بفكر افتح شركة أمن

**MohamedSamy06** · 06-09-2013 06:18 AM

السلام عليكم ورحمة الله وبركاته

الحقيقه ان دي اول مرة اكتب فيها موضوع وخصوصا انه موضوع جديد ومهم في حياتي ألا وهو اني بفكر افتح شركة امن وحراسات .. وقررت اني اشارك الاعضاء المحترمين التفكير علشان استفاد من كل من له علاقه او خبرة او درايه الموضوع

انا طول عمري بشتغل في شركات multinationals وعمري ما عملت مشروع خاص بيه بس نظرا للظروف اللي بتمر بيها البلد انا الشركة اللي بشتغل فيها اوضاعها مش مستقره .. وطبعا مش هقولك ان الطلب من الشركات الاخرى على التوظيف عامل ازاي يعني بيكون في اضيق الحدود وللضرورة وبس
وتحسبا لأي شىء انا بفكر في اني ابتدي مشروع خاص بيه ويكون عباره عن شركة امن وهحاول اعرض الموضوع من وجهه نظري واتمنى اني اسرد كل الافكار بترتيب :

- انا اخترت المشروع دا من ضم مشاريع كتير بفكر فيها لأني حاسس ان الطلب عليه زاد وهيزيد اكتر في المستقبل القريب ... نظرا للظروف والمتغيرات اللي بتحصل عندنا في مصر

- الموضوع بعيد عن دائرة خبراتي تماما (لأني بعمل في مجال المبيعات من زمااااااان) بس في نفس الوقت فكرت في الحل للنقطه دي ان لازم يكون معايا شريك تتوافر فيه الخبرة الامنيه (جيش او شرطة) وطبعا يكون محل ثقه .. وميزة الشريك دا اني هستفاد من خبراته وعلاقاته في هذا الوسط

- الشريك هيكون مفتاح للدخول في العديد من الاماكن وطبعا انا هساعد في الحصول على عقود (زي ما قلتلكم انا مدير بيع يعني هابيع الخدمه بتاعتي ان شاء الله)

- الاعمال الاداريه اعتقد اني على مقدرة اني اديرها بعون الله بالاستفاده من الخبرات اللي اكتسبتها

- لي صديق بيعمل في احدى شركات الأمن وبيزودني بالنصائح وبساله على الكثير من النقاط

- المرحله اللي انا فيها ما هي الا مرجله استيعاب للفكره واستماع من صديقي وبعض الاصدقاء في المجال الامني

- محتاج ادخل في مرحله دراسه فعليه للمشروع واتمنى انكم تكونوا سبب في تزويدي ببعض المعلومات وعن رأيكم في المشروع دا وعن الميزانيه المقترحه

- لو فيه اي حد بيتعامل مع شركات امن ياريت يقولي من منظوره ايه اهم الحاجات اللي انت بتدور عليها في الشركة اللي عايز تتعاقد معاها

اكيد في كلام كتير ونقط هتضاف بمساعدتكم ليه ان شاء الله

وشكرا مقدما والسلام عليكم ورحمة الله

**MohamedSamy06** · 06-09-2013 04:22 PM

بسم الله ما شاء الله .. الموضوع شافه لحد دلوقتي 61 واحد ومحدش كتب كلمه !! طب الموضوع مش حلو ولا انا اللي كاتبه وحش ولا ايه ...

طب ارفعوا من روحي المعنويه بأي مشاركه دا حتى النهارده الجمعه والناس اجازه يعني

**reda elgohary** · 06-09-2013 04:40 PM

والله يا فندم ،، أنا معجب بك وبكلامك ،،، وكمان أتمنى لك التوفيق ،، ولكنى أنصحك أن تتمهل حتى تستقر الآوضاع فى البلاد ،،ربنا يوفقك ويصلح حالك .

**ramyhekal** · 06-09-2013 05:55 PM

الفكره كويسه جدا وعجبانى وزى ما حضرتك قولت لازم شريك متخصص فى الموضوع ده وان شاء الله موفق

**MohamedSamy06** · 07-09-2013 03:06 PM

المشاركة الأصلية كتبت بواسطة reda elgohary

والله يا فندم ،، أنا معجب بك وبكلامك ،،، وكمان أتمنى لك التوفيق ،، ولكنى أنصحك أن تتمهل حتى تستقر الآوضاع فى البلاد ،،ربنا يوفقك ويصلح حالك .

شكرا يا استاذ رضا على ردك .. بس والله بالنسبه لحال البلد انا شايف انه مساعد ليا يعني طول ما الاوضاع في مصر مش مستقره فبتخلي الناس تفكر اكتر في التعاقد مع شركات الامن وكدا يعني

**MohamedSamy06** · 07-09-2013 09:32 PM

شكرا يا استاذ رامي .. بس عارف ان موضوع الشريك دا مشكله في حد ذاته لأن انت محتاج حد تكون عارفه وتثق فيه واللي انا اعرفه واثق فيه دا لسه في الخدمه اصلا ..

محتاج اختيار فيه توفيق كبير من الله .. وربنا يسدد خطايا في المشروع كله

**الفجر** · 07-09-2013 10:39 PM

ربنا يوفقك

**eslamrace** · 08-09-2013 01:53 AM

بص انا مش حقدر افيدك فى موضوع الامن لان خبرتى فيه صفر ولكن انت المفروض تفكر فى ميزه فى الخدمه اللى حضرتك حتقدمها خاصه ان مش حضرتك شخصيا اللى حتقوم بالخدمه والموضوع فيه منافسين كتير فلازم يكون عندك فى شركتك شئ مميز .
وانا اتمنااك النجاح واتمنى حد من الاعضاء يقدر يفيدك ويجاوب على تساؤلاتك .

**MohamedSamy06** · 09-09-2013 09:44 AM

المشاركة الأصلية كتبت بواسطة eslamrace

بص انا مش حقدر افيدك فى موضوع الامن لان خبرتى فيه صفر ولكن انت المفروض تفكر فى ميزه فى الخدمه اللى حضرتك حتقدمها خاصه ان مش حضرتك شخصيا اللى حتقوم بالخدمه والموضوع فيه منافسين كتير فلازم يكون عندك فى شركتك شئ مميز .
وانا اتمنااك النجاح واتمنى حد من الاعضاء يقدر يفيدك ويجاوب على تساؤلاتك .

شكرا ليك ولتمنياتك ليا.. انا طبعا فكرت في الميزه اللي ممكن اقدمها خصوصا كون الشركه في بداياتها ومن غير سابقه اعمال فلازم يمون فيه تميز في اللي بقدمه .. وعرفت بردو احوال الشركات والخدمات الزياده اللي بتقدمها خصوصا في الاول

شكرا ليك وفعلا اتمنى اني الاقي تفاعل من الاعضاء معايا علشان اقدر استفاد اكتر

**Secret-Man** · 09-09-2013 12:07 PM

اول حاجه تسالها لنفسك انت هتقدم ايه جديد فى السوق عن الى قبلك
ايه خدماتك الامنيه الجديده
هل كواد الامن عندك مدربه ؟ هل مرخص ليهم شيىء غير انهم يقفو وخلاص فى شركه ولا عقار

والاهم من كل ده لازم يكون معاك حد ماركتنج شاطر جدا قبل ماتحط جنيه يرسملك خطه كامله للمشروع وانت تقرر لان فعلا السوق صعب صعب صعب

على قدر ما المجال الى انت داخل فيه مطلوب بس ليه ناسه وشركات ليها اسمها فمحدش بيجازف مع حد جديد بيجرب فيه الناس بتفكر كده