باتفق معاك 100%
و الشطارة انك تمسك في وظيفة في حتة محترمة حتى لو بمرتب قليل في بداية حياتك
ربنا يوفقك
الموضوع فعلا ياجماعة ليه حسابات اخري عند الشركات الكبيرة دي هما عارفين ان ليهم اسم في السوق وكونك تكون شغال في شركة كبيرة زي طلعت مصطفى او حازم حسن دي ليها تمن تاني غير المرتب بتاعك تماما وبالذات بالنسبة لحديثي التخرج (دي بتبقي امله بالنسبة لأي حد).
انا اول وظيفة اشتغلت فيها كان مرتبي 275 جنيه وزاد بعد 3 شهور بقي 500 وده كان تنازل رهيب من صاحب الشركة بس لانه لاقاني شاطرة في شغلي ومجتهدة فزودني بس هما المرتبات عموما عندهم تعبانة بعد كده اتنقلت من شركة للتانية والمرتب نما ببطء شديد لكن الحمد لله اتزبط ودلوقتي الشركات هي اللي بتتصل بيا وتقولي اروح اعمل انترفيو عندهم وانا اللي بسألهم ايه العرض بتاعكوا واشترط المرتب اللي يناسبني انا واحيانا برفض اروح الانترفيو من اصله لو العرض مش مغري عشان سنوات الخبرة عندي بقت حوالي 6 سنين وطبعا الكمبيوتر والانجليزي دول اساسي دلوقتي عند اي بتاع بطاطس حتي .
فمعلش انا لو كانت جتلي فرصة طلعت مصطفي دي اول ماتخرجت كنت هاوافق بدون تردد عشان الاسم والخبرة اللي هاتكتسبها من وراهم تساوي كتير وبعد كده انت اللي بتحدد تستمر معاهم بس يزودولك مرتبك بما يتناسب مع مجهودك وخبرتك او بتقولهم هامشي والف شركة تانية تتمناك وفي الغالب هما بيزودوك من نفسهم عشان خسارة الشركة للموظف اكبر بكتير من خسارة الموظف للشركة لانهم عشان يجيبوا حد جديد يقعدوا يدربوه من تاني ويصبروا علي اخطاؤه ويعرف اسرار الشركة لو موقع يسمح بده كل الحاجات دي لما بتتحسب عندهم بيلاقوا نفسهم خسرانين لو سابوك تمشي.
انت اللي بتثبت نفسك في المكان مش المكان هو اللي بيثبتك علي فكرة.
بس شوية صبر ياشباب ومعلش في البداية زي ماقل الاخوة اعتبر نفسك بتعمل دبلومة واصرف علي الوظيفة شوية.
انا روحت عملت مقابلة في حازم حسن قبل كده وطحنوني في الامتحان شفوي وتحريري و I Q وبتاع 5 انترفيو مثلا ونيلة لحد ماكنت هاعيط قعدت عندهم يومها من الساعة 10 او 11 الصبح لحد الاسعة 3 او 4 العصر بيمتحنوا فيا كإني هشتغل في السفارة مثلا ولا في منصب قيادي مهم.
والمرتب اللي عرضوه عليا مكنش وحش اويومكنش سوبر قوي برده بس انا قلتلهم ده مينفعش بالنسبة ليا قالولي ده بداية والمرتبات عندنا هنا بتزيد جامد ومتقلقيش من النقطة دي بس المشكلة ان مفيش ترقيات يعني هاتفضلي طول عمرك في نفس ال Position ده بس كنت مترددة والحمد لله الوظيفة اللي كنت فيها وقتها مديري زودلي مرتبي وخلاه زي مرتب حازم حسن وبعد كده زاد اكتر الحمد لله وكنت قلت صاحبتي بقي وقدمت هناك وقبلوها هي بتقولي المرتبات كويسة وبتتحسن واللمزيات كمان تأمين اجتماعي وتأمين طبي A class وباص يدويك ويجيبك وكده بس المناخ العام عامل زي الحكومة نظام اسفنة بقي ونفسنة وخليك في حالك واعمل اطرش وكده وفي ناس كانوا بيطفشوها اول ماتعينت هناك ولما كانت حامل وهاتولد مديرها كان عايز ينزلها حاجة اسمها Pool هي شرحتهالي ان ده مكان بيجمعوا فيه الناس التعبانة او اللي هايمشوهم وبيدولهم مرتبات تعبانة اوي 350 جنيه وكده عشان يطفشوهم يعني. بمعني اصح ياكلها لحم ويرموها عظم زي مابيقلوا والشغل عندهم فحت وردم وكانت بتنزل ايام سبت كمان تشتغل ومينفعش تقفل موبايلها بعد الشغل وجزاءات وحركات كده مالهش لازمة الصراحة خلتني احمد ربنا 100 مرة اني موافقتش علي عرضهم ده خصوصا ان مواعيدهم زبالة قال ايه المفروض اروح استني الاتوبيس الصبح في ميدان عبد المنعم رياض الساعة 7:30 يعني انزل من بيتي الساعة 6 مثلا ولا 6:30 بس هما ميزتهم برده انهم بيروحوا الساعة 4 او 4:30بس مش مهم كل ده اهم حاجة الراحة النفسية والتفاهم بينك وبين مديرك المباشر والمناخ العام اللي نشتغل فيه.
معلش طولت عليكم بس الموضوع فعلا مهم وانا حيكت تجربتي يمكن حد يستفيد منها.