الموضوع: تم ايقاف العضو Zarif وسط ملابسات غامضة ومحيرة

السلام عليكم ورحمة الله
مبدئيا انا العضو Zarif او مصطفى حسن (اسمى الحقيقى)

وانا دخلت سجلت بالاسم دة (123456) عشان اعمل المشاركة دى

والحقيقة انا اتوقفت يوم الثلاثاء الماضى الساعة 2 بالليل
وسبب الايقاف كان بسبب مشاركة فى قسم احوال الشارع المصرى
وللتوضيح المشاركة لم تكن بها شتائم او الفاظ نابية او سوقية كما قد يذهب خيال البعض
ولكنها كانت 11 كلمة بالضبط منمقة وانيقة وخالية من السباب ولكنها تحمل فى طياتها سخرية لاذعة
ويبدوا ان احدهم قام بالابلاغ عن مشاركة سيئة ليتم ايقافى فى الوقت المذكور اعلاة

وللامانة انا لما جت ليا الرسالة بتاعة الايقاف وسببها خدت بالى من ان جرعة السخرية الاذعة كانت شديدة اوى على الرغم من ان المفردات اللى استخدمتها كانت مفردات عادية

وبعدها بنصف ساعة بعت رسالة اعتذار لمراقب المنتدى اللى هو عمل ايقاف ليا وكان لسة اون لاين

ولم اتلقى رد
وبعدين بعت نفس الرسالة لكل من :
- استاذ كريم منير رئيس مجلس الادارة
- مدام سما المديرة التنفيذية
- عملت شكوى فى قسم الشكاوى
- بالاضافة طبعا لمراقب المنتدى اللى على ايقاف

وكان مختصر هذة الرسالة هو اعتذار على السخرية الاذعة (رغم انى ممكن اكبر دماغى ولا اعتذار ولا بتاع ) وطلب باستثنائى من الايقاف وقلت لهم حرفيا فى الرسالة - مش عشان سواد عنيا ..لكن عشان فية موضوع معلق بيا فى القسم بتاعى اللى هوة ابتكار كمبورسور هواء بتكلفة لا تتخطى 30ج والناس متفاعلة معايا ومستنية فارجو الغاء الايقاف عشان خلاص الشتا داخل والناس تلحق تنضف التلاجة بالمية والمادة التانية يعنى بطلب رفع الايقاف عشان حاجة هتفيد المنتدى مش عشان سواد عينيا.

وفى الاربع حالات لم اتلقى سوى الصمت الكامل

اول يوم قلت يمكن مفيش حد من الادارة اون لاين (متواجد يعنى) وقلت اصبر لبكرة
تانى يوم ..........مفيش رد
تالت يوم ...........مفيش رد
وحتى لحظة كتابة هذة السطور ........مفيش رد

طيب حتى يقولولى اى حاجة .... قوانين المنتدى ..... النظام.....اى حاجة مثلا المهم يعبرونى

الملفت للنظر فى الموضوع بقة ان الصمت القاتل دة مسالة مريبة ولية 3 تفسيرات عندى

الاول : حالة عامة من الطناش من الجميع (واتمنى ان اكون مخطى فى ذلك)
التانى : ان مفيش اى تقدير للناس اللى بتجتهد فى المنتدى وبتتعب بجد وطبعا الكلام دة مش حكر عليا انا بس دا فية ناس كتير فى المنتدى بتجتهد وتعمل شغل اكتر منى وبردو لوجة الله

وفى نص الرسالة للاطراف المذكورة عالية استشهد بمواضيعى علها تكون نقطة ايجابية فى صالحى لرفع الايقاف عنى وعشان اوضح لادارة المنتدى ان انا بدى للمنتدى اكتر ما باخد منة بكتير قوى

التالت : ان الادارة بتاعة منتدى كبير زى نايل موتورز مش متواجدة او مكبرة دماغها ودة يودينى لحاجة مزعجة جدا وهيا ان مثلا مثلا يعنى لو واحد سب الدين لواحد فى قسم احوال الشارع المصرى مثلا يعنى
او واحد حط صورة اباحية فى منتدى زى نايل موتورز
او واحد تطاول على الذات الالهية

معنى كدة ان الحاجة دى هتفضل موجودة على صفحات منتدى كبير زى نايل موتورز لعدة ايام (وفية حريم معانا فى الاقسام) لحد ما حد من الادارة يدخل وياخد بالة منها

مسالة مزعجة قوى بصراحة على المستوى العام

لكن على المستوى الشخصى انا بقيت حاسس انى زيى زى الاعضاء اللى بتدخل المنتدى تستفيد بالمعلومات وشكرا للتحية

دا حتى فية اية كريمة بتقول (هل يستوى الذين يعملون والذين لا يعملون)

وبناء علية انا بقيت محتار ومش عارف اخد قرار
1- استنى لما وقت الايقاف ينتهى واكمل عادى فى القسم بمنتهى الحماس (رغم ان دة هيبقى غير واقعى بعد حالة الاحباط اللى انا فيها)
2- اطالب اخواتى وحبايبى فى القسم انهم ينهالوا بالرسائل على مراقب المنتدى كنوع من الاحتجاج السلمى
3 - ردا على عدم التقدير وعد الرد عليا من اساسة اتلف كل مواضيعى (وانا عارف هعملها ازاى)
4 - استنى لما الايقاف يبنتهى واتحول لكائن سلبى يعنى ادخل المنتدى اتفرج زى الناس واحذف المواضيع اللى انا مجهزها عندى على الكمبيوتر (صور وفيديو) وتقريبا منها مواضيع جديدة لاول مرة من عينة فرامل ABS للدايو - اصلاح كل مشاكل كلاكس الانوس بالفيديو وبتكلفة 4ج فقط - كمبورسور هواء بتكلفة 30ج بالفيديو - عزل ارضية وصدر العربية بالارما فلكس .السلبيات والايجابيات ........الى اخر باقى باقى المواضيع اللى انا مجهزها للعرض وللتفاعل

وبصراحة انا محتار
ومحبط
ومتعكنن
ومش عارف اقرر
فقلت اسألكم

المشاركة الأصلية كتبت بواسطة leitosr

بصراحة انا لما قريت كلامك أتعكننت برضه, لسبب غير اللي أنت متعكنن عشانه,,!!!

هوا اللي بيعمل خير يا أخي بيعمله لوجه الله وبيحتسب الأجر والثواب عنده وعشان يفيد بيه الناس حتي لو عضويته أتوقفت تكون زي عمل صالح ليه, كل اللي يقرأ ويستفاد من مواضيعك يدعيلك,

ولا أنت بتعمل المواضيع عشان تتنسب ليك وتتفاخر بيه,, وعشان تاخد كام كومنت وكام رد وتقول أنا وفرت عليكم كذا كذا بأفكاري الرائعة ولحم كتافكم من خيري.!!

*وملحوظة أنا مش من أدارة المنتدي ولا تبعها, بس أنت مش هتعرف تعمل حاجة بخصوص المواضيع القديمة ولا تتلفها,,


هوا انت هتذل الناس وتطلب منهم أنهم يحتجو بالنيابة عنك,, عشان تتفضل مشكورا بوضع المواضيع دي ليهم ؟؟
ومن غير كدا مش هتعبرهم يعني وتفيدهم زي ما أستفدت من المنتدي قبل كدا ؟

بصراحة طريقة تفكيرك عكننتني,
راجع نفسك يا أخ ظريف وربنا يوفقك.

ممكن تكون حضرتك بتفكر بالطريقة دى فعشان كدة متخيل ان كل الناس بتفكر زيك
موضوع التباهى والتفاخر واخد كام كومنت دول يفرح بيهم طالب فى اعدادى

لكن لو انت قريت المشاركة كويس هتلاقينى كاتب انى اعتذرت للادارة (ومحدش جابرنى انى اعتذر ممكن اكبر دماغى عادى جدا لحد الايقاف ما يخلص) ولما طلبت الاستثناء طلبتة من المنتدى عشان خاطر المنتدى مش عشان خاطر نفسى

برجاء تأكد اولا ان مش كل الناس بتفكر زيك
لان واضح انك شايف الامور من منظورك الخاص ومن طريقة تعاملك مع الناس