أولاً: حضرتك هتروح تجيب شهادة مخالفات من نيابة المرور إللي إنت تابع ليها (تكلفتها 5 جنيه)، ولو فيها مخالفات هتدفعها في النيابة وإنت واقف، ولو مفيش هتاخد الشهادة وتمشي، وخد بالك إن الشهادة صالحة لمدة 15 يوم فقط، ولو إنتهت هتضطر تروح تجيب واحدة تانية
ثانياً: الله أعلم نيابة مرور مدينة نصر فين، بصراحة مش عارف
ثالثاً: لو إنت عندك تأمين شامل والعربية محظرة لصالح بنك، يبقى تروح تعمل وثيقة التأمين، وتروح البنك تعمل جواب للمرور لتجديد رخصة التسيير (لو العربية مش قسط يبقى انسى الخطوة دي) وساعتها في البنك هياخدوا وثيقة التأمين ويقولك هتاخد جواب المرور بعد أسبوع تقريباً
رابعاً: تاخد شهادة المخالفات وجواب المرور (في حالة القسط) وتروح على المرور، (لو مش تقسيط يبقى شهادة المخالفات وعلى المرور على طول)
خامساً: تعمل وثيقة التأمين الإجباري من أي شركة تأمين في المرور (تقريباً السنة 80 - 100 جنيه)
سادساً: تروح شباك التجديد تاخد استمارة تملاها وتحط عليها طوابع دمغة
سابعاً: هاتسلم كل إللي فات في الشباك وتدفع الضريبة (عشان رخصتك مر على انتهاءها اكتر من شهر هتدفع ضريبة وتلت - العربية لو 1600 سي سي الضريبة لعى ما اتذكر في السنة الواحدة حوالي 200 - 220 جنيه) وهيطلب يشوف بطاقتك الشخصية وياخد منك الرخصة المنتهية وتستنى (هتدفع ضريبة سنة واحدة بس في حالة السيارة التقسيط) أو تختار هترخص سنة أو اتنين أو تلاتة لو العربية مش تقسيط، وتدفع ضريبة المدة
ثامناً: ينادوا إسمك ويطلعوا على بطاقتك الشخصية وتستلم الرخصة
تاسعاً: مبرووووووك تجديد الرخصة
ملحوظة: الخطوات دي هتعملها لو عندك تجديد فقط ومفيش فحص
أتمنى يكون كلامي مفيد لحضرتك :)
المفضلات