صيانة وتظبيط الأوبترا ( زيوت - مساعدين - جنوط وكاوتش ) تقرير بالصور والأسعار

**Hosam_Optrawy** · 02-09-2013 05:24 AM

بسم الله الرحمن الرحيم

السلام عليكم ورحمة الله وبركاته

العربيه كانت محتاجه شوية حاجات عملتها على مدار شهر ونص تقريبا , نظرا لإنشغالى ولظروف البلد والحالة المرورية فى الفترة اللى فاتت

نبدأ أولا بالزيوت

الزيت كان محتاج يتغير لأنه بقاله حوالى سنه مع أنى مامشيتش عليه ألفين كيلو على بعض لأن معظم الوقت كانت العربيه مركونة

جبت فلتر الزيت من المنير فى أول فيصل ب 20 جنيه

وروحت غيرت الزيت فى بنزينة موبيل فى أخر الهرم , وأثناء التغيير العامل كشف على زيت الفرامل والباور وقاللى لازم يتغيروا وخصوصا الفرامل , وفعلا أنا ماغيرتهمش من ساعة ماجبت العربية

سعر الزيت موبيل-1 300 جنيه

زيت الفرامل DOT4 تمنه 55 جنيه

زيت الباور كان موجود عندى باقى لما غيرت زيت الفتيس

مع تربيط العفشه وتشحيمها

الأجمالى حوالى 390 جنيه غير سعر الفلتر 20 جنيه

نيجى للعفشه

كان عندى مساعد ضرب زيت من فتره وكنت محتار أجيب الأصلى ولا أجيب الأنواع التانيه زى مونرو وماندو و kyb , فى النهاية إستقريت على مونرو

دى صورة المساعد اللى جايب زيت والمساعد السليم

توكيل مونرو هو غبور إتصلت أسال على المساعدين قاللى مش موجودين لما يوصلوا هانكلمك , فات إسبوع ومكلمونيش إتصلت تانى قاللى وصلوا بس الموزع هشام لهيطه أخد الكميه كلها , وسعر الجوز الأمامى 560 جنيه

إتصلت بهشام لهيطه أساله قاللى موجودين وسعرهم 600 , وبعد يومين أخدت تاكسى وروحتله التوفيقيه لقيته بيقولى موجودين ب 650 !!! قولتله ليه ياعم هو كل يوم بيزيدوا ولا إيه , فى النهاية أخدتهم ب 600 الجوز ( سعر المساعدين الأصلى فى التوكيل 1400 جنيه )

وقبل ما أروح نزلت الكتالوج بتاع مونرو عشان أتاكد من موديل المساعدين وأرقامهم , وللعلم موديلات مونرو الجديده بقت صينى

وروحت ركبتهم فى مركز توب جير بتاع المهندس محمد فضالى فى فيصل , تكلفة التركيب 120 جنيه وخصم 10 جنيه يبقى الأجمالى 110 جنيه فقط لا غير ( مصنعية تغيير المساعدين فى التوكيل 165 جنيه شامل الضريبه )

المساعدين مش ناشفين خالص عكس ما كنت متوقع ومخليين تماسك العربيه أفضل

http://www.nilemotors.net/Nile/251299-a.html

أخيرا الجنوط والكاوتش

الكاوتش كان محتاج يتغير لأن إنتاجه فات عليه حوالى 5 سنين ومشيت عليه 40 الف كيلو , وكنت ناوى بالمره أجيب جنوط سبور 15 , كان نفسى أجيب الجنوط الأصلى بتاعتها بس كان لازم أنزل الحرفيين وأنا وحظى يا ألاقى حاجه كويسه يا مالاقيش

قرت أجيب جنوط جديده وكنت مجرب قبل كدا التايلاندى ماركة SSW وكانت كويسه , توكيلهم أشرفكو فى مدينة نصر , حاولت أجيب حاجه شبه الأصلى اللى بينزل بره وكانت بينزل فى الدايو لاسيتى ودا شكله

إتفرجت على الأشكال المتوفره حاليا وإستقريت على دا

سعر الطقم 2000 جنيه

محفور عليه من جوه رقم الموديل وبلد الصنع والمقاس والوزن والأبعاد وتاريخ الإنتاج

**Hosam_Optrawy** · 02-09-2013 05:25 AM

بعد كدا الكاوتش

سألت فى بريدجستون لقيت مفيش غير نوع واحد إسمه MY02 ومش يابانى تقريبا إندونيسى ومواصفاته مش حلوه يعنى ال Traction كان B وحاجات كدا وسعر الفرده 600 جنيه

قولت خلينا فى الكومهو والهانكوك , سألت عند أولاد على سليمان فى وادى النيل مالقتش عنده لا ده ولا ده , قاللى فى تويو يابانى , بصراحه الفرده ممتازه مواصفات وسعر , Traction AA وسرعه V و Made in Japan سعر الفرده 520 , إسم الموديل Proxes T1R , تاريخ إنتاجها 8/2012 يعتبر قديم شويه بس دا المتوفر حاليا

أخر مرحلة هى التركيب فى Fit&Fix بريدجستون الهرم

طبعا بعد كل دا أكيد هاحتاج أظبط زوايا , وقولت بالمره أركب الجنوط والكاوتش عندهم مارضتش أركبهم عند بتاع الكاوتش لأنى كمان ماكنتش لسه غيرت المساعدين , بس ياريتنى ماعملت كدا وكنت ركبت الجنوط والكاوتش فى بعض وركنتهم فى الشنطه لحد ما أغير المساعدين

الأسعار فى بردجستون بقت غاليه يا اما أنا اللى مش متابع بقى :) أخر مره روحتلهم ماكنتش الأسعار كدا

وغير كدا انا كنت جايب مع الجنوط صواميل سبور وبلوف سبور , العامل قعد يركب فى البلف الواحد ربع ساعه وفى الأخر قاللى أنصحك بلاش منه عشان ممكن ينفس قولتله اللى تشوفه

وأثناء التركيب كان فى صاموله مفوته فإتعافى عليها وربطها جامد قامت مبوظه المسمار :( إضطريت بعد كدا أشترى مسمار بصاموله ب 15 من عند المنير وركبتهم فى توب جير ب 20 جنيه

نيجى للفاتوره

10 جنيه بلف ألمانى * 4 = 40 جنيه

15 جنيه فك وتركيب الكاوتش * 4 = 60 جنيه

15 ترصيص سبور للعجله * 4 = 60 جنيه

30 جنيه نيتروجين

70 جنيه ظبط زوايا أمامى وخلفى

الإجمالى 260 جنيه !!!

طب ياجماعه مفيش خصم , ولا خصم نايل موتورز حتى دا الإستيكر أهو , قاللى لا والله إحنا حاليا موقفين كل الخصومات حتى لكل الشركات بس عشان الأحوال

إنتهى التقرير