لقد عمت الفتنة وطالت حتى المنتدى
اللهم ارنا الحق حقا وارقنا اتباعه اورنا الباطل باطلا وارزقما اجتنابه
عرض للطباعة
لقد عمت الفتنة وطالت حتى المنتدى
اللهم ارنا الحق حقا وارقنا اتباعه اورنا الباطل باطلا وارزقما اجتنابه
بصراحة أنا قلت المشاركات دي يا مصطفي هتعملك مشكلة وإنت فعلا بقالك كام يوم في قسم الأحوال بمشاركات كتير فقلت أكيد هتاخد وقف لأن اللي بيشارك بقوة كدا وداخل يخبط وخلاص..لازم يتلسع
بصراحة الكلام ده ميتقلش..والوقف بسيط لعدم التكرار..لازم يكون فيه عقاب لعدم التكرار مهما كانت درجة إفادتك للمنتدي
محمد ممدوح إتوقف قبل كدا مع إنه من عظماء القسم هنا وساعد ناس كتير جوا المنتدي وبراه
وكان فيه أوقات وجوده في القسم لا بديل عنه ومع ذلك إتوقف ومتكلمش مع إنه مش بس عضو عادي وقديم...لأ ده كمان إستشاري قسم
الوقف بسيط وياريت تفكر تاني لأننا عرفناك عقلية معملية فذة...وشخصية محترمة ومهذبة ودي كانت فلتة منك بس
كل كلامي ده مع إنك عارف إني بخالفك الرأي السياسي..بس دي نصيحة
أنصحك تعتذر عن هذا الموضوع اللي يستحق الإعتذار أفضل من إعتذارك عن الكلام اللي اتوقفت بسببه لأنك ساعتها أخدت عقابه وخلصت
برجاء من المراقبين التفاعل مع المشتكين أكثر والرد علي إستفساراتهم بسرعة أكبر وعدم إهمالها عشان ميحسوش بالظلم والتجاهل فيغلطوا أكتر زي الموضوع دا
تحياتي للجميع
الواحد بيدخل المنتدي هنا هربا من جو السياسة في الخارج و بيستمتع بكل موضوع او مناقشة في العربيات و بيتعرف علي ناس جديدة محترمة و بيزود معرفته و بيحاول ينقل مواقفة و خبرته لوجه الله تعالي
ياريت ياريت نبطل نتكلم في السياسة في اي منتدي خاص بأي ماركة سيارة و منتدي احوال الشارع المصري موجود اهه و الحمد لله مش بدخله ولا عايز ادخله لاني بدخل نايل موتور اهرب من السياسة زي ما قولت
ياريت الادارة تشوف حل للموضوع بطريقتها و ياريت المشاركات السيئة تتمسح و المواضيع دي تتمسح و نفضل اصدقاء فقط و يجمعنا حب السيارات
بص ماليش فى الاكلام دة انت راجل ياما فدتنا واكيد فدت المنتدى يعنى انا لما قريت مواضعيك قايل ل10 وسجلوا فى المنتدى يبقى بتفيدة وياسيدى كانوا خلوها قرصة ودن بلاش ايقاف وكلنا متضامنين معاك
ياااااااااااااااااااااااا اااااااااااااه
والله نسبيا انا متعاطف مع وميلنا الموقوف - لكن فى نفس الوقت القواعد غير قابله للنقاش
يا ترى يا كريم باشا (كريم منير) فاكر الايقاف اللى انا اتوقفته
http://www.nilemotors.net/Nile/129639-a-4.html
الموضوع ده نص المنتدى اخد ايقاف فيه !!!!!
انا عمرى ما اخدت اى انذار او ايقاف فى المنتدى غير الايقاف ده - لكن بجد انا فخور بالايقاف ده
اللى عايز يشوف سبب الايقاف هاتلاقوا واحد من الاعضاء عامل اقتباس لكلامى والاداره نسيت تمسحه
ااااااايه كانت ايام
أنا كمان رأيي كده
تروح تزور قرايبك تلاقي كلام في السياسه
قنوات السياسه تلاقي كلام في السياسه
قنوات الرياضه تلاقي كلام في السياسه
قنوات المطبخ تلاقي كلام في السياسه
في العربيه تلاقي كلام في السياسه
طيب واللي زهق من السياسه يعمل ايه يموت
انا و الله لما بسمع كلام في السياسه بحس اني عاوز أرجع :01964e~163:
و لما بنمسك في موضوع مبنسيبوش
ياريت القائمين على المنتدي على الأقل يغلقو القسم ده مؤقتا
ده انا اعرف ناس قرايب قاطعوا بعض بسبب الاختلاف السياسي
و ربنا يهدي الجميع
بصراحة انا مش عارف بعض الزملاء الافاضل ليه واخدينها معركة شخصية مع الاستاذ مصطفى وكأن لهم تار بايت معاه الراجل بصراحة من اكتر الشخصيات احتراما والتزاما وافادة للمنتدى وللناس لوجه الله تعالى وحسب ما قريت اول مشاركة فى الموضوع ده منه ان المشكلة مش ايقافه انما هو الاحساس بالتجاهل وان محدش حتى بيفكر يرد عليه ودى حاجة فى حد ذاتها شئ سخيف جدا وان كان ليا عتاب عليه لو يسمحلى انا لما قريت المشاركة بتاعة مراقب القسم لقيت بعض التجاوز بالرغم من انى من نفس الاتجاه السياسى معاه الا انى بس معترض لوجود انسات وسيدات فى المنتدى وده طبعا يستدعى الايقاف مفيش مشكلة انما على الاقل كان المرجو ان حد يرد عليه وخصوصا انه مش عضو عادى واما عن تهديده بالمواضيع بتاعته ما افتكرش انه يعملها لان الشخصيات اللى من النوع ده شخصيات خدومة بطبعها ومش بتميل لأذى الغير من باب اثبات الذات والحكاية بس ان التعبير خانه زى ما قال احد الاعضاء المحترمين انما التجاهل ممكن يخليه ياخد اتجاه سلبى والخسران فى الحالة دى المنتدى والاعضاء ومتنسوش لو كان فيكم حد مستكبر وفاكر انه معلم ومش محتاج لحد اننا كلنا كده هنعيش ونموت واحنا لسه بنتعلم
آسف للاطالة
الحق يقال:
الاستاذ مصطفى جارى وصديق عزيز
من وقت ماعرفته ماشوفتش منه غير كل خير واحترام وتعاون واخلاص،عملى انا شخصيا عملى حاجات فى عربيتى وكان مبسوط جدا وهوه بيقدم خدمة ليا.
انا عاوز اقول كلمة للاخوة الاعضاء وكلمة لادارة المنتدى وكلمة لصديقى العزيز مصطفى
كلمتى للاخوة الاعضاء:يرجى مراعاة ان الاستاذ مصطفى واخد ايقاف ومفيش داعى للهجوم عليه فى الوقت ال هوه مش عارف يرد فيه او يقول وجهة نظره او يدافع عن نفسه او حتى يقدم اعتذار للزملاء ال كلامه مش عاجبهم
كلمتى لادارة المنتدى جزاكم الله كل خير وهذا الموقف جعلى ازداد احتراما وحبا ولكم وللمنتدى
كلمتى لصديقى العزيز الاستاذ مصطفى:قال النبى صلى الله عليه وسلم انصر اخاك ظالما او مظلوما،علشان كده بقولك ماتزعلش من الحظر بل بالعكس انت المفروض تكون مبسوط اننا فى منتدى كويس زى ده وبيقوفنا لما يلاقينا اخطأنا
وعلى فكرة لو انا فى ادارة المنتدى ماكنتش ها اتردد انى اعمل ليك وقف ههههههههه
ولازم النهار ده تعزمنى على حاجة ساقعة وتركبلى الليدات بتاعة الشنطة و المرايا وتعملى موضوع الكلاكس ال انت وعدتنى بيه. ههههههه
المرتين اللى الواحد شيك على المشاركات و المواضيع الجديدة من امبارح للنهارده كان الموضوع ده تملى بينهم..... لغاية ما عرفت السبب..... ماشاء الله 980 مشاهدة ل 37 مشاركة بس فى يومين من امبارح للنهاردة و لسه العداد بيعد
و الحقيقة رغم ان الواحد حريص كل الحرص على البعد عن المشاحنات الشخصية و المبارزات الكلامية اللى ملهاش لازمة و لا هتودى و لا هتجيب..... و شخصيا انا بفضل لو عندى رأى يبقى مدعم بالمعلومات و الاخبار اللى تسنده لتوضيح الرؤية و الصورة الاكبر.....
استاذ مصطفى انا اتعرفت عليه متأخر من خلال موضوع العين السخنة اللى كان فى الاجتماعى.... و انبهرت بيه الصراحة رغم انى زرت العين السخنة قبل كده عشرات المرات الا انه حسسنى انى مشوفتهاش قبل كده :)
بعد كده كان ليه تواجد مميز برضه فى قسم الخناقات...... قصدى قسم الاحوال...... اللى انا برضه بشارك فيه بس انا حاطط لنفسى القواعد السابق ذكرها من حرص على تجنب المشاحنات و الاكتفاء بالرأى الذى احاول قدر ما استطيع ان اجعله موضوعيا مدعما بالمعلومات و الاخبار اللى بربطها ببعض لاستخراج تحليل ما لموقف او حدث معين و ننتظر بعدها لنرى مدى تحققها فى الواقع.....
استاذ مصطفى رغم اراؤه القوية الحجة و المنطق الا انه احيانا تأخذه الحماسة فيندفع...... و انا شخصيا حاولت افرمله هو و احد الاخوة الاخرين كذا مرة لما لاقيت المناقشة بينهم هتحتد فى احد المواضيع ..... لكن سبق السيف العزل..... احب اقوله انى انا كمان اتوقفت قبل كده بسبب رأى كان فيه انطباع فى موضوع اصلا بيطلب منك تقول انطباعك..... لكن رأى المشرفون ان هذا فيه اساءة لقطاع معين من مستخدمى السيارات..... المهم انا اتعلمت من التجربة دى انى ابعد قدر الامكان عن ابداء الاراء الشخصية عن البشر و نخلينا نناقش الافكار و المحتوى للكلام اللى بيتقال ايا كان...... و الاسلوب ده ناجح لانه يجنب الاحتكاك بين الاشخاص و بيركز على منطق الكلام...... و ده اللى ادعو أ. مصطفى انه يركز عليه بعد كده..... فمتزعلش الوقف للجدعان :)
وواضح ما شاء الله حجم الناس اللى استفادت من علمه فى هذا القسم و ربنا يزيده من علمه و يقدره على افادة الناس حتى لو فى لحظة تهور قال انه هيمنعها رغم انى متأكد انه مش هيجيله قلب و ينفذ
و رجاء خاص من الادارة فى سرعة الرد على الاعضاء اللى بيبقوا تملى عشمانين فيها بالخير..... رغم برضه انى عارف القيود على تواجد المشرفين اللى وقتهم محدود و مستحيل يتابعوا كل مشاركة الخ
تقبلوا مرورى اللى رغم انه نادر لهذا القسم الا ان الموضوع ده كان ملفت بصراحة استدعت المشاركة فيه و ارجو انها تكون للخير
-انا مش عارف الناس هاجمه على ا مصطفى ليه..
الراجل بيقول انه كان بيتابع مواضيع مهمه وتهم الاعضاء وعشان كده كان بيطلب التماس..يترفض او يتقبل مفيش مشكله,لكن الدخول جوه نفسه والحكم انه عاوز يتنطط ع الناس وكده بصراحه مش منطقى يعنى محدش بيحاسب حد على النية.
-انا بصراحه رايى فيه "من ناحيه العربيات"انه راجل مخه شغال وخدوم جدا وبصراحه يعنى بينزل لمستوى العضو المبتدىء عشان يفيد الناس كلها..وانا طبعا استفدت منه كتير واهم حاجه استقدتها منه انى ازاى افكر..مش انى اتصرف فى مشكله والسلام
-كنت بتحاور معاه احيانا فى قسم الشارع المصرى وفعلا مستغرب اسلوبه التصادمى "اصلى من الشعب التانى غير الاولانى بتاع ا مصطفى" وبقيت مش صدق ان هو ده نفس الراجل بتاع قسم اللانوس خصوصا انه فى الحوار الشخصى واضح انه والله محترم جدا ,مش فاكر ان اساء لحد شخصيا.
-انا لسه موقوف من حوالى اسبوعين برضه وفى الاول اتغظت يعنى انا مغلطتش فى حد بس برضه اتخذت اسلوب تهكمى من الفريق الاخر ولقيت نفسى موقوف..بس بدل ما اشتكى قلت ادينى بتعلم احاسب نفسى قبل ما حد يحاسبنى..وان حد يحاسبنى قبل ما ربنا يحاسبنى واهو فكيت م السياسه شوية وبتعلم امسك اعصابى عن الاول.
-مش موافق ابدا على راى بعض الناس ..فدايما جزاء الاحسان هو الاحسان..يعنى قولوله انت غلطان فى كذا وكذا وكذا لكن اسلوب "انت مش احسن من الناس ولو مش عاجبك بلاش خالص"اسلوب هيجرحه وهو فعلا خدوم ..هو راجل كان بيصور كل خطوه بيعملها بالكاميرا من زوايا صعبه جدا وممكن ينزل يفك عربيته حتت عشان ينزلنا فيديو نتعلم منه..مهما كانت نيته فده شىء اشكره عليه.
-اللى بيقول انه ميقدرش يبوظ مواضيعه القديمه..لا على فكره يقدر,بس مش فى كل المواضيع..وانا راجل مهندس برامج وعارف ايه اللى ميقدرش يوصله وايه اللى ممكن يوصله
-طالما هو تجاوز قوانين المنتدى فانا رايى انه يتطبق عليه القانون عادى جدا..مفيش حصانه لحد مهما كان غالى وعزيز علينا لكن حاسس انه هناك بعض التربص اللى ممكن يسىء اليه نفسيا واتمنى ان الادارة تتجاوز عن موضوع عقوبه الحساب الاضافى ده لان فى ناس كتير"منهم انا"مكناش نعرف انه ممنوع وهو مدخلش عشان يبوظ المنتدى هو دخل وقال الصراحه
--------------
ملحوظه على جنب للاستاذ ظريف:حضرتك حسيت بمراره العداله فما بالك بمراره الظلم؟ارجوا انك متستهنش بالظلم والمظلومين