الموضوع: مطلوب : جهاز شتيمة للعربية ٧ نغمة ! بسعر معقول !!

مطلوب : جهاز شتيمة للعربية ٧ نغمة ! بسعر معقول !!

ياريت يا جماعه الي يعرف بيتجاب منين ياريت يقولي ... ومحدش يقلي انزل التوفيقية او شارع دمشق... شارع دمشق مفهوش غير جهاز سرينة الشرطة بس انا عاوز جهاز شتيمة خمسة كيلو الي هو بيجي ٧ نغمة كوري او تيواني اما الصيني ناس كتير خوفتني منوا انو بيبوظ بسرعة ... طبعاً معليش متستغربوش من طلبي ده ... دلوقتي كل حاجة موجودة ومتوفرة. ... واحنا في عصر التكنولوجيا والسرعه ... الشعب دلوقتي كلو ماشي يشتم في كلوا ... حتى على الفضائيات بقت شتايم الافلام فيها شتايم المسلسلات بقه كلها شتايم في شتايم وكلام قبيح .

مش بس كده. بعد ما خلاص شتمنا بعضنا والكل شتم في كلوو ... اتجهنا لتصدير الشتيمه الى الخارج ... ومسكنا من اول ملك لحد الامير. لغايت ما شتمنا رئيس اكبر دولة. فيكي يا عالم امريكا بذات نفسها .

والي يدحكني من كتر الشتايم. الي بقى الشعب بيشتمها ... ولاننا شعب كوميدي بطبعوا. يجي يقولك ايه ... يقولك لا المؤسسة الفلانية خط احمر ههههه طيب بقيت المؤسسات اشتم عادي. ولا اعمل ايه ... طيب اذا المؤسسة دي خط احمر طيب معليش اذا ممكن توضيح لبقيت الالواااان لباقي المؤسسات ... يعني المؤسسات اموو خط احمررر ابقو شاورولنا عليها وامو خط اخضر قلولنا عليها برضوا ...هههههه

فيه ايه ياااااا بلد يخرب بيوتكم كسفتونا قدام بقيت الدول العربية الشقيقة .... مره نشتم الجزائر. ومره نشتم قطر وهوبا اثيوبيا ومرة دخلنا على تركيا وهوبا امريكا وشوية ليبيا. ايه يا جماعه في ايه هو عيركم فلت خلاص ولا ايه .. ده حتى في النقاش على الفيس بوك. يجي واحد يحط بوست تبص تلاقي واحد تاني داخل. يشتم ويقول *<#?}﷼*?,[~\\>~[٪٪^[>#{{_,? حتى على اليوتيوب واحد منزل فيلم اجنبي بالترجمه تبص هوبا. شتايم في شتايم في شتايم

بس على اليوتيوب. الوضع بيختلف شوية لان الشتايم بتبقى دولية ... يعني السعودي يشتم المصري والمصري يشتم السعودي هوبا دخل واحد كويتي يفزع للسعودي هوبا يخش واحد سوري يدافع عن المصري. هوبا يخش واحد ليبي يشتم ابوهم كلهم .

المهم نرجع لموضوعنا حتى الان بيبقى الواحد ماشي بالعربية ويلاقي موتسيكلين ديلفري سايقين في نص الشارع وواخدينوا لحسابهم وده يشتم ده بالكلاكس والتاني يرد عليه التحيه باشتيم ألعن والعن بواسطة الكلاكس ... برضوا العادة دي في سواقين الميكروباصات يفضلوا طول ماهما سايقين. يسبوا ويشتموا في بعض بالكلاكسات .
والعادة دي انتقلت لسواقين التكاتيك ... بس سواقين التكاتيك اتطوروا طبعاً وعندهم. دلوقتي نغمات كلكسات غريبة عجيبة اشي صوت واحد بيدحك واشي صوت جمووسة بتنهق. واشي صوت جرس عجلة مع صوت الكلكس الاصلي ... وصوت عمال زي البطة كده تشمئز منوا النفوس ... فاكيد في عبقري اخترع جهاز تزبط انتا نغمة الشتيمة الي انتا عاوزها. وبمجرد ما تدوس علي زرار كلكس الشتيمه يشتم لوحدوا ... ياريت ياجماعه الي يعرف جهاز الشتيمه ده بيتباع فين ياريت يقولي ... حتى لو كان. سته نغمة بس ، مش مشكلة اهو بقيت الشتايم اعملها بايديا على الديريكسيون مانيول هههههههه

@@@@@@@@
وتحياتي

ملاحظة : الموضوع هزار اوعه حد يشتم ههههه