مشكله فى المرور

**amz2011** · 04-09-2013 01:27 AM

المشكله باختصار ان عربيتى كانت باسم والدى المهم جيه عملى نقل ملكيه و العربيه كانت تبع مرور العجوزة ولما اتنقلت باسمى اصبحت تبع مرور فيصل المهم لما اتنقلت تبع مرور فيصل اخدت نمر جديده المهم جيت فى مره استعلم على المخلفات لاقيت رساله طلعت ليا بتقول بيانات المركبه غيرمسجله على النظام وللاستفاده من الخدمات الإكترونية برجاء التوجه الى نيابه المرور و احضار اصل الرخصه واصل اثبات الشخصيه و ايصال استلام النمر و طبعا الايصال داه مش معايا المهم قولت مش مشكله ابقى استعلام عن المخلفات لما اروح اجدد .المشكله بقى فى ايه انى لما سجلت فى موضوع كروت البنزين لقيت رساله بتقولى لما ضغط على متابعة حاله التسجيل و هى ؤيانات المركبه غير موجوده بالنظام.

هل فى حد عنده نفس الحوار الى عندى ؟ وبعدين هو حوار كروت البنزين داه هيتم بجد ولا ايه؟.
انا اسف على الاطالة.

**amz2011** · 04-09-2013 01:34 AM

++++

**zoma ahmed** · 04-09-2013 02:51 AM

مش عارف اقولك ايه الصراحة حصلت معايا نفس المشكلة دي بس مش في عربية
انا بسافر برا مصر مرتين في السنة وكل مرة اسافر لازم اطلع من التجنيد تصريح سفر واخر مرة جيت اطلعو قالي انت مش موجود على السيستم :d :d نعم مش موجود على السيستم ؟؟؟!!! دنا طلعت التصريح الف مرة من هنا يا عم الحاج ... يقولي انت مش موجود روح اتسنن وطلع بطاقة من جديد وطبعا كانت ايام سودة ربنا ما يعودها وهيا دي بلدنا واحد عايش بقالو 22 سنة ومعاه بطاقة ورخصة وكارنيه جامعة وجواز سفر ومطلع التصريح الف مرة وفي الاخر يقولي انت مش موجود على السيستم تخيل انت بقى رد الفعل مني كان عامل ازاي
واسف اني دخلتك في موضوع تاني

**lidosasa** · 04-09-2013 10:35 AM

توزيع البنزين بالكروت لازم يتم سواء دلوقتى أوبعد فترة لآنه الحل الوحيد لتوفير 30 مليار جنيه تمن مواد بترولية مدعومة يتم تهريبها ( أسمع إن معظم الصيادين فى مدن ساحل البحر الأبيض بيبعوا سولار للسفن فى البحر أكسب لهم من الصيد )
والمشكلة إن فى مصر لما تنقل من مرور لمرور تانى بتاخد وقت طويل ووارد جداً إن بياناتك الإلكترونية اللى موجودة على موقع توزيع الكروت غير محدثة ممكن تبعت رسالة إلى القائمين على الموقع أو تحاول الإتصال بالشركة المنفذة للمشروع وتشرح ليهم الوضع وأكيد حتوصل معاهم لحل بإذن الله

**amz2011** · 04-09-2013 12:36 PM

على فكره انا روحت البيت و دورت على صوره للرخصه القديمه و دخلت بياناتها لاقيت النمر مش عليها اى مخلفات الحمد لله بوادر خير

**mem** · 04-09-2013 01:48 PM

فى شركه اسمها بسيطه
بتخلص الاوراق الحكوميه بدون توكيل
بس مش عارف بتتعامل مع المرور ولا لا
ممكن تتصل بيهم وده ارقامهم
01099000800
01220020000

**amz2011** · 04-09-2013 05:58 PM

المشاركة الأصلية كتبت بواسطة mem

فى شركه اسمها بسيطه
بتخلص الاوراق الحكوميه بدون توكيل
بس مش عارف بتتعامل مع المرور ولا لا
ممكن تتصل بيهم وده ارقامهم
01099000800
01220020000

كلمتهم و قالى انهم مش بيشتغلو فى رخص السيارات ولا مع المرور

**amz2011** · 04-09-2013 06:00 PM

المشاركة الأصلية كتبت بواسطة amz2011

انا رحت نيابه مرور فيصل و طبعا طوابير بالهبل و محدش عايز يسمع حد كا العاده
البلد ديه عمرها ما هتتغير الموظف تكلمه تلاقيه بيرد بقرف و مش عايز يبص فى وشى اصلا و تساله ميردش و القصه الزفت بتاعه المرور
المهم رحت سئالت و حكيت القصه بتاعتى لاقيت الموظف بيقولى طلع شهادة بيانات بالنمر القديمه بتاعت العربيه اللى هى منتهيا من سنه 8/2011 و طبعا ديه مش معايا المهم
انا زهقت روحت سيبتهم و مشيت.
هو مفيش مكاتب تقوم بالموضوع داه.

هو انا المفروض اطلع شهاده بيانات من المروربتاع الرخصه القديمه اللى هو بتاع العجوزة ولا من مرور فيصل