صيانه الـ30 الف في هيونداي العبور و -شويه استفسارات-

السلام عليكم و رحمه الله و بركاته

رحت امبارح اعمل صيانه ال30 الف
العربيه هيونداي فيرنا 1600 موديل 2007

المهم الصيانه كانت تمام
و اول مره اعرف منهم انه الزيت الـ10 الاف يا يكمل مدته يا يقعد سنه
و الزيت الـ5 الاف يا يكمل مدته يا يقعد 6 شهور

المهم نادوا عليا مرتين قبل ما استلمها

اول مره العربيه محتاجه كوعه مياه طب يا جماعه محتاجه اوي اه دي مملحه زي مانت شايف طب التكلفه هتبقى كام يعني حوالي 1200 جنيه انا في سري : ياااااااااااااااالهوي لالا الف شكر هعملها انا

تاني مره العربيه محتاجه تيل فرامل 400
طقم سيور كاتينه 1200
2 مساعد خلفي 1500
انا في سري تاني : ياااااااااااااااالهوي لا طبعا انا غلطان اني جيت هنا :)

المهم انا قولت نفض خالص ليهم و نشوف اي ميكانيكي تاني بس الحاج اصر انه على الاقل نعمل التيل لانه ( في نظره ) مهم قوي

المهم الموضوع خلص على الصيانه و التيل

دلوقتي بقى عايز اسأل كام سؤال

ايه هيه كوعه المياه دي :C_laugh[1]: و هل فعلا لازم لازم تتغير لانه احنا هنسافر قريب جداااا ؟؟


طقم سيور الكاتينه مش بيتغير عند الـ60 الف ؟ لما قلتله كده في التوكيل قاللي لا ماهو يا اما 60 الف يا اما 7 سنين هل الكلام ده صح فعلا ؟؟؟؟؟؟؟

الـ2 مساعد خلفي طبعا مش مهم قبل السفر بس لما ارجع اغيره منين و الاسعار ايه نظامها ؟

و شكرااااااااااااااا مقدما

السيور يا اما 60 الف يا 3 سنين ايهما اقرب لما فك السيور القديمة كانت مشققة و العربية ساعتها كانت عدت ال 3 سنين وكانت ماشية 20 الف بس مش 7 سنين لا
الزيت ال 10 الف يا 10 كم يا 6 شهور ايهما اقرب مش سنة لانه بيفقد خواصة ده كلامهم بردو في ابو رواش 2008 و كلام اكتر من فني و مهندس من اماكن مختلفة
و الكوعة ملحت عندي و عملتها في مركز خدمة مودرن سيرفيس معتمد من غبور و ممكن اي مركز معتمد بس انا مرتاح في التعامل معاهم محترمين اوي و فاهمين شغلهم بأقل من كدة بكتير و غيرت المية كلها ده من كام شهر مش كتير
غيرت 2 خرطوم علوي و سفلي و الكوعة كانت مملحة جدا فعلا
و تيل الفرامل غيرته بأقل من كدة بردو
بص انا هجيبلك الاسعار بكرة عشان الورق في العربية
ماتخليش ميكيانيكي يلعب في العربية مهما ان كان فاهم و لو كل الناس اجمعوا علي انه برنس و بيفهم من اجدع مهندس و فني التوكيل او مركز خدمة حتي بتفرق في التقفيل

هابعتها لحضرتك في رسالة علي الخاص

السلام عليكم
هو زيت ال10 الاف بيقعد سنه
صعب قوى يقعد 6 شهور بس
لأنه ببساطة قليل الناس اللى ممكن تمشى بالعربية 10 الاف كيلو فى اقل من 6 شهور
انا حاطط شيل الترا 10 الاف كيلو وماشى بيه حوالى 10 شهور وتمام الحمد لله

عموما كوعة الميه مهمة جدا جدا
لو لاقدر الله الملوحة خرمتها (الملوحة هتعمل تأكل ممكن يتسبب فى خرمها) ساعتها الميه هتنقص وهتخلص والعربية تسخن وملهاش حل غير انك تغير الكوعة او كل شوية تزود ميه وانت ماشى على الطريق لحد لما تصلح الكوعة

وبالنسبة للسيور بتاع الكتينة انت ازاى مغيرتمش من 6 سنين كتير اوى عليهم وبردو ضرورى تغيرهم ضرورى الجو حر اوى ولو لا قدر الله اتقطعو وانت ماشى
هتغرم كتييييييييييييييييييييييي ررر اوى وممكن تغير المكنة كلها لا قدر الله


واخيرا المساعدين بردو مشلكة لكن مشكلتهم مقدور عليهم
بس لو هتشيل معاك ناس كتير فى العربية اثناء السفر نصيحة تغيرهم احسن
لأنك هتحك فى طوب الأرض مع الحمل اللى فى العربية


ربنا يكفيك كل شر

عذرا للاطالة