تانى يوم فى شغلى وحابب انكوا تكونوا معايا فى الصوره

**midoabdeen** · 06-09-2013 03:32 PM

السلام عليكم ورحمه الله وبركاته
تانى يوم ليا فى الشغل الجديد كان امبارح وطبعا انا كنت مصدع اخواتى هنا بالموضوع دا انا اسف وبصراحه شوفت اراء تحترم وانا نفسى اقتنعت بيها وشكرا والله لكل اللى فادنى بمعلومه

بدخل بقى فى المهم
روحت الشغل اول امبارح اللى هو اول يوم طبعا انا اصلا روحت الشركه قبل كده علشان اقدم بس ماتعاملتش مع حد خالص طبعا مستوى الشركه جامد جدا هى فى القريه الذكيه
المهم اتفاجئت اول يوم انى هبقى موجود فى الشئون القانونيه مع انى خريج تجاره اصلا هى الشركه شغاله فى الملكيه الفكريه وااصلا معظم الموظفين فى الشركه اللى خريج حقوق او تجاره او هندسه
ياعنى المجال نفسه عادى ان حد يتعلمه ويشتغله عادى ماعادا شغل الحسابات والقانونيه
انا خريج تجاره عين شمس 2011 عربى
طبعا كل اللى هناك خريجى لغات اما حقوق انجليزى او فرنساوى او تجاره انجليزى
طبعا انا قعدت فى وسطهم لا افقه اى شئ انا عندى خبره مسبقه فى المجال دا اصلا حوالى 3 سنين بس المكان اللى انا فيه هقوم بشغل غير شغل القاونونيه اصلا بس شغل قليل ياعنى اليومين اللى فاتوا ماكنتش شغال لانى المفروض همسك الشغل الجديد ابتداء من 15/9 اللى جاى وطبعا كل الناس عماله تبص انى مافيش عندى شغل

المهم دى كانت فضفضه بس معاكوا الموضوع اللى داخل علشان انى كنت حابب اشتغل فى الحسابات بس كلمت مديرى وهو اللى مدخلنى الشركه اصلا قالى صعب يا محمد احنا اصلا عندنا ناس زياده فى القسم دا وكلهم خريجى تجاره انجليزى

ومكدبش عليكوا كنت حاسس انى قليل اوى فى وسط الناس دى
فانا قدامى حلين
اما انى استسلم وارجع شغلى الحكومى تانى قبل ما اقدم استقالتى (وطبعا دا انا مش حابه بعد اللى شوفته هناك لان بقى عندى اصرار انى ابقى فى نفس المستوى لانى نفسى اطلع عيالى كده)

او نى اتقبل الشغل فى مجال غير مجالى الفتره دى لانى هبقى محتاج فلوس للكورسات لان شغل الحكومه اللى اكتشفته فى الاخر انه وقفلى دماغى الفتره اللى قعدها فيه واستفاد بفرق المرتب الجااااامد دا انى اطور من نفسى
ياعنى من الاخر اخد الشغل دا خطوه توصلنى للى انا عايزه

انتوا ايه رائيكوا فى الموضوع دا وكمان ازاى اطور من نفسى

انا بفكر ابدا كورسات انجليزى الاول انا اصلا كنت بدرس فى بيرلتز بس طبعا نسيت كل حاجه لانه كان من سنتين

فكنت بفكر فى بيرلتز او المجلس البريطانى
وكمان حاسس ان دماغى مش قابله اى معاومه جديده طبعا لانى بقالى كام سنه لا مذاكره ولا شغل محتاج تشغيل دماغ
الموضوع دا حله ايه (انا فكرت انى اجيب كتب فى مجالى مثلا الضرايب ..... علشان اجبر نفسى انى اركز فى حاجه استقبل منها معلومات
وكمانا كنت سمعت عن الcma وعايز ابدا فيها بس بعد فتره من الانجليزى علشان اكون كونت مجموعه كويسه من اللغه ايه هى الاماكن الكويسه اللى بدرش الشهاده دى وكمان تكلفتها كام وهل فى الاخر لما اقدم السى فى بتاعى فى مكان باردوا مش هيبصوا فيه لانى عربى ولا هيبقى فى مساواه بينى ويبن تجاره انجليزى

انا مش عايز اقول احد من اصحابى على الشغل الجديد ماحدش يعرف غير واحد بس وانا عارف انه بيحبلى الخير
ايه رائيكوا اقول ولا استنى ال3 شهور الاختبار علشضان ابعد عن عينهم وبعدين ابقى اقول

انا عارف انى طولت عليكوا انا اسف بس العشم فى اخواتى هنا فى المنتدى انهم يبقوا معايا فى كل حاجه

وشكرا

**blazer** · 06-09-2013 03:47 PM

طبعا كمل فى شغلك الجديد
هتستفاد من كذا حاجه انت بنفسك ذكرتهم
فرق المرتب الى هينعكس على راحه نفسيه و تقدر تاخد كورسات
فرق نضافه مكان الشغل و اكيد التعامل هيبقى ارقى
هتكتسب خبره جديده فى مجالات جديده

**Ahmadhamza84** · 06-09-2013 03:53 PM

ياباشا ماحنا بنذاكر وعندنا 29 سنة أهو والحياة مانجا :)
لازم تبقى فاهم انك علشان تبقى بني آدم محترم في أي مهنة إنك هتقعد تذاكر طول عمرك ....جهز نفسك لكدة وعود نفسك على كدة ....عود نفسك تذاكر أي حاجة في المتسابة ...يعني مثلا لو مالقتش أي حاجة تذاكرها ذاكر لغة ... لو عملت لنفسك كل يوم تحفظ سطرين قران هتلاقي دماغك بقت متشحمة وتقدر تذاكر أي حاجة في أي وقت ...
أنا ماليش دعوة بموضوع انك تكمل ولا ترجع لأنه مش حاجة مهمة زي ما أنت متخيل ...المهم انك تغير نفسك وتطور نفسك ...سواءا كنت في الحكومة ...كنت في الخاص ...كنت في الهند ...كنت في قلة الكبش ...لو اتعلمت تطور نفسك وتذاكر ولا هيفرق معاك أي حاجة ...لأنك بكدة هتبقى بني آدم محترم في مجالك والناس هتبقى طوابير عليك بتطلبك ...حاجة كمان ...ماتستخسرش أي قرش في مجالك ... خد كورسات محترمة وشهادات تقيلة ذاكر واتعب ....
حاجة تانية مزعلاني من كلامك ... ثقتك في نفسك مهزوزة ...
ياباشا ماحنا اتخرجنا من مدارس حكومة وربنا كرمنا بفضله أولا ثم بالجد والكد والتعب ...
ماتحطش في دماغك تجارو انجليزي وتجارة عربي والهلس ده ...
فكر انك متميز وشاطر وبمجهدك تقدر تخلي الروس تتساوى وكمان أنت تبقى أحسن ..
بص قدام المراية 3 مرات في اليوم بعد الأكل وقول : أنا مختلف :)
لازم تبقى مختلف وتتعب ...ماتقعدش تقلل من نفسك ومما تملك ....
أنا معاك انك لازم تبقى واقعي ... بس لازم تبقى طموح وتشتغل وتتعب وتذاكر ....
قال دماغك مش قابلة معلومات قال ... بطل دلع ياخويا :)
أنت دماغك تجيب كل حاجة بعون الله ...توكل على الله بس

**dede_dodo88** · 06-09-2013 05:37 PM

أثبت يا بطل أنت لسة في أول الطريق..
إرمي ورا ضهرك شغلك القديم ده خلاص لأنك لو فضلت تفكر فيه كل شوية هتتعب أوي خصوصاً أن شغل القطاع الخاص مرهق و محتاج ان يكون عندك دايماً حافز أنك تواصل و تبقى متميز عن اللي حواليك و دي حاجات مش موجودة في شغل الحكومة فأنت لو سيبت نفسك تفكر في الماضي هتيجي لحظة تستسلم فيها و تدور على السهل فتتمنى ترجع تاني.. حاول متوصلش للنقطة دي..
كمل دراسة و شوفلك شهادة كويسة تدوس فيها بجانب الشغل.. صحيح الموضوع متعب لكن أنت مش متخيل كمية الأستفادة اللي بتكتسبها بتكون عاملة أزاي, أنا بتكلم أستفادة كعلم مش كمجرد شهادة تتكتب في سجلك..
أنا أهه شغال مذاكرة مع الشغل.. صحيح أني طلعان عين اللي جابوني xD بس بستفاد جداً من الحوار ده..

**wawamoha** · 06-09-2013 05:51 PM

ياراجل يا طيب كمل في شغلك الجديد و خليك اوبن مايند و اتعلم حاجه جديده هاتفيد شخصيتك وتطورك و خبراتك في الحياه
لو ماحبتهاش تقدر تغير في اي وقت ... لكن ماحدش بيسيب فرصه جديده من اول يوم
انا بقول قدامك سنه عل الاقل تجرب
و عل فكره ممكن تطلع شغلانه محترمه و لذيذه و تكون دي مصدر رزقك في الحياه

باتوفيق

**أحمد كمال** · 06-09-2013 06:12 PM

انت في طلال ابو غزالة و لا ايه؟

**أحمد كمال** · 06-09-2013 06:17 PM

بص

انا في 10 سنين اشتغلت في 6 اماكن

دايما كل ما اروح مكان جديد نفس الاحساس

مفيش شغل؟ لسه مش عارف حاجة .....احساس بالجهل و قلة القيمة ...... حاسس اني كفتجي وسط الناس ..... الخ الخ الخ

اصبر و هتخش في الفورمة ....... ما تقلقش

موضوع انك تصمم عالحسابات غلط ...... انت لسه داخل الشركة ما تقعدش تتنطط لهم و تقول عايز و مش عايز ......

ايه المشكلة انه شغل مش شغلك؟ كل الشغل كويس ........ اسال مديرك مين هيقعد معاك يفهمك المطلوب منك و واحدة واحدة هتفهم و تشد حيلك

موضوع ان الشغل الحكومي وقف دماغك ده ادعى انك ما ترجعش .......... هو ما وقفهاش هي الدماغ بس زي المكنة بتصدي من الركنة ........ شوية wd40 مع شوية شغل هتلاقيها سلكت ما تقلقش :)

و ما تحسش انك قليل و لا حاجة ..... هما ناس في الشركة من فترة و عارفين نظام الشغل و طبيعي اي موظف جديد بياخد وقت على ما يفهم المطلوب

و بلاش تقول لاصحابك لو خايف تتحسد ...........

**أحمد كمال** · 06-09-2013 06:24 PM

و بعدين فكر في حاجة

انك لو فشلت أو جبت ورا ابوك هيحفل عليك لبكرة

الموضوع: تانى يوم فى شغلى وحابب انكوا تكونوا معايا فى الصوره

LinkBack

أدوات الموضوع

عرض

-

-

-

-

-

المواضيع المتشابهه

معلش ياجماعة تاعبكم معايا استفسار تانى بخصوص لادا

تانى قصة معايا فى التوكيل

يا جماعه فى حد تانى ناوى يشترى لانسر 2008 الشكل الجديد معايا

الكلمات الدلالية لهذا الموضوع

المفضلات

المفضلات

ضوابط المشاركة