الموضوع: الكاوتش اهم واخطر جزء فى السياره

الكاوتش اهم واخطر جزء فى السياره
الكاوتش اهم واخطر جزء فى السياره وتقريباٌ 70 % من حوادث السيارات سببها مشاكل فى الكاوتش وده لأنه الجزء الوحيد من السياره اللى متصل بالأرض
ولخطورة وأهميه الكاوتش حبيت اعمل موضوع بسيط اوى عن ازاى تنقى كاوتش جديد وازاى يكون مناسب لسيارتك ويرفع من آدائها ( تماسك على الطريق , مسافة توقف , اتزان ) مش يقلل منه
اكيد قبل كل شىء لازم نلتزم بالمقاسات اللى مقررها صانع السياره ليها ودى بتبقى موجوده على آيم السياره بتاع السواق او فى درج التابلوه او فى غطاء تانك البنزين الخارجى من جوه وطبعاٌ موجوده فى الكاتلوج الخاص بالسياره

طبعاٌ كلنا عارفين ان اللعب فى المقاسات بيؤدى الى خلل كبير فى آداء السياره وايضاٌ فى قرائات العدادات والأهم من كده بيخل آداء الفرامل وكمان بيفرق فى استهلاك البنزين
بس اذاى الكلام ده
لو فرضنا ان مقاس العربيه الآصلى 1856014
لو حبينا نغير هنلتزم بالمقاس
طيب لو غيرنا وجبنا مقاس 1956014 ايه اللى يحصل
اولاٌ ارتفاع العربيه الأجمالى هيزيد 0.6 سم
ثانياٌ قارية العدادات هتختل يعنى لما العداد يقرا سرعتك 100 كيلو هتكون سرعتك الحقيقيه 105 تقريباٌ
طيب لو حبينا نعمل UP GRADE للعربيه
يعنى هنفترض ان مقاس العربيه الأصلى 1757013 زى اغلب العربيات ( فيرنا , لانوس ) وهنغير جنوط نحط مقاس كام
اولاٌ 1856014 وده متوازن آداء معقول وراحه معقوله فى المشى
ثانياٌ 1955015 وده زياده آداء وناقص راحه بس ماشى الحال
ثالثا 2054016 وده غير مقبول وخاصه مع شوارعنا الجميله
يعنى نحاول دايماٌ ان ارتفاع جانب الأطار ميقلش بأى حال من الأحوال عن 10 سم
طيب كتير هيقولى تأثير الجنوط ايه على العفشه
وهل فيها ضرر ؟
ممكن واحد مركب مقاس 1955015 والعفشه معاه ممتازه ومفيش اى مشكله
وواحد تانى مركب نفس المقاس وتلاقيه كل يوم بيربط فى العفشه والدنيا بايظه معاه والكاوتش بيحك فى الفجاوى اللى وراه مع اى مطب
ايه الفرق ؟
الفرق هنا فى الرقم السحرى ال ET
ما هو ال ET ؟؟؟
هو الرقم الذى يبين خروج ودخول الجنط من جسم السياره
ومدى التحرك الآمن لينا مع تركيب الجنط السبور هو ( – 10 )
يعنى لو الجنط الأصلى رقم ال ET ليه هو 49 ( دايو لانوس )
يبقى ممكن نركب جنط اسبور رقم ال ET ليه 39 بحد اقصى
وده معناه الجنط والكاوتش خرجوا بره 10 مم او 1 سم
غير كده العفشه هتزعل وانت كمان هتزعل
الصوره دى بتوضح مكان الرقم فى الجنط الحديد الأصلى للسياره

والصوره دى بتوضح مكانه فى الجنط الأسبور

علشان نفهم اكتر هنبص على الصوره الجايه
> اللى هتوضحلنا كل الرموز اللى بتبقى على الكاوتش وبعدين هنتكلم على اللى يهمنا منها بالترتيب
فيه رموز مش هذكرها لعدم اهميتها للمستخدم العادى
اولاٌ
تاريخ الأنتاج
فرضاٌ فى الصوره مكتوب 4807
يعنى الأسبوع ال 48 من سنة 2007
48 4 = 12 يعنى الكاوتش ده انتاج شهر 12 سنة 2007
مهم اوى يكون انتاج حديث يعنى نفس سنة الأستخدام
وده لأن الكاوتش يفسد بعد 5 سنين من انتاجه حتى لو لم يستخدم
ويفضل تغييره بعد استخدامه لمسافه 50 الف كيلو مع الحفاظ على تبديل مكان الكاوتش فى العربيه كل 10 آلاف كيلو بطريقة المقص ( نبدل ورا يمين مع قدام شمال والعكس )
طبعاٌ ماركة الكاوتش فارقه كتير بس الأهم من الماركه معاملات الآداء الخاصه بالماركه
يعنى ايه الكلام ده ؟
يعنى مثلاٌ الجوديير من اعرق الماركات العالميه فى الكاوتش والكومهو اقل منها فى الشهره واكيد فى الأسعار تقريباٌ نصف السعر
بس مثلاٌ ال Kumho Ecsta SPT (KU31) بمعاملات آداء ( تماسك tracion AA ومعامل سرعه V )

اعلى بمراحل من الجوديير GT3 بمعاملات آداء tracion A و معامل سرعه T
نفهم من الكلام ده ان اهم معاملين آداء نبص عليهم فى الكاوتش الجديد ال TRACION و معامل السرعه
الصوره بالأعلى موضحه كل رمز سرعه بيدل على سرعه كام
مثلاٌ الرمز V بيدل على سرعه 240 كيلو فى الساعه ودى اعلى سرعه ممكن الكاوتش يتحملها ولفتره قصيره
لذلك انا بفضل اجيب رمز سرعه عالى لأن كل ما زاد معامل السرعه زادت قوة بنية الأطار
اكيد طبعاٌ نقشة الأطار بتفرق
يعنى فى اطارات شتوى و اخرى صيفى واخرى كل المواسم
دى صورة نقشة اطار كل المواسم

ودى صورة نقشة اطار صيفى والفرده دى تحديداٌ انا بفضلها

طبعاٌ احنا بيناسبنا الصيفى اكتر
هنيجى بقى للتركيب على الجنط وده اهم جزء
اى كاوتش جديد عليه علامتين حمراء وصفراء

واختلف الآطباء فى معناهم وفائدتهم فى التركيب
بعد البحث والفحص والتمحيص توصلت الى الآتى
العلامه الحمراء

فى الكاوتش الجديد بتدل على اعلى نقطه فى دوران فردة الكاوتش لأننا عارفين ان مهما كانت جودة صناعه الفرده مش هتبقى بدوران مستوى 100 % لازم يبقى فيها بيضاويه سنه بسيطه اعلى نقطه فى البيضاويه دى بيحددوا مكانها بنقطه حمراء
where the tyre’s high spot is. Manufacturers typically mark this point with a red dot on the tyre sidewall
يقابل العلامه الحمراء دى نقطه مفحوره فى الجنط بتدل على اوطى نقطه فى دوران الجنط وطبعاٌ لما بنظبط الأتنين على بعض بناخد دوران مكتمل ممتاز وده بيريح جامد اوى فى مشى العربيه

العلامه على الجنط مش بتبقى موجوده الا على الجنوط الآصلى و الجنوط الأسبور النضيفه بس ( تيوانى و بعض الأندونيسى ) لايوجد على الجنوط الصينى اى علامات

اما العلامه الصفراء
العلامه الصفراء على الكاوتش الجديد بتدل على اخف نقطه فى ترصيص الفرده بدون جنط ودى لما بنركب بنظبطها مقابله لمكان البلف فى الجنط لأن مكان البلف هو اتقل نقطه فى داير الجنط لو رصصناه بدون كاوتش
> corresponding to the light spot. Typically this is a yellow dot
طيب لما نلاقى الكاوتش الجديد فيه العلامتين الآولويه لمين فى التركيب ؟
العلامه الآهم فى التركيب هى العلامه الحمراء
اما فى حالة عدم وجودها
فنظبط العلامه الصفراء على البلف وبس
ارجو يكون الموضوع اعجبكم وافادكم
ودة لينك الموضوع بالصور ولا تنسونا من دعائكم
كل شيئ عن كاوتش السيارة بالصور والأرقام | أخبار السيارات | بوابة الأجيال الحرة

موضوع جميل جدا و مهم جدا

عايز بس اشير لضرورة و أهمية تبديل الاطارات rotation كل 10,000 كم
أزاي ؟
الصورة دي بتشرح طرق التبديل :

طيب ليه التبديل :

معروف أن معدل التأكل للأطارات بيكون أعلي مايمكن في الاطارات الامامية نتيجة لتعرضها للدوران يمين أو يسار

لكن لو تم التبديل في موعده و بطريقة صحيحة و دورية هايكون معدل التأكل متساوي لجميع الاطارات


باقي ان اشير لشئ مهم جدا و هو أن موعد تغيير الاطارات كل 40,000 كم غير دقيق بنسبة 100 %

- يجب قياس الاطارات (معدل التاكل) بشكل دوري و في حالة تجاوز التأكل النسب المحددة للأطار يتم تغييره فورا دون التقيد بعدد الكيلومترات أو مدة الثلاث سنوات
و ذلك قد يرجع لسلوب القيادة أو طبيعة الطرق التي تسير عليها تلك السيارة

- الألتزام بالضغط المقرر للأطارات يساعد في الحفاظ علي الاطار أن يكمل مهمته في المدة المحددة

- العناية بالاطارات و غسيلها بالمياه و تنظيفها و عدم تعرضها للجاز أو البنزين الذي قد يؤدي الي تشقق الاطارات و قد يتم استخدام الفوم في تنظيف الاطارات و تلميعها و جعل مادتها رطبة و مرنة


العناية الجيدة بالاطارات و القيادة الجيدة قد تطيل عمر الاطارات و تطيل من عمرها الافتراضي و هذا بالتجربة العملية حيث اني نجحت بفضل الله في الحفاظ علي أطارات السيارة السابقة الياريس لمسافة تخطت ال 70,000 كم و ذلك باتباع الخطوات السابقة

و في اطارات الالنترا أتبع نفس الاجراءات و حتي الان قطعت بها 50,000 كمو معدل التأكل للأطارات لايتعدي ال 20 % و حالته جيدة جدا و ذلك وفق اخر تقرير من مركز خدمة بريدجستون منذ يومين