الموضوع: مشكلة في الاتوماتيك

لى صديق حصلت له مشكله شبيهه بالمشكله اللى عندك بس كانت فى عربيه ماتركس

كان لما يجيى الفتيس ينقل من 3 الى 4 ما يرضى ينقل كان يقف ويبطل ويشغل تانى تشتغل
ودى العربيه التوكيل وكانت فى الضمان غيروا له سنسور فى الفتيس المسئول عن النقل واتحلت على طول

غالبا انت عندك نفس المشكله وحلها سهل وديها التوكيل وهم هيغيروا السنسور وترجع تمام زى الاول

أولا وقبل كل شئ راجع منسوب زيت الجير

زيت الجير يقاس كالآتى (هام جدا طريقة القياس لانها بتفرق كتير جدا):

فى الصباح والعربية باردة قبل ما تتحرك بيها نهائيا لأول مرة فى اليوم، دورها وانتظر حوالى 30 ثانية ، وبعدين خلى المحجرك داير دوس الفرامل وانقل الجير على كل الغيارات وبعدين رجعه على ال P ، وبعدين سيب المحرك داير وافتح الكبوت وارفع مقياس الزيت ونضفه بفوطة وحطه تانى لحد ما الكبس يبات مطرحه وبعدين ارفعه تانى، مفروض ان الزيت فى الحالة دى يكون بين الشطفتين اللى على المقاس

امشى بالعربية 5 دقائق(خمس دقائق فقط وليس اكثر، مهم جدا) ، خلى المحرك داير وكرر الخطوات السابقة(فرامل، كل الغيارات، P، نضف المقاس وخد قراية اثناء دوران المحرك)

لازم الزيت فى الحالة دى يكون فى حدود المنطقة المظللة بخطوط متقاطعة على المقاس

لا تقيس الزيت بعد مشوار طويل لأنه يدى قراية خاطئة، لا تقيس الزيت والمحرك مبطل لأنه هيدى قراية خاطئة، لا تقيس الزيت إلا بعد ان يكون الفتيس قد مر على جميع الغيارات وتركته بعدها على ال P

لو الزيت ناقص زوده (مش اكتر من 200 مللى فى المرة الواحدة) باستخدام قمع من فتحة القياس، استعمل زيت Atf شل او موبيل درجة ديكسيرون I I I (لا تستعمل ديكسيرون I I)

لو الزيت مظبوط انصحك بمراجعة التوكيل وخليهم يراجعولك على ظبط ال Tps بتاع الموتور ، او حساس الضغط بتاع الفتيس ويراجعولك على مقاومة الدروب

لو العيب مش فى الحاجات دى (وان شاء الله يكون فيها) يبقى ممكن يستلزم الأمر فك الفتيس ومراجعة القربة والبلوف