسكة بالأرض,
يعني في العادي أنت لو علي D أو Ds في شوارعنا ومن غير مية ولا جليد, ودوست سنة بنزين زيادة وأنت طالع, الكاوتش الامامي هيفرك علي الأرض ويطلع أمريكاني زي ما بيقولو, وهيعمل نفس الكلام معاك لو بتاخد شارع علي سرعة,
أما علي وضع ال *D لو وقفت علي دواسة البنزين مش هتفرك ولا هتخمس.
وهيخلي تماسك العربية بالأسفلت أعلي, وهنا في مصر لو أخترتة هيخلي العربية تقف معاك في وقت أقل لو قدامك مطب وأنت ماشي علي سرعة, لأنه بيعمل Engine Brake مع الفرامل العادية وبيسقط غيارات بدري عشان يوقف العربية في وقت ومسافة أقل.
وطبعا في حالة ال D وال Ds مش بيعملو كدا,
ال *D بس هوا اللي بيعمل كدا عشان يزود تماسك الكاوتش في الأرض

وعشان تلغي أي وضع بتضغط علي نفس الزرار اللي أنت ضغطت عليه من ال S أو ال *
وممكن تنقل ما بينهم عادي أو واقف بالعربية أو سايق,
وممكن تشغلهم أو تفصلهم عادي وأنت واقف أو سايق,

بص يا باشا

اولا سيبك من كلام الناس ان الفرنساوى عربيات معقدة و غريبة و كل ده .. العربيات طبيعية خالص و مفيش اى اختراع فيها يعنى مش صواريخ .. كل الفكرة بس ان العربية محتاجة اللى يشتغل فيها فى الصيانة يبقى فاهم فيها مش اول مرة يجرب عشان التجربة فى العربيات ديه هتسبب مشاكل كتيرة و لو فتحت فى موضوع بيبقى محتاج حد فاهم اوى عشان يلمه

بالنسبة لسواقة الاوتوماتيك اسهل كتير من المانيوال و الفتيس مش محتاج اى حاجة .. كل اللى عليك بنزين و فرامل .. موضوع انك تجيب احسن اداء للعربية ده مع الوقت و التعود هتبقى عارف تضغط ازاى و بقوة ايه على دواسة البنزين عشان تاخد الاداء اللى يريحك .. الفتيس الستبترونيك ده لو عايز تشد او تستمع بسواقة العربية اكتر هتنقل الفتيس ناحية المانيوال اللى هو M و تشتغل + قدام و - ورا عشان تنقل غيارات و برضه متقلقش لو اديت العربية نقلة غلط و العربية حست ان فيه خطر على الموتور هى هتنقل اوتوماتيك لوحدها عشان تحافظ على نفسها

البنزين 92 و بتقبل 90 عادى بس طبعا يفضل انك تمشى على 92 على طول

التكييف عادى خالص برضه هتشغله على وضع auto اسهل حاجة و هو هيظبطلك الجو لوحده

اول 1000 كيلو متحرقش بالعربية جامد متعديش 3000-3500 rpm و لو نفع متشغلش التكييف برضه يبقى افضل او تشغله وقت الحاجة ليه بس

و الف مبروك العربية

و اى استفسار تانى هحاول اساعدك ان شاء الله

اقتباس:

---

المشاركة الأصلية كتبت بواسطة elsayed mohame

وكمان لما استلم ايه المفروض اعملة بخصوص البنزين 92 ولا 95 والعجل وايه الحاجات اللى ممكن تخلينى محافظ على العربية بالنسبة للفترة الاولى لغاية ما اروح التوكيل هو تقريبا بعد 1000 !! .. ويعنى نصايحكم ايه وكمان المفروض

امشى بيها على كام اول 1000 كيلو وكده .. واخيرا ياريتكم باعتباركم خبراء فى الفرنساوى تكون النصائح متركبة بالظبط على العربيات الفرنساوى

---

العربية تقبل بنزين 92 عادي ودا الأفضل ليها عن ال 95

والعجل أظبطة علي 32 وأول ما تستلمها روح علي أي فرع لبريدجستون وخليهم يفضو الكاوتشات الأربعه من الهواء بالجهاز ويملوها نيتروجين, هيفرق معاك كتير في الراحة وهيريح العفشة.
ويفضل أول 1000 كيلو تمشي علي سرعة متوسطة متعديش ال 100, والأهم من أنك متعديش 100 كم في الساعة, أنك متحرقش علي الموتور وتدوس علي دواسة البنزين جامد,
وخلي كل نقلاتك هادية ما بين 2 ل 2.5 rpm عدد لفات الموتو,, طبعاً دا يفضل بس مش شرط,, وأنا عن نفسي بعمل دا في أي عربية زيرو...

LeitoSR
Mohab.Nabil
أقسم بالله رجالة بما تعنيه الكلمة .. ربنا يجازيكم كل خير كلامكم هاطبعه فى هيئة ملاحظات .. وربنا يبارك فيكم ويكرمكم على مساعدتكم .. الف شكر يا رجالة بجد :)

الأخ الفاضل / الأستاذ أحمد أمين

عايز أعرف إمتى أنقل على وضع "m" فى الفتيس؟