أول موضوع وأول عربية........مشترك جديد اقبلوني معاكم
السلام عليكم ورحمة الله
أخوكم محمد مشترك جديد حالا معاكم ف المنتدى الرائع ده وعشان محدش يتريق أنا ميح ف العربيات بمعنى الكلمه لا أعرف يمين ولا شمال كل معرفتي بالعربيه اركب سوق وقف وبس ولسه متعلم من شهر
أولا أرجو انكم تقبلوني عضو معاكم هنا وأخ ليكم
أنا حاليا بعد ما اتعلمت السواقه"الله يكون ف عون اللي علمني:01964E~163:" بفكر اشتري عربيه تكون شكلها حلو وكويسه وركبت النوبيرا مع واحد صاحبي وسوقتها عجبتني جدا خصوصا انها واسعه وناعمه وفوق كل ده ريحتني ف السواقه وارتحت ليها نفسيا فقررت اني أشتري نوبيرا 2 زيها:Oc_sun1[1]:
دلوقتي أنا المبلغ الموجود معايا من 50-55 ألف يا ترى دول يجيبوا نوبيرا عامله ايه؟ يعني موديل كام وكام كيلو وموتورها عامل ايه ورشه ايه بالظبط؟
ويا ريت تقولولي أخلي الميكانيكي اللي هاخده معايا يبص على ايه بالضبط هو والسمكري عشان مش عاوز البس ف حاجه مش كويسه وهاخد صاحبي ده يسوقها معايا عشان لو فيها حاجه هو هيحس بيها أكتر مني خصوصا صوت الموتور أو رعشه أو حاجه زي كده
وأنا استخدامي هيكون ليها داخل البلد طول الأسبوع ما عدا يوم أو اتنين بسافر فيهم بره البلد يعني مشوار بتاع 80 كيلو رايح وزيهم راجع
أرجو اني أكون متقلتش عليكو