ثلاث سنوات ونصف مع الافيو ...ايه الخلاصه
من تلات سنين و نصف وكام شهر كمان جبت افيو 2009 عامله 7000 كيلو و شويه فكه فابريكه جوه وراشه رفرف بره
جبتها ايامها علي 63 الف
قعدت معايا تلات سنين و نصف وكام شهر و عملت معايا تقريبا 52000 كيلو
حبيت انقل تجربتي معاها بالكامل عشان اللي يحب يجيبها
اولا ...لم ادخل التوكيل بالعربيه وكنت بغير زيت وفلاتر و لوجيهات وتيل بره التوكيل بس قطع غيار اصليه
ثانيا ..لم تواجهني اي مشاكل ميكانيكيه مع السياره غير ان لمبه التشيك انجن نورت مره و رحت للميكانيكي و هو راجل خبره وحاطط جوه الورشه شهادات اخدها من كوريا و متصور مع كام واحد كوري يعني شكله كوري اصلي ..حط العربيه علي الجهاز وقالي حساسا كامه جبته من التوكيل ب 200 جنيه وركبه و اخد بالكشف 40 جنيه
ثالثا ..العفشه كتير اشتكوا منها علي المنتدي بس من ملاحظاتي ان العفشه الاماميه بتعمل صوت فعلا في الشتاء اول ماتمشي بالعربيه بعد كده بيروح ، مغيرتش حاجه في العفشه كنت علي طول كل 4 اشهر ارفع العربيه و ارشها برش يحمي من الصدا بعد غسيلها طبعا فالعربيه كانت هايله من تحت لدرجه ان الراجل اللي اشتراها كان بيفاضل معايا ولما رفعها دفع الفلوس من سكات
رابعا..استهلاك البنزين ممتاز مع العلم ان العربيه مانيوال كانت بتاخد 8 او 9 لتر لل 100 كيلو داخل المدينه تقل ل 6 لتر علي السريع المعقول ودي من اكبر المنيزات
خامسا الدهان انا كنت راكنها في جراج و شغلي في القصر العيني فكنت داسما حاططها برضه في جراج فعدم تعرضها للشمس حافظ علي لونها بشكل كبير
سادسا ....صالون العربيه ..هو السهل الممتنع مفيش رفاهيه يعني تحس انها بتقولك علي قد فلوسك يا باشا
الثبات ..اخرك 120 و بعدين ملاهي بصراحه فكنت بخاف اجري بيها
نيجي بقه للمشكله الرئسيه و دي احد اهم اسباب بيعي ليها بعد الرغبه في التغيير ..المشكله في مروحه السقف ..قصدي التكييف كان تعبان ..تعبان ..تعبان رغم كل المحاولات واضح ان اخره كان كده ..و طبعا تشغله من هنا والعربيه تقعد تكاكي من هنا وتبقي بطه بلدي
ا
واخيرا ..لو معاك 88 الف او حتي تسعين تجيبها ولا تجيب اللوجان ..بصراحه الافيو اشيك واوسع و اقيم
الحمد لله بعتها علي 60 الف ....والله وحشتني ربنا يمسيها بالخير