الموضوع: الحقوني

أنا معايا كتالوج الشاهين بس الانجيكشن,
عموما الصيانة الدورية معروفة لأى سيارة :
تغيير الزيت بحسب نوع الزيت (فى الصيف يفضل تغييره قبل ميعاده أو عند القيادة بقسوة, و تغيير فلتر الزيت كل تغييرين زيت أو مع كل تغيير للزيت اذا كان تخليقى 10 الاف كيلو).
كل أسبوع لازم تكشف على الزيت و مياه التبريد.
كل 10 الاف :
- تربيط العفشة(لازم).
- الكشف على سير الدينامو و شده ان لزم الأمر.
- الكشف على التاكيهات و ضبط التاكيهات ان لزم الأمر(نفض لما تعمل صوت تاكيهات ابقى اضبطها).
- ضبط الزوايا(نفض لما العربية تبقى مش مضبوطة ابقى اضبطها).
- تغيير البوجيهات و طقم الكهرباء (نفض لما تقطع غيرها).

كل 20 الف:
- تغيير فلتر الهواء و البنزين(قد تختلف من سيارة لأخرى, و يفضل ان امكن تغييرهم كل 10 الاف خاصة فى حالة السير فى أجواء متربة (فلتر الهواء, و غير فلتر البنزين كل 10 الاف لو انت متعود تسيب البنزين لحد الأخر لما اللمبة تنور).

كل 40 الف(بالاضافة الى صيانة ال10 ألاف) :
- تغيير سير الكاتينة(لازم لازم لازم), و يفضل تغيير سير الدينامو معاه, و نفض لسير الباور و التكييف ان وجدوا, لما يتقطعوا غيرهم.

دى الصيانة الأساسية للشاهين و تقريبا لأى عربية فيات, و يا رب أكون منسيتش حاجة.

بص انا مش عارف اوصل للكتالوج على النت,
لو تحب أنا معايا الكتالوج بتاع الشاهين بتاعتى لو تحب تصوره مثلا, هو بالعربى, بس مش مفيد بدرجة كبيرة يعنى هو فيه :
- كيفية استخدام السيارة(اللوحة و العدادات و التكييف و الضباب), طبعا مش هتحتاج الكلام ده.
- الجزء الثانى بعض الارشادات و مواعيد الصيانة الدورية.
- الجزء الثالث مواصفات السيارة, و ده مش هينفعك أوى للاختلاف بين الشاهين القديمة و الجديدة على مستوى المحرك.
لكن هحاول أدورلك على النت على كتالوج انجليزى للشاهين.