الموضوع: تجربتي مع مصرف أبوظبي الإسلامي في تقسيط السيارات

السلام عليكم و رحمة الله و بركاته
صقور نيسان وحشتوني جدا ..
كنت حابب أحكي تجربتي مع مصرف أبو ظبي الوطني في أول سنة 2012.. و اسمعوا يا أحباب الحدوتة من أولها.
في أول يناير 2012 حبيت أمتلك سيارة نيسان و كنت محتار بين الصني و بين التيدا لحد ما ربنا وفقني و استقريت على التيدا 2012 هاتش باك أول فئة ب120 ألف.
طبعا ما كانش معايا سيولة نقدية غير 30 ألف جنيه لما سألت في توكيل أوتو إيجيبت قالولي انهم بيتعاملوا مع بنكين.. بنك إسلامي و هو مصرف أبوظبي الإسلامي و بنك ربوي و هو بنك BNP Paribas .
الفائدة مع البنك الإسلامي كانت تقريبا 9.5% و الفائدة مع البنك الربوي كانت تقريبا 6.7% !! تخيلوا ؟
و على الرغم من إن الفائدة عالية مع مصرف أبوظبي إلا إني توكلت على الله و استخرت الله و أخدت قرض مرابحة السيارة من مصرف أبو ظبي الإسلامي.
و بعد تقريبا 19 أو 20 قسط و 30 ألف جنيه مقدم.. حبيت أسدد باقي قيمة السيارة اللي انا لما حسبتها كنت متخيل انها هاتبقى من 50 ل 55 ألف بالكتير.. بس الغريب اني لما اتصلت بالبنك قالولي ان الباقي عليك 72500 جنيه.. و توكلت على الله و عملت طلب سداد معجل.
أفاجأ بأن المبلغ المطلوب 76000 جنيه.. بعد ما كانوا بيقولوا ان اقل من كده بحوالي 4500 جنيه !
و لما سألت موظف البنك قالي إن فرق المبلغ هو نسبة من الأرباح اللي كانت باقية من الفائدة الأصلية.. ما فهمتش بس دفعت علشان أخلص من موضوع الإقساط لأنه موضوع مؤلم و سخيف جدا خاصة لو بتدفع مبلغ كبير جدا كل شهر و حاسس انه التزام عليك.
و بكده التيدا أم 120 ألف جنيه وقفت عليا ب148 ألف و كسور.. و العوض على الله :)
الجانب الإيجابي من الموضوع .. ان موضوع التقسيط مع مصرف أبو ظبي الوطني و إجرائاته ما بتاخدش وقت ولا مجهود.. و الناس في البنك لطاف جدا و متعاونين إلى أقصى درجة..

لو حد عنده تجربة مشابهة مع بنوك تانية يا ريت ينبهنا علشان نفيد باقي الأعضاء..
أشكركم.. تحياتي.