اتخبطت العربيه والحمد لله على كل حال

يوم الخميس وانا راجع من الشغل وكانت الساعه بتاع 4 كده فطريقي وانا في الاوتوستراد عند المنشيه ومتجه للمعادي المهم في مكان ضيق اوي كده حارتين وفي عربيات بتطلع من ملف في اليمين
والعربيات طالعه من اليمين فقافلين الطريق علينا وانا كنت في نص الطريق والاقي في المرايه الشمال عربيه نقل بمقطوره جاي من شمالي وبيعدي وانا باصص في المرايه وشايفه داخل فيا قام طك طخ فيا من ورا شمال وطبعا العربيه عندي اتنطت من الارض وخلاني اخبط في عربيه قدامي من كتر ماهو كان بيزق فيا
وقفته ووقفت الشارع ووخليته يركن المهم لقيت ظابط طلعلي من تحت الارض بيقولي في ايه بقوله زي ما انت شايف قالي طب اركن على جنب عشان الطريق ققلتله طب انا عايز حد يعملي محضر قالي حابعتلك عربيه دوريه بس اركن بس
المهم السواق بتاع النقل نزل لقيت بجد منظره يصعب على الكافر وكبير في السن وبيقولي معلش يابيه الصيام ومش عارف ايه طبعا زعقت فيه لانه فعلا ازاي يمشي وهو شايف الطريق كله واقف والناس داخله في بعضها وهو اللي على راسه ريشه والطريق مفتوحله
المهم وقفته معايا وفضلت اتصل ب 122 تلات مرات مفيش حاجه وصلت وروحت لقيت بوكس شرطه واقف فدخلت على الظابط بقوله كذا كذا قالي روح للقسم او كلم 122 قولتله امال انت ايه قالي انا بتاع مرور (طبعا بيكدب لانه بوكس شرطه عادي ) فقولتله امال انا ده يبقى ايه قالي ده تصادم ومحتاج حد من الشرطه الكلام ده وانا واقف بتاع ساعه واكتر من عارف اجيب حد يعملي محضر
لقيت امين شرطه معدي قولتله تعالي في حادثه وجه معايا الحمد لله واخد الرخص مني ومن السواق (المهم السواق كل شويه يقولي يابيه انا عايز اروح شوف انت عايز ايه بس عايز اروح الحق الفطار :) ) على اساس اني مش صايم انا كمان مش فاهم فمكنتش برد عليه
روحنا على القسم اخيرا (قسم منشيه ناصر) لقيتهم بيقولولي احنا نحجز العربيتين وتقعدو تستنو لحد ماتروحو النيابه قولتله ليه قالي عشان تاخد حقك قولتله لا مش عايز حاجه اعملي محضر باللي حصل وبس عشان التأمين قالولي يعني مش عايز من الراجل ده حاجه وحتسيبه قولتله اه مش عايز
وكتبنا المحضر وطلعت من القسم الساعه 5.50 دقيقه والمغرب 6.10 بس الحمد لله لحقت الاذان في البيت معرفش ازاي (الدنيا فاضيه خالص)
جيت اروح النهارده القسم عشان اخد صوره المحضر عشان التأمين لقيت الدنيا مقلوبه هناك بسبب الجبل اللي وقع النهارده ومكانه ورا القسم بشويه تخيلو المنظر هناك كان عامل ازاي قمت راجع ومخدتش صوره المحضر
ودي الصور هي الحمد لله مش جامده بس شكلها الاكصدام محتاج يتغير هو والرفرف والباب محتاج سمكره بسيطه مع دوكو
ولا ايه رأيكو؟؟ دانا لسه حاشوف حوار التأمين مع الجمعيه المصريه للتأمين التعاوني ودعواتكو ربنا يسهلها
http://img169.imageshack.us/img169/9...8010rn1.th.jpg
http://img137.imageshack.us/img137/6...8012aj9.th.jpg
http://img169.imageshack.us/img169/3...8013ts5.th.jpg
http://img387.imageshack.us/img387/9...8014yz3.th.jpg

قدر الله وماشاء فعل والحمد الله انها جت على قد كدة

والله العربية الوحيدة اللي مبحاولش أتخيلها مخبوطة هي السوبارو لأنها سيارة بمعنى الكلمة وتصعب على الواحد لو شافها مخبوطة ! معرفش دا إحساسي.

معلش قضا أخف من قضا. الباب مش محتاج يتغير هو الرفرف و الإكصدام و الجمعية بتاعت التأمين تعاملهم جيد ولكن المشكلة إنك أنت اللي هتدفع في الاول تكاليف التصليح.

هو حضرتك هتتصل بيهم وتطلب منهم يبعتو واحد يعاين العربية في التوكيل عشان يوافق على الحاجات اللي هتتصلح " ياريت تتفق مع اللي هيروح دا و تلاغيه بأي حاجة عشان ميعترضش على أي حاجة في التصليح" . و من ثم العربية بتتصلح و حضرتك بتدفع مبلغ التصليح و من ثم بتاخده من الجمعية بعدها بفترة لا تزيد عن 30 يوم ولا تقل عن 15 يوم.

و حمدله على سلامتك.

ربنا يعوضك إن شاء الله

قدر الله وماشاء فعل
والمهم انك بخير

قدر الله وماشاء فعل
وربنا يعوض عليك وان شاء الله ترجع زى الاول

قدر الله ماشاء فعل والحمد لله انها جت على قد كه وربنا يعوضك خير ان شاء الله

قدر الله و ماشاء فعل ياباشا بسيطه الحمد لله

والله أنا زعلت جدا ً شفت عربيتك مخبوطة ... متتخيلش أنا بعز السوبارو دي أد إيه ...

وأكيد بنعزك بردوا يا باشا ...

الحمد لله حصل خير وربنا يسهلك في مشوار التأمين

يا باشا ربنا معاك إن شاء الله ده حال البلد بقه عايشين مع ناس متخلفين الحقد واكلهم لو معاك 128 أو لادا مكنش قربلك هتعمل ايه حسبي الله ونعم الوكيل

سبحان الله نفس الموقف أول إمبارح علي مصر إسكندرية الصحراوي من سواق مقطورة برضه بس كان هيشيلني كلي .. انا و هو ماشيين في حارة واحدة و هو داخل في أكني مش موجود مش عارف كان شارب ولا إيه بس انا حدفت من ادامه في أخر لحظة

بسيطة إن شاء الله

المهم انت بخير والف سلامة عليك وان شاء الله تتصلح وترجع احسن من الاول

قدر الله و ماشاء فعل بس ان شاء الله خير و بسيطة و ان شاء الله ربنا حيكرمك

حمدا لله على سلامتك وبسيطه ان شاء الله
بس ليا طلب عندك انا كمان مامن عند الجمعيه المصريه وفى كام خبطه بسيطه كده فى العربيه عايز اعملها لما انزل اجازه من الشغل ان شاء الله
استسمحك بس تبقى تقوللى على اللى حصل وهل هايصلحولك العربيه فى التوكيل ولا مركز تبعهم
معلش عارف اى طلبى رخم ولو مارديتش مش هازعل

مهندس\ محمد صلاح
0101664913

الحمد لله انها جت على كده وهي عربية نقل كبير المهم انك كويس وكويس انك لحقت الفطار المرة الجاية ابقى اعزمنا :clap:

الحمد لله على كل شئ ومتشكر ليكو كلكو على كلامكم الطيب ده اللي بجد بيهون على الواحد جدا
انا النهارده رحت الجمعيه وعملت او مليت زي ورقه كده بالحادثه وصورو الرخص في الاخر قالولي تحب تعملها في التوكيل ولا مركز صيانه تبعنا قلتلهم ايه الفرق
التوكيل بتصلح وبدفع انا وبصرف شيك بالفاتوره بعد كده (15يوم او اكتر شويه)
لو في مركز تبعهم هما بيصلحوها وانا مليش دعوه باي حاجه
بس انا اخترت اعملها في التوكيل لانه اكيد افضل بكتير في كل حاجه باذن الله
المهم قالولي انت سايب العربيه في التوكيل قلتلهم لا طبعا لما تبعتو المهندس حبقى اوديها قالولي طب كلمنا بكره حنحاول نشوفلك مهندس تتفق معاه انكو تروحو سوا للتوكيل واكيد طبعا حاسيبها هناك فتره وربنا يسهل بالذات في رمضان ومواصلاته :(
فلو حد عنده خبره عشان احاول اختصر في وقت اني اسيبها او اظبط مع المهندس ازاي انا لسه معرفش حيقولولي ايه بكره ؟؟ وتقريبا كده التصليحات دي تاخد وقت قد ايه ؟؟
ياريت اللي جرب او شاف تجربه يفيديني في الموضوع ده وربنا يحفظنا جميعا من شر اي حادث ومن عطلة العربيات :)

وبالنسبه ليك يا ميمو (محمد صلاح) اعتقد ان ردي السابق ده يكون في اجابه لسؤالك
وياباشا لو في اي سؤال بالمره :) قولي او كلمني على 0100110329 وانا لسه حاكلمهم بكره واعرف ايه ظروف المهندس وحيرضي يجي معايا ولا حيقولي لا روح وديها وانا ابقى اروح لوحدي وانا مش عايز كده وربنا يسهل

انا متابعكم برضه لأن ناوي أطلع الطلعة دي عالجمعية إن شاء الله

يا عم الحمد لله انها جت على قد كده , انا تخيلت من كلامك انها اتبهدلت , لكن لما شفت الصور قولت الحمد لله بسيطة ,
قدر الله و ما شاء فعل.

قدر الله و مشاء فعل يا خالد
و إن شاء الله ترجع زى الاول

الحمد لله انك بخير يا خالد
قدر الله الله وما شاء فعل. واكيد ربنا فداء عن بلاء اكبر. الحمد لله
فداك مليون عربية وان شاء الله بسيطة وتتصلح وترجع احسن مما كانت

لا حول و لا قوه إلا بالله ...قدر الله و ما شاء فعل
المهم الحمد لله على سلامة حضرتك ....و كويس انك حتصلح في التوكيل إن شاء الله التوكيل يعرف يظبطها كويس .....هو بس عيب التوكيل إنه ممكن يتأخر شوية حاول تتفاهم مع المهندس عشان العربية ما تتأخرش قوي
و ربنا يعينك

الحمد لله يا خالد
و الله مشفتش الموضوع غير دلوقتي
قدر الله وما شاء فعل

بقولك لو عاوز اي حاجة من التوكيل وكده متترددش اتصل بيا وانا اشفهالك انا عارف انك ساكن بعيد

بس متهيالي انك العربية هتروح العبور اما الاكصدام وكده في مركز الصيانة
وحمد لله على سلامتك

الحمد لله انها جت على قد كده,
انا لسه مستلم العربيه السوبارو بتاعتي من هناك برضه بس حادثه جامده شويه كانت فيها اكصدام امامي و كبوت وزجاج امامي و خبطه في الرفرف,
غيروا الاكصدام و استعدلوا الكبوت و غيروا الزجاج الامامي و سمكروا الجنب اليمين,
الحمدلله انها جت على قد كده ,
و انا مأمن تبع الجمعيه برضه و عملت المحضر من يوم 11-8 و لغاية دلوقتي لسه مش عارف اجيب صورته و لازم عشان امشي الورق اجيب صورته لانها معديه ال5الاف
و كل ماروح النيابه يقوللي لسه متأشرش عليها عند رئيس النيابه و روتين حكومه و حاجه تقرفففففففففففف

انت عندك العربيه هتتعمل كلها في العبور ان شاء الله عشان السمكره ,
في هناك مهندس اسمه (ماجد) و مهندس اسمه ( محمود السعيد) دول ادخل عليهم على طول و سلمه العربيه و قوله انها تأمين و كده و هو هيستلمها و يشوف الي فيها و يستنى لما مهندس التأمين يوافق و بعدين يبدأ الشغل و خد رقم تليفونه و زن عليه كل يوم عشان يهتم بيها
و يا ريت و يكون احسن لو كل كام يوم كده رحت شفتهم و هما شغالين فيها
و نصيحه: متخليش فيها اي حاجه خالص شخصيه حتى الشرايط
و خليهم يخلولك قطع الغيار القديمه زي الاكصدام و الفانوس القدام عشان هتسلمهم في شركة التأمين بعد ما العربيه تخلص ان شاء الله
و ربنا معاك هو مشوار مقرف شويه بس ان شاء الله ميتكررش

و انا ان شاء الله التأمين الجي هيكون تبع ابوغالي عشان اتجنب حكاية ادفع و احاسب بشيكات دي لان كمان تعامل الجمعيه متعب شويه
و ربنا يسهل ان شاء الله

بجد والله انا شاكر لكل واحد تكرم برد منكم ومش عارف اقول ايه اكتر من جزاكم الله كل خير على الكلام ده
دلوقتي لما كلمت الجمعيه قالولي ودي العربيه النهارده عشان المهندس ممكن يروح النهارده او بكره كلمت التوكيل عالضهر قلت اسألهم يمكن يكون في مهندس جه قالي لا ده هنا الصيانه فقط(جسر السويس) اما السمكره وكده في العبور (الكيلو 28 اسماعيليه الصحراوي) فكلمت الجمعيه قلتلهم في تغيير في العنوان وهو كذا قالولي خلاص ودي العربيه بكره الصبح وسيبها هناك بس مادونيش رقم المهندس برده
السؤال دلوقتي او الطلب اني عايز اعرف مين حيروح التوكيل من المهندسين عشان اكلمه واعرف هو حيروح امتي بالذات احنا في رمضان والتوكيل بيقفل بدري والشغل بيقل وانا ساكن في الهرم وشغلي في الميرغني فامش ناقص اودي العربيه الاقي المهندس راح بعد اسبوع ولا حاجه والتصليح قول كمان اسبوعين
فلو يا جماعه لو تكرمتو لو تعرفو حد في الجمعيه يعرفني بس برقم المهندس اللي حيروح عشان اعرف منو حيروح امتي ويفضل اكون موجود وعشان اقلل الوقت الضايع وانتو عارفين رمضان والشوارع بقت عامله ازاي
ياريت بس اي حد يقدر يساعدني في الموضوع ده يبعتلي مسج بس النهارده في اي وقت او الصبح على الرقم ده 0100110329 ويبقى جزاه الله كل خير
انا اسف على اني قارفكو بموضوع بسيط كده بس انتو عارفين الجو صيام والواحد بيخش البيت عالفطار بالظبط فمش عارف من غير عربيه حافطر فين :) وربنا يسهلها بقى

لا حول ولا قوه الا بالله
ربنا يعوض عليك يا خالد
و الحمد لله انها جات علي قد كده.
اسف اني اتاخرت في الرد عليك اعذرني:)

انا معرفش والله رقم مهندس التأمين بس هما عامة مش بيتأخروا انا لما بوديها بيروح في خلال يومين تقريبا مزودش عن كده,
و مش لازم تكون موجود على فكره هما في التوكيل هيحاولوا يعملوا كل حاجه و بما ان انت معاك المحضر و مثبت فيه اضرار الحادث فهيوافق عليها ان شاء الله,
و ربنا يوفقك ان شاء الله

:boxing_smiley:قدر الله ماشاء فعل والحمد لله انها جت على قد كه وربنا يعوضك خير ان شاء الله

معلش ياا خالد
قدر الله وما شاء فعل
اصبر واحتسب
بالنسبة للتامين مش هاقدر افيد غير انك ممكن تكلم زميلنا ممدوح العربي
هو شغال في الجمعية وممكن يفيدك
لو معرفتش تلاقيه او تلاقي رقمة دور باسم ممدوح العربى في المنتدى

عين وصابت السوبارجية عندي نفس الخبطة بس قدام:no: