الموضوع: معليش أنا أسف : بس أيه هيا تكاليف ومصاريف { المووت} !

المشاركة الأصلية كتبت بواسطة jam

مبدئيآ.. إحنا اللى بنغسل موتانا فى العيلة.. وبالنسبة لللكفن .. إبنى لما توفى كانت أول تجربة إنى أشترى الكفن بنفسى.. فا الكفن كان متر لإنه كان طفل صغير.. وكان فى حدود 20 جنيه.. يعنى بالنسبة للرجل البالغ هيكون فى حدود 3 متر يعنى ب 60 جنيه.. وبالنسبة للدفن.. برضه انا اللى دفنته بنفسى.. ربنا مايكتبها على حد... بس الراجل اللى بيدفن فى العادة ملهوش قيمة محددة... فيه اللى بيديله 40 وفيه اللى بيديله 50 و60... وفى ناس شفتها بتدفع 150... هوا مابيطلبش حاجة.. اللى فيه النصيب بياخده

بالنسبة لعربية نقل الموتى .. أنا معرفش بصراحة.. بس ساعات بشوف عربيات بتبقة وقف لله تعالى وبتكون مجانيه

أتمنى الدعاء إن إبنى يكون سبب لينا فى دخول الجنة وإن ربنا يعوضنا العوض الصالح

اللهم اجعله فرطا وذخرا لوالديه، وشفيعا مجابا، اللهم ثقل به موازينهما، وأعظم به أجورهما، وألحقه بصالح سلف المؤمنين، واجعله في كفالة إبراهيم عليه الصلاة والسلام، وقه برحمتك عذاب الجحيم

إنا لله وإنا اليه راجعون...

بدايه لو الواحد دخل العنايه لازم يدفع تأمين 4 الاف جنيه والليله بدون المستلزمات والأدويه بتكلف إقامه 1500 جنيه فى المتوسط....!

لو ربنا أذن بساعته فى المستشفى بيكون فى متطوعين من الأخوه السلفيين يقفوا معاك فى الغسل ولو مفيش ومتعرفش احكام الغسل وهتجيب حد بيتراضى مش بمبلغ محدد...حسب إمكانياتك من 50 ل 100

الكفن برضو بيتفاوت من 50 ل 150 ولو واحد مش مقتدر بيكون موجود فى المسجد مجانا للفقراء..

الحنوط والقطن وما شابه بيشتريه اللى بيغسل بمعرفته....

ترابيزه الغسل لو الوفاه مش فى المستشفى بتتجاب من المسجد مجانا..بتبقى وقف لله..ويفضل الألومنيوم اللى ليها أجناب زى حوض المطبخ كده..

سياره التكريم...لو انت عضى فى الجمعيه اللى السياره تابعه ليها بتكون مجانا او بمبلغ رمزى.
لو مش عضو بتبدأ من 120 جنيه وحسب المسافه...

السياره اللى بتجيبها للمعزيين (36 راكب) لمصاحبه المتوفى للمقابر لو هتسافر بيعتبره يوم شغل وبياخد 700 جنيه على الأقل..

فتح المدفن والتربى لو هتحتاج واحد هيكون فى المتوسط من 50 ل 150 حسب امكانياتك.

دار المناسبات من 150 جنيه ل 3000 جنيه حسب المكان والسعه ومستوى الخدمه (بارك للسيارات - بوفيه - سجاد........)ولو برضو عضو جمعيه بيبقى أقل من العادى.

المقرئ فى حدود 300 جنيه لو مش مشهور...

البوفيه ..لو مش تبع دار المناسبات بتجيبه من بتاع الفراشه...الشاى والسكر والقهوه والميه المعدنيه عليك والقهوجى والعده فى حدود من 150 ل 250 جنيه لو حاجه فخمه

أما تكلفه المدفن نفسه لو هتشترى مدفن بيبدأ من 18 الف لغايه 45 الف...

ولا اراكم الله مكروها فى عزيز لديكم...