مشكلة فى تكييف الافيو .. و مش عارف حلتها صح ولا لأ ؟
السلام عليكم
كان عندى مشكلة فى التكييف و هى انى طول ما انا ماشى على سرعة منخفضة التكييف بيبقى شغال كويس لكن لو رحت مشوار على طريق سريع بعد نصف ساعة كده الاقى الهواء اللى خارج قل اوى رغم انى سامع صوت المراوح و لما اطفى التكييف شوية و ارجع اشغله بيرجع كويس !
المهم .. روحت لواحد بتاع تكييف عربيات فى شارع السودان عند مدينة الطلبة و قالى العيب فى الكنترول بتاع الكمبرسور فبيخليه ما يفصلش و بالتالى بيتكون تلج فى المواسير فيقلل الهواء اللى خارج و اقالى الحل حاجة من 3 :
1- اما القبول بالامر الواقع و كل ما الهواء يقل اطفى التكييف لمدة 5 دقائق و بعد كده ارجع اشغله تانى (طبعا" حل مش عملى ).
2- تغيير كنترول الكومبرسور و بالتالى تغيير الفريون و التكلفة 380 جنيه.
3- تركيب ترموستات ليقوم بعمل الكنترول فيفصل عند درجة حرارة معينة و التكلفة 200 جنيه
فكرت بسرعة و اخترت انى اركب الترموستات ... بس ماكنتش اعرف انه لازم يفك الوش الفبر بتاع زراير التكييف و الكاسيت علشان ياخذ سلك منه يركب فيه الترموستات .... لكن بعد ما خلص مالاقتش حاجة باينة و الترموستات حطه ورا درج التابلوه و ظبطه انه يشتغل عند درجة حرارة 6.5 و يفصل عند 4.5 تقريبا" و يادوبك باسمع صوت تكة لما يجى يشتغل او يفصل ... و التكييف رجع كويس و ان كنت حاسس ان البرودة قلت شوية .
مش عارف هو كده صح و لا لا ؟ و هل كان من الاحسن تغيير كنترول الكومبرسور و الفريون ؟
