المشاركة الأصلية كتبت بواسطة Ahmed TRAVCO
يعني يا جماعة محدش مستغرب من سعر الاوكتافيا وكله زعلان من سعر الاودي؟؟؟
انا طبعا لا معايا تمن دي ولا دي... ممكن في الخطة الالفية الجاية إن شاء الله... بس الحكاية ان اودي هي اودي... عربية رقم واحد في المانيا من فترة...
الحكاية مش فشخرة زي ما احد الزملاء قال... الاودي تتفوق تماما على الاوكتافيا والباسات اللي هو ذكرهم من حيث الاعتمادية وجودة التصنيع والامان والتعليق وكل شيء.... الاودي تتقارن بالمرسيدس والبي ام وتتفوق عليهم في احيان كتيرة... مش الاسكودا مع احترامي...
انا فاهم طبعا ان الاسعار استهبال... بس هوه ايه يعني اللي مش استهبال في البلد دي؟؟؟
وبعدين على فكرة... الجمارك اللي بيتم تحصيلها بتختلف على حسب صانع السيارة وبلد التصنيع... حتى لو سعة الموتور متساوية!!
مثلا الجاجوار xj اللي موتورها 3000سي سي هتلاقي جماركها اعلى من جمارك تويوتا لاندكروزر مثلا رغم ان موتور التويوتا اكبر على حد علمي... لان الجاجوار تاتي في ترتيب اعلى من التويوتا كتصنيف بيستخدموه في حساب الرسوم الجمركية...
وبالتالي... مينفعش علشان موتور الاودي هو هو موتور الاسكودا يبقوا ينزلوا بسعر واحد... علشان الاودي كماركة وصانع بتدفع رسوم اكبر من الاسكودا كماركة وصانع... زائد ان بلد المنشأ بتفرق برضه في التصنيف ده.... ناهيك عن ان العمالة في المانيا اغلى بكتير من العمالة التشيكية وده اللي بيخلي سعر الاودي اعلى (اقصد السعر الاصلي قبل الرسوم والجمارك والمستنقعات بتاعتنا)....