الموضوع: العربية الخفيفة أحسن من العربية التقيلة!!! اتعرف على أساسيات ثبات السيارات

المشاركة الأصلية كتبت بواسطة aw2100

جازاك الله خيرا
كام نقطه للنقاش والتوضيح من وجهه نظرى المتواضعة ؟
*العربية الثقيلة معناها قوه الشاسية والصاج المصنعة منه العربية وده بيفرق فى الوزن بمعنى تخانه الصاج لما بيزيد السمك وقوة الصاج بيزيد الوزن طبعا بالأضافه لتصفيح اسفل العربية والأبواب وعمل قفص من الصلب حوالين كابينة الركاب وطبعا ده بيزود من وزن العربية وده بيبقى ملحوظ فى العربيات الألمانى و السويدى وبتفتقرة العربيات الكورى واليابانى علشان كده العربيات الألمانى والسويدى بتتفوق فى اختبارات الامان والتصادم وده اهم حاجة لمقتنى السيارة انك تبقى مطمئن على حياتك ومن معاك فى السيارة

*و بالنسبة لان الوزن لازم يبقى متوزع بالتساوي بين الأمام والخلف ومركز ثقل العربية كل العربيات الحديثة بينقلوا مركز توازن العربية للخلف اكتر من الأمام وبدليل كل العربيات الرياضية زى بورش وفيرارى وسيارات السباق بيحطوا الموتور فى الخلف علشان زيادة توازن العربية ونقل مركز الثقل للخلف وده برضة بالنسبة للعربيات الألمانى بيصمموا العربية بحيث يكون مركز الثقل للخلف اكثر من الأمام مش بالتساوى

* بالنسبة لعربيات الجر الأمامى
و الانعطاف الناقص بيبقى بالعكس!! بمعنى إنك لما تدخل الملف تلاقي العربية مكملة في طريق شبه مستقيم وما تلفش، وده بيحصل عادة في عربيات الجر الأمامي (على كبالن)، بسبب إن مركز الثقل ناحية الأمام.
بالعكس انا ركبت عربيات دفع خلفى وجر امامى العربية اللى بتمشى حسب وصف حضرتك وتقاوم الملفات دى الدفع الخلفى لكن الجر الأمامى بتلف بكل سهولة فى الملف دون ادنى مقاومة ومباتحسش انها عاوزة تكمل فى طريق مستقيم ابدا وبيبقى فية تحكم كامل فى الملفات ودليل على كده كل العربيات الحديثة جر امامى تحياتى !!

أهلا وسهلا بيك... وأشكرك إنك فتحت النقط دي للنقاش



بالنسبة للنقطة الأولى

أتفق معاك بالنسبة للسيارات السويدية إنها بتلجأ لاستخدام صاج أتخن كأسلوب من أساليب زيادة الأمان، وده فعلا بيزود وزن العربية

بس أختلف بالنسبة لباقي السيارات... يعني حاليا... الفرق ما بين العربيات الألمانية واليابانية والكورية ما بقاش كبير من ناحية الأمان، وده أساسا مش راجع لزيادة سمك الصاج في العربيات األمانية أو غيرها... إنما لاستخدام أساليب أكثر ذكاءا في تصميم جسم السيارة، وبالذات لما السيارة يتعمل فيها أجزاء ضعيفة عن قصد لامتصاص الصدمات

ممكن حضرتك ترجع للموضوع ده لمعلومات أكتر
http://www.nilemotors.net/Nile/328233-a.html


وحضرتك برضو ممكن ترجع لموقع euroncap.com لو عايز تقارن مستويات الأمان للسيارات في أوروبا

العربيات يابانية وكورية كتير واخدة تقييم عالي مقارنة بمعظم العربيات الأوروبية... وكمان مش كل السيارات الألمانية واخدة تقييم عالي

والموضوع مش راجع لكون العربية أكتر متانة... إنما أكثر أمانا... وهناك فرق




بالنسبة للنقطة التانية

موضوع توزيع الوزن بالتساوي ده شيء أساسي لتوازن وثبات مثالي، وكون إن العربيات الفيراري وغيرها من السيارات الرياضية مش مركبين الموتور في الأمام... فده مش معناه إنهم مركبينه في الخلف!!!

الحقيقة إنهم مركبين الموتور في المنتصف.... بين العجلات الأمامية والخلفية... وبيعملوا حساب وزن الركاب، بحيث إن التوزيع المثالي يحصل والعربية فيها ركاب (50% تقريبا على العجلات الأمامية، و50% تقريبا على العجلات الخلفية)

الاستثناء الوحيد من موضوع الموتور الخلفي حاليا هو في سيارات بورشه... هي الوحيدة في العالم حاليا (على حسب علمي) اللي بتركب مواتيرها في الخلف... يعني بعد العجلات الخلفية، وطول عمر بورشه مشهورة بموضوع الانعطاف الزائد (Oversteer) بسبب وجود الموتور في الخلف... وعلشان ما يحصلهاش الكلام ده .. بورشه حطت في كل عربياتها من منتصف التسعينات كمية من الأنظمة التكنولوجية تفوق أي عربية تانية في العالم... بحيث إن السائق ما بحسش بأي خلل في التماسك، وده اللي رفع مبيعاتها بشكل خرافي خلال الـ20 سنة الماضية




بالنسبة للنقطة الثالثة

الانعطاف الناقص ممكن يحصل في العربيات الدفع الخلفي... ومهياش حكر على الدفع الأمامي، ولكن الانعطاف الناقص دي ظاهرة معروفة عن كل سيارات الدفع الأمامي، وحاليا ممكن تكون الظاهرة دي قلت كتير بسبب وجود الأنظمة التكنولوجية اللي بتتحكم في أداء العربية في الملفات


إنما لو حصل وفصلنا كل الأنظمة التكنولوجية في سيارات الدفع الأمامي... من المؤكد إنك لو تقلت شوية على العربية وزودت سرعتك في أي ملف.. هيحصل انعطاف ناقص بكل تأكيد


أرجو إنك تراجع المشاركة رقم 5 ... فيها كلام كتير في الحتة دي



محتاج برضو أعرف من حضرتك نوع السيارات الدفع الأمامي والخلفي اللي حضرتك سقتهم وحكمت عليهم بالشكل ده... أكيد فيه فرق في الموديل وفئة السيارات أصلا

لو عايز تقارن صح... هات عربيتين يكونوا موديلاتهم قريبة... بمعنى إنهم متصنعين في فترة قريبة من بعض... وكمان يكونوا ليهم نفس القوة والحجم... وقولنا رأيك بعد كده


حضرتك ممكن تدور على النت على موضوع الـOversteer والـUndersteer ... أكيد هتلاقي كلامي زيهم