الموضوع: مشكله فى الشغل

الموضوع ده بيفكرني باللي حصل معايا في الشركة القديمة وقت الثورة
صاحب الشركة فجأة خفص الرواتب للثلث
رحنا بعض موظفين الشركة خصوصا القدامى عملنا اجتماع في غرفة الاجتماعات ومضينا على ورقة اعتراض ومطالبة بجدول زمني واضح لرجوع الرواتب وتخفيض ساعات العمل طبقا لتخفيض الراتب (مفيش رواتب يبقى مفيش شغل ده طبيعي)
المهم جه صاحب الشغل (فلسطيني صايع بجد) وقعد معانا زعقنا شوية وفي الاخر برضه كل اللي خدنا تعديل المواعيد
وبعدها في خلال 3 شهور كان كل موظف اتعمل معاه مشكلة وساب الشركة بس كانت كلها مشاكل فردية وكان متعمد لحد ماصفى كل الموظفين القدامى وساب مهندس الكمبيوتر وخلاه يشتغل بارت تايم
الاجمل ان كل اللي خرجو من الشركة رحنا عملنا محاضر وليه في المحاكم لحد الان من بداية فبراير 2011 والشركة اتصفت ومبقاش ليها وجود وراح صاحب الشركة عمل تغيير بسيط في اسم الشركة بحيث انه ينطق بنفس الطريقة القديمة وفتحها باسم مراته وخد توكيل عام منها (لعبة محاسب قانوني منه لله)
والناس اللي ليها حقوق عن الشركة دي تخبط راسها في الحيطة
انا واحد من الناس ليه فرق راتب مخصوم يعدي 10آلاف بالاضافة لمكافئة نهاية الخدمة عن 4 سنين انا كنت من تاني موظف في الشركة دي من بدايتها
بالمناسبة وقت ما عمل مشكلة معايا كنت لسه كاتب كتابي من 10 ايام وحسيته متعمد اذلالي في وقت محتاج فيه كل جنيه حسبي الله ونعم الوكيل


وفي الاخر ارجع واقول قانون العمل بتاعنا قانون ساكسونيا

ياااااه ..فكرتنى بزمان أيام ماكنا شباب

بص ياهندسة..انت كلامك مثالى وأخلاقى وانسانى وكل شىء ..بس مش فى مصر

فى مصر ده اسمه تحريض واضرار بصالح العمل .. وفيه حاجتين ضدك : قانون العمل .. والعمال نفسهم

قانون العمل مش حاينصفك ويوم ما حاتترفد وتروح مكتب العمل تشتكى ويروح مندوب للشركة حايتكرمش له 100 جنيه فى ايده وحايكتب أحلى تقرير ينصف الشركة

أما العمال فأحب أقول لك حاجة حاتعرفها مع الخبرة : احنا عندنا فى مصر أوسخ عمال وأوسخ مشرفين .. العامل بيكره الفنى والفنى بيكره الجروب ليدر والجروب ليدر بيكره الفورمان أو السوبرفايزر..وكلهم بيكرهوا المهندس وبيبصوا له على انه مجرد شاب أبوه وأمه صرفوا عليه شوية بس فى الأخر طلع مابيفهمش حاجة..بالذات لما يبقى - مع احترامى - حديث التخرج ومالوش خبرة
وعلى فكرة أكيد العمال عندك فيهم واحد أو أكتر فاتح خط مع صاحب الشركة وبيبلغه أول بأول كل حاجة بتحصل

فنصيحة من أخ كبير ماتخلليهمش يلعبوا بيك

وحاقول لك عن تجربتين واحدة حصلت معايا والتانية حصلت مع واحد زميلى:

1- أنا مرة كان فيه فنى شاطر كان اشتغل معايا فى مشروع ولما خلصته ورحت شركة تانية عينته بضعف مرتبه وكنت مديله وضعه بما يرضى الله .. جالى فى يوم كانت المرتبات متأخرة يعيط ويقول لى كتب كتابى كمان كام يوم وما معاييش فلوس والحكاية والرواية وأبوس ايدك وأبوس رجلك ..الخ...طبعا خدتنى الجلالة ورحت اتخانقت مع الحسابات وكلمت مدير الشركة ع الموبايل وزعقت واديتهم درس فى الأخلاق وقلت لهم لو الراجل ماقبضش فلوسه بكرة أنا مستقيل ... وتانى يوم مارحتش الشغل لوى دراع ..تالت يوم وأنا فى الطريق لقيت مدير شئون العاملين بيتصل بيا وبيقول لى ان استقالتى مقبولة...وعرفت بعدها انهم جابوا الواد وسألوه انت ليه بتشتكى قعد يحلف لهم انه ما اشتكاش وماجبش سيرة فلوس وانه مايعرفش أنا ليه عملت كده ..وقاللهم أنا فلوسى عندكم فى الحفظ والصون .. وتخيل ان الكلب ده لما اتصلت بيه أتأكد من الكلام ده ماردش عليا ولغاية النهارده ماعرفش عنه حاجة

2- واحد زميلى ودفعتى بعد التخرج بكام سنة اتعمل معاه نفس اللى بتحكيه بالمللى وهو عمل زيك بالمللى...تعرف ايه اللى حصل؟
صاحب الشركة رفده وقدم فيه شكوى فى النقابة وجاب 4 من العمال اللى كان بيدافع عنهم يشهدوا ضده..ولولا ان والده كان يعرف واسطة جامدة فى النقابة مكانش الموضوع اتلم

الخلاصة : نفض للعمال ياهندسة