برجاء الافادة فى الاختيار بين الألتو والماروتى والاسبرانزا a113

السلام عليكم ورحمة الله وبركاته

انا عايز اشترى عربية للمدام و الميزانية ممكن اجيب عربية فى رنج من 50.000 الى 70.000 وبالتقسيط

ولما سألت فى رنج المبلغ ده لاقيت الاتى:

سوزوكى ماروتى : 49.000 تقريبا
سوزوكى ألتو : 62.000 تقريبا
شانا بينى مينى أتو : 65.000 تقريبا
إسبرانزا 113 : 68.000 تقريبا

فانا محتار جداااااااااااااا خصوصا بين انى اجيب عربية مضمونة (بإذن الله) زى السوزوكى ولا اجيب عربية جميلة جداا وإمكانيات عالية زى الصينى وخصوصا احترت فى الصينى بين الشانا وكونها اوتوماتيك وفول اوبشنز و 1000 سى سى وكمان ضمانها وصيانتها مع سوزوكى بس مشكلتها انها لسه جديدة واعتقد ان فتيسها الأوتوماتيك لسه ماتجربش وكمان معرفتش تعمل اسم من ساعة مانزلت بالشانا بينى القديمة اللى هى تقريبا كانت من سنة 2009 او 2010 مش متأكد

وبين الاسبرانزا 113 اللى فعلا اثبتت وجودها فى السوق ومنتشرة فى الشارع بس طبعا وجود بعض المشاكل فى العفشة الناشفة وبعض الشكاوى التانية من بعض اصحابها وكمان هى اعلى سعر فى الفئة دى وكمان مانيوال

وطبعا الرعب الكبير من الصينى هو سعر اعادة البيع

واللى مخلينى مش مؤيد الماروتى مع انى دورت وسألت فعلا لاقيتها عربية يعتمد عليها فعلا بس المشكلة فى التكييف وانتوا عارفين حر الصيف والعيال مابيستحملوش فى الحر ده وكمان مافيش اى اوبشنز خالص ولا سنتر حتى

فيريت يا جماعة من اصحاب الخبرة تدلونى اشترى ميين فيهم مع العلم انى هقسط على 5 سنوات او ممكن 3 فى حالة الماروتى

وشكرا ليكم:Oc_sun1[1]:

لو استعمال المدام بتاعه حضرتك بتمشى كتير بالعربيه فى الزحمه والكلام ده وبتعمل كيلوهات كتير خليك فى الالتو
لاكن او استعمالها مشاوير خفيفه وفى مناطق نضيفه يبقى خليك فى 113 لانها ناعمه جدا فى السواقه بالنسبه للست
لاكن العفشه رخمه شويه
غير كده سيبك من الباقى
لاكن لو عايز اوتوماتيك ممكن تجيبلها حاجه مستعمله افضل

وممك تريح دماغك خالص بقى وتجيب حته دايو ماتيز ب 20 او 25 الف و تشدها شده حلوه . هى مكيفه وقطع غياره كويسه جدا وناعمه وفى نفس الوقت مش مقرفه
ولو عرفت ممكن تحطلها موتور اسبارك بالفتيس الاوتوماتيك وتبقى انت كده عديت :d :d

خليك فى الالتو والله اعلم لا انصحك بال 113 سبرانزا ولا الماروتى شكرا

متابع ،، عندى نفس الحيرة

لو مش فارق معاك موضوع التقسيط هات حاجة استعمال ثابتة وجودها مثلا الدايو الهاتش باك باور ومكيفة والسنتر والانذار لو مشموجودين فى العربية سعرهم مش غالي


أما لو حبيت تدور على عربية اعتمادية اكتر من العربيات دي ممكن تشوف سكودا فليشيا بردو هاتش باك وركوبة كويسة وسعرها يبدأ من 25 الى 35 وتكيف بردو

خليك في إسبيرانزا 113 او خد جيلي باندا عبور بمنزلها تحت إسم ام جراند برضو اما الماروني تشيلها من حساباتك خالص ولولا انك بتقسط وشكلك مش متفرغ كنت إقتراحات عليك تجيب عربية فخمة قديمة في حدود 9 آلاف زي مرسيدسرمثلا وتحط فيها كل حاجة تحلم بيها المدام من تكييف و باور وجنوط عريضة وحجم كبير وشوية تتعديلات بالفيبر وتعديل فوانيس وترويج عالي وأشدها زيرو وتجيب نواكل و سمكري والوان حديثة وكل ده يكلفك العربية حدود 40 الف بس ساعتها العربية حتحلى بعينك وحتصادرها من المدام ليك ونرجع من اول وجديد يا شباب الماروتي ولا إسبرانزا وبالتوفيق

انا ارشح لك كيا برايد هاتشباك مستعملة في حدود 30000 بشرط الحالة تكون جيدة
ومش هتخسر لو حبيت تبيع

الماروتى إعتمادية وموفرة لأبعد الحدود هى معايا بس إبعد عنها وخصوصاً لو حتشترى زيروم سعر مبالغ فيه وبدون أى كماليات نهائى ولا كاسيت ولا أى حاجة وتقفيلها وعزلها سىء جداً يعنى كأنك راكب فرن صغير متحرك فى الصيف .
البديل لها وبنفس المواصفات الألتو لكن يعيبها صغر الحجم ( شكلها الخارجى قلة قوى زى الماروتى بالظيط ) وضعف الموتور 800 سى سى يعنى عربية مش عائلية خالص .
ال a 113 هى كشكل وكماليات مناسبة جداً لكن ناس كتير بتتكلم عن عيوب للعربية وخصوصاً العفشة على الرغم إن بيقولوا ليها حل وإنك تركب مساعدين :oh: مممممممممممم صراحة مش فاكر ماركة العربية اللى مساعديها تركب على ال A 113 لكن إسأل كويس عن باقى العيوب وعموماً أى عربية زيرو بتخسر فيها لما تعيد بيعها لكن الصينى معروف إن سعرها بيدمر مع إعادة البيع على الرغم إنى شايف ال a113 ماسكة سعر كويس فى إعادة البيع هى وال M11

الالتو طبعا بدون تفكير عربيه محترمه جدااا

بيتهالى بين الى انت كاتبه الالتو احسن اختيار بس لو هتقسط شوف المقدم والقسط وشف عربيات تانيه تكون اغلى سنه بسيطه واحسب فرق القسط هيبقى كام؟ بيتهيالى على 5 سنين مش هيبقى الفرق فى القسط كبير او شوف حاجه زى السيات ابيزا مستعمل او شفورليه سبارك عربيات جميله واحسن
وربنا يوفقك فى الشراء

التو من رايي لو مش حابب الصيني و113 لو معندكش مانع من الصيني...
تحياتي

Sent from my Xperia Arc S using Forum Runner

اقتباس:

---

المشاركة الأصلية كتبت بواسطة lidosasa

الماروتى إعتمادية وموفرة لأبعد الحدود هى معايا بس إبعد عنها وخصوصاً لو حتشترى زيروم سعر مبالغ فيه وبدون أى كماليات نهائى ولا كاسيت ولا أى حاجة وتقفيلها وعزلها سىء جداً يعنى كأنك راكب فرن صغير متحرك فى الصيف .
البديل لها وبنفس المواصفات الألتو لكن يعيبها صغر الحجم ( شكلها الخارجى قلة قوى زى الماروتى بالظيط ) وضعف الموتور 800 سى سى يعنى عربية مش عائلية خالص .
ال a 113 هى كشكل وكماليات مناسبة جداً لكن ناس كتير بتتكلم عن عيوب للعربية وخصوصاً العفشة على الرغم إن بيقولوا ليها حل وإنك تركب مساعدين :oh: مممممممممممم صراحة مش فاكر ماركة العربية اللى مساعديها تركب على ال a 113 لكن إسأل كويس عن باقى العيوب وعموماً أى عربية زيرو بتخسر فيها لما تعيد بيعها لكن الصينى معروف إن سعرها بيدمر مع إعادة البيع على الرغم إنى شايف ال a113 ماسكة سعر كويس فى إعادة البيع هى وال m11

---

المساعدين اللى قدام كياريو 2001
واللى ورا كسيل

انا كنت محتاج عربية علي القد اسافر بيها من القاهرة لاسكندرية او بورسعيد مرة كل شهر و رشحولي الماروتي

قدامي عربية مو 2008

ايه رايكم ؟

السلام عليكم

انا قدامي واحدة ماروتي كويسة موديل 2008 و لكن انا متردد لاني مش عارف هتقدر تسد معايا في السفر من القاهرة لبورسعيد او اسكندرية مرة كل شهر و لا لأ؟؟؟
و كمان انا بصراحة رجلي تقيلة و سمعت قريت في كذا موضوع انه اسطوانة الدبرياج مبتستحملش فهل الكلام ده صحيح و ان كده فهل له علاج ؟؟؟؟

كنت عايز اعرف من باب العلم سعة التنك و التنك يعمل كام كيلو ؟؟!!!

البلد دى مينفعهاش غير فيرنا و لانوس

الالتو كرأي