تجربة مريرة في تغير الجنوط و الكاوتش (للاستفادة)

انا هعرض عليكم رحلة عذاب لتغير جنوط و كاوتش العربية لاستفادة اعضاء المنتدي منها حتي لا يتعرض احد للنصب الذي تعرضت له و نخش في الموضوع,

انا معايا فيرنا 2007 راكب فيها جنط 13 بوصة و كاوتش 13/70/175 و حان وقت تغير الكاوتش عشان جاب اخره المهم زي ما سمعت من الاعضاء انه يفضل تركيب جنط 14 عشان تحسين الثبات و الفرامل و بالنسبة لي هيعلي العربية شوية عن الاول .
لو جبت الجنوط الاسبور مع الكاوتش الجديد الموضوع هيعد معايا فلوس جامد قولت اجيب 4 جنوط حديد استيراد و اربع فرد كاوتش جديد تبقي العملية حنينة شوية.و بدات رحلة البحث نزلت احمد سعيد اسال علي جنوط حديد 14 بوصة ملقتش خالص غير واحد عنده فردة واحدة بس , قولت انزل الحرفيين روحت الحرفيين و قعدت اسال في محلات كتير برده اللي يقول لي عندي فردة واحدة او يقول لي مفيش , المهم ملقتش غير واحد عنده 4 جنوط و قال لي دول بتوع هيونداي فيرنا و فعلا الجنوط محفور عليها علامة هيونداي و رقم et و كل حاجة
(بالمناسبة انا قريت تحذيرات الاعضاء انك لازم تشوف رقم et و الافست و غيره بس انا لما بصيت علي الجنوط ال 13 اللي راكبة عندي ملقتش مكتوب عليها اي حاجة) طب اتاكد ازاي ان الجنوط دي تنفع تركب و نظرا لمعرفتي المحدودة خليت الراجل فك فردة من الراكبين و جربت مكانها ال 4 جنوط ال 14 لقيتهم داخلين في السرة و الاربع مسامير بتوع الطنبورة مظبوطين مع الجنوط , قولت يبقي تمام كده ...استمريت في التفاوض في سعر الجنط بدا الكلام ب 150 ج للجنط الواحد و طبعا عارف انه بيستهبل نزلت معاه ل 125 ج و عارف برده ان كده غالي و بيستعبطني بس بصراحة كنت عايز اخلص و دفعت 500ج في 4 جنوط .

اخدت الجنوط في العربية و طلعت بيها علي احمد سعيد عشان اركب عليها كاوتش 14/60/185 زي ما اوصي الكاتالوج و الاعضاء الكرام كنت عايز اركب يوكوهاما c drive من عند صبرة لقيت الفردة ب 570 ج ياباني و طبعا الميزانية شخرمت و لا تسمح بهذا السعر روحت عند موزع معتمد هانكوك في احمد سعيد برده قالي الفردة 14/60/185 ب 460 ج حاولت انزل معاه و لو 10ج في الفردة مرضيش فارتضيت بالامر الواقع و توكلت علي الله و ابتدوا يركبوا الكاوتش علي الجنوط اللي انا جايبها و كانت الطامة في اول جنطين .........................

اول جنط بالصلاة علي النبي الواد بعد ما ركب الكاوتش و بيرصص قالي الجنط ده ملووح و مش هينفع هو عامل حادثة والا ايه فرديت عليه قولت له انا لسة شاريه دلوقتي من الحرفيين و قالي الثاني برده في لوحة بسيطة بس ممكن يمشي معاك .......طب ايه العمل ؟؟؟؟؟قالي تتصرف و تغير الجنط الملووح ده لحد ما نركب الفردتين التانين ......لفحت الجنط في عز الحر و قعد الف في احمد سعيد علي اساس ابدله من اي حد وادفع فرق ..لقت واحد عنده جنط واحد 14 فح.كيت له القصة و قولت له ندخل ده في ده و ادفع فرق و فهمته ان الجنط اللي معايا ملووح و فيه عاوجة قالي ماشي تدفع 100ج فرق و تسيب الجنط اللي معاك!!!!!!! قولت له ازاي اذا كان انا دافع في اللي معايا 125 ج اسيبه لك و اديلك 100 ج كمان عشان ابدله ؟؟؟؟؟قالي اخر كلام 90ج (قمة الاستغلال) المهم انا مضطر فوافقت مضطر ...

اخدت الجنط المستبدل و رجعت لبتاع الكاوتش مرة اخري و كانت الطامة الكبري الاخري .....قالي الفردتين التانين مش عايزين يركبوا مقاسها مش مظبوط !!و المسامير مش عايزة تربط بتلف علي الفاضي !!!!(مش عارف ازاي وانا قايسهم عند الرجل الاربع فرد علي الطنبورة !!!مش عارف

طب ايه العمل؟؟؟؟؟؟؟بتاع الكاوتش قالي مفيش قدامك غير انك تحتفظ ب الاربع فرد لحد ما تجيب جنوط جداد 14 و تبقي تركبهم و تروح ترجع الجنوط اللي انت جايبهم دول...طبعا انا مش هينفع معايا الحل ده عشان مش لسة هلف علي جنوط تاني .قولت له خلاص انا هركب كاوتش علي نفس مقاس العربية الاصلي علي الجنوط اللي راكبة فيها 13/70/175 ...قالي مينفعش ارجع الكاوتش بعد ما اتفك من الغلاف بتاعه و ركب علي الجنط و اترصص .....اتحايلت عليه يا عم يهديك يرضيك انا واقع في مشكلة ساعدني في حلها .....المهم بعد محايلة و جدال طويللللللللللللل وافقو يغيروا الكاوتش و يركبوا علي الجنوط الاصلي 13/70/175 لكن بعد خصم 100ج من تمن ال 4 فرد 14/60/185اللي اتفكو و اتركبوا علي الجنوط المضروبة اللي انا جايبها بحجة فك غلاف الكاوتش و تركيبهم علي الجنوط و ترصيصهم(نصب علني) و الله مش مسامح ...

المهم ركبت الكاوتش علي الجنوط ال 13 و زيادة علي تمنهم ال 100 ج اياها و روحت اخدت ال 90 ج من الراجل بتاع احمد سعيد و رجعت الجنط اللي بدلته معاه ثم ...........النهاية رجعت تاني الحرفيين و رجعت ال 4 جنوط و اخدت ال 500 ج ثمنهم ...و قولت له الجنوط فيها مشكلة و ملوحة و مش نافعة قال لي "نهارك ابيض "" !!!!!!!!!!!!
و دي كانت قصتي المريرة مع شوية نصابين و حرامية

خط سير القصة

6 اكتوبر .......الحرفيين........احمد سعيد العباسية .........الحرفيين .........6 اكتوبر
مع صراع مع الوقت وسط زحام القاهرة من اجل استرجاع فلوسي قبل الحظر و العودة الي المنزل

.....النهاية و اسف للاطالة......لكنها للاستفادة

من اﻵخر يا صديقي المواطن
لا تلومن إلا نفسك
أولا لو معكش فلوس ونفسك في حاجة يبقه تجيب صندوق أو حصالة صغيرة وتقعد تحوش
ثانيا فيه حد يغير جنط من 13 يروح.يركب نمرة زيادة 14 بقليله 16 أو 15 وهذا أيضا رخيص وأضعف اﻹيمان
ثالثا هل عمرك سمغت حد في حياتك لسه بيشتري جنط حديد ده اﻷربع جنوط حديد الناس بتدلل عليها ب 100 أو 200 جنيه
رابعا الراجل بتاع الكاوتش اللي فكلك اللزق وركب الكاوتش ووافق إن هو يرجغهم ويخسر 100 جنيه بس فده راجل محترم وإبن ناس ﻷن أي حد مش حيرضى يشتري كاوتش متركب ومتشال حتى لو.مرة واحدة ثم يا راجل يا طيب إنت كل فلوسك رجعتلك فزعلان ليه زعلان عالمشوار متزعلش ﻷنك خدت خبرة وفايدة وتاني مرة.حتوزنها صح وربي يوفقك ويدلك لما هو اﻷصلح لك ودمتم للنضال بسمع مشكلتك وتبقه نفسي كل مشاكلنا بسيطة وميسرة إحنه بتوع التعديل زي مشكلتك ده إحنه بنجيب جنط ونقعد نعمل فلنشات ونغير أماكن مسامير ونقص رفرف ونبطن فيبر وكاوتش مفيش مقاس نجيب من بره ومتقولش إحنه معانا وإنت معاكش لا كلو ماشي بنظام الحصالة معناش النهارده منعملش بس نحط خطة ونقعد نحوش

أنا أكتر حاجة زعلت عشانك فيها هي إنك رجعت وركبت 13 وأنا من وجهة نظري إن ال 13 كاوتش مهزلة وحرام يتدفع فيه حتى لو 50 جنيه ربنا يعوضك عن كسرة نفسك والمرة الجايه تركب 16 وتفرج عليك من وسع ودمتم للنضال

على فكرة الجديد مش غالى

معلومة لحضرتك الجنط فاضى بتكشف علية وتعرف مللوح من غير مايركب علية الكاوتش بانك تربطة على ماكينة الترصيص وهو فاضى لو فية لوحة بيبان او بتربطة على مخرطة عند الخراط ومبروك على الكاوتش الجديد انصحك من دلوقتى لو عاوز تغير ل 14 تبدء تدور من دلوقتى براحتك وتفاصل وتجرب مش لما الكاوتش يخلص وتتزنق وبعدين شيل الجنوط لما تحب تغير الكاوتش فى الوقت اللى يعجبك تحياتى !!

اقتباس:

---

المشاركة الأصلية كتبت بواسطة saddam

من اﻵخر يا صديقي المواطن
لا تلومن إلا نفسك
أولا لو معكش فلوس ونفسك في حاجة يبقه تجيب صندوق أو حصالة صغيرة وتقعد تحوش
ثانيا فيه حد يغير جنط من 13 يروح.يركب نمرة زيادة 14 بقليله 16 أو 15 وهذا أيضا رخيص وأضعف اﻹيمان
ثالثا هل عمرك سمغت حد في حياتك لسه بيشتري جنط حديد ده اﻷربع جنوط حديد الناس بتدلل عليها ب 100 أو 200 جنيه
رابعا الراجل بتاع الكاوتش اللي فكلك اللزق وركب الكاوتش ووافق إن هو يرجغهم ويخسر 100 جنيه بس فده راجل محترم وإبن ناس ﻷن أي حد مش حيرضى يشتري كاوتش متركب ومتشال حتى لو.مرة واحدة ثم يا راجل يا طيب إنت كل فلوسك رجعتلك فزعلان ليه زعلان عالمشوار متزعلش ﻷنك خدت خبرة وفايدة وتاني مرة.حتوزنها صح وربي يوفقك ويدلك لما هو اﻷصلح لك ودمتم للنضال بسمع مشكلتك وتبقه نفسي كل مشاكلنا بسيطة وميسرة إحنه بتوع التعديل زي مشكلتك ده إحنه بنجيب جنط ونقعد نعمل فلنشات ونغير أماكن مسامير ونقص رفرف ونبطن فيبر وكاوتش مفيش مقاس نجيب من بره ومتقولش إحنه معانا وإنت معاكش لا كلو ماشي بنظام الحصالة معناش النهارده منعملش بس نحط خطة ونقعد نحوش

أنا أكتر حاجة زعلت عشانك فيها هي إنك رجعت وركبت 13 وأنا من وجهة نظري إن ال 13 كاوتش مهزلة وحرام يتدفع فيه حتى لو 50 جنيه ربنا يعوضك عن كسرة نفسك والمرة الجايه تركب 16 وتفرج عليك من وسع ودمتم للنضال

---

صديقي اللي بتقوله كلام معروف لكن للضرورة احكام
اولا :- موضوع الحصالة ده مينفعش عشان زي ما قولت ان الكاوتش جاب اخره و لازم يتغير و مينفعش اسيبه كده .

ثانيا:- الجنط ال 14 هو الموصي به في كاتالوج العربية علي مقاس كاوتش 14/60/185 يعني مش عايز افتي من عندي بحاجة تانية غير كده

ثالثا:-لو عندك 4 جنوط 14 زي ما بتقول ب 100ج هاتهم و اشتريهم منك مش ب 100ج لا ب 200 ج

رابعا:- الراجل بتاع الكاوتش استغل زنقتي اصل موضوع فك غلاف الكاوتش ده مش هيغلب فيه ممكن بغلفه تاني هو معملش معايا واجب يعني ده حرامي و استغلالي و هو مش هيخسر نفسه لو عارف ان في خسارة عليه مكنش وافق بدليل ان العيال الصنايعية اللي عنده في المحل و الله و الله بيقولي بيني و بينهم انت ليه سيبت له 100ج دول هياخدوها في كرشهم حرام عليهم و قعدوا يقولولي متسيبش الكاوتش القديم بتاعك خدوا معاك "و شهد شاهد من اهلهم"

خامسا:- الكاوتش ال 13 مفهوش مشاكل بدليل انه بينزل مع العربية و مع انواع كتيرة مش فيرنا بس . بس انا كل مشكلتي اني كنت عايز العربية تعلي شوية.
و شكرا لمرورك

اقتباس:

---

المشاركة الأصلية كتبت بواسطة amr_aswany

صديقي اللي بتقوله كلام معروف لكن للضرورة احكام
اولا :- موضوع الحصالة ده مينفعش عشان زي ما قولت ان الكاوتش جاب اخره و لازم يتغير و مينفعش اسيبه كده .

ثانيا:- الجنط ال 14 هو الموصي به في كاتالوج العربية علي مقاس كاوتش 14/60/185 يعني مش عايز افتي من عندي بحاجة تانية غير كده

ثالثا:-لو عندك 4 جنوط 14 زي ما بتقول ب 100ج هاتهم و اشتريهم منك مش ب 100ج لا ب 200 ج

رابعا:- الراجل بتاع الكاوتش استغل زنقتي اصل موضوع فك غلاف الكاوتش ده مش هيغلب فيه ممكن بغلفه تاني هو معملش معايا واجب يعني ده حرامي و استغلالي و هو مش هيخسر نفسه لو عارف ان في خسارة عليه مكنش وافق بدليل ان العيال الصنايعية اللي عنده في المحل و الله و الله بيقولي بيني و بينهم انت ليه سيبت له 100ج دول هياخدوها في كرشهم حرام عليهم و قعدوا يقولولي متسيبش الكاوتش القديم بتاعك خدوا معاك "و شهد شاهد من اهلهم"

خامسا:- الكاوتش ال 13 مفهوش مشاكل بدليل انه بينزل مع العربية و مع انواع كتيرة مش فيرنا بس . بس انا كل مشكلتي اني كنت عايز العربية تعلي شوية.
و شكرا لمرورك

---

اﻷخ الطيب العزيز مش حعلق على كلامك ﻷنك يبدولي شخصية محترمة بس كتير من مفاهيمك غلط وإنته بقرائتك المستمرة لمواصيع المنتدى وتجارب الزملاء وكمان تكبر كام سنة حتغير مفاهيم كتيرة أولها موضوع الكاوتش ال 13 واللي بتوصي فيه الصانع ودمتم وتقبل مروري بس معلش ركب كاوتش 15 أو 16 وإرجع وإديني رأيك بال 13 أما سؤالك عن عندي جنوط حديد فللأمانة عندي أكتر من 24 جنط من العربيات القديمة اللي بشتريها وبغير جنوط طبعا ﻷن لا قيمة ﻷي تعديل في أبسط سيارة من غير تغيير الجنوط بس أنا رغم إن حالتهم مش حلوة بس أنا عندي طبع من زمان مبحبش أبيع أي حاجة حتى لو بطارية تعبانة بحب أكوم حاجتي القديمة في مخزن عشان أشوف أد إيه غيرت حاجات في حياتي لعربياتي ودمتم ولكن ثق وإعتقد ثمن اﻷربع جنوط حديد من 100 إلى 200 وإسأل اﻷخوة في المنتدى ودمتم

انا عوز اغير الكاوتش بس مستى زى حضرتك اجيب جنوط 14 و سعر الجنط الواحد بى 150 فى شبرا ممكن اعرف رايك ايه فى الكاوتش الهانكوك او الكمهو