الموضوع: تقرير استخدام الامجراند 7 بعد 23,000 كلم و 9 شهور -حصري

تقرير جميل يا باشا وانا من اول ما شفت مقدمة الموضوع عرفت حضرتك بانك مؤسس جروب العربية علي الفيس من اسلوبك و العربية برة مصر عاملة مبيعات كبيرة وفي مصر المبيعات ارتفعت في البداية وبعدين انخفضت مرة واحدة ودة بسبب تقريبا استهتار التوكيل و اعترض معا حضرتك في نقطة العيوب لان العيوب الي قابلت حضرتك دي في عيوب تانية اكتر منها قابلت ناس تانية و من متابعتي للعربية هنا و علي الجروب علي الفيس ملاحظ ان التوكيل زي الزفت مش مرضي ولا حاجة وناس كتير بتشتكي منة و للاسف اي عيب حصل في العربية من العيوب الشائعة زي فبرة التانك و لمبة التشيك و التكييف و السحب و الكاسيت الي بيعلق متحلش منها حاجة في موديل 2014 غير تغيير سوفت وير العربية عشان لمبة التشيك و باقي العيوب الشائعة غبور معملش فيها حاجة و احييك علي التقرير المحايد يا باشا وتقبل مروري

المشاركة الأصلية كتبت بواسطة sky_rider

عزيزي ميدو :) .. من الواضح انك متابع في كل حته .. و من الواضح برضو ان حضرتك بتاخد الكلام من الناس وليس عن تجربة .. في بس نقطة فايتة على كتير من الناس .. انهي عربية في الدنيا مهما كانت جيدة هتلاقي نسبة رضاء عنها 100% ؟؟ .. شوف اللي في فئتها السعرية من كل الماركات .. بل والاغلى منها .. تصفح المنتديات و الجروبات على الفيس ... هتلاقي برضو ناس بتشتكي من مشاكل متفرقة ... خلفية مالك العربية مهمة برضو فتوصيفه للمشكلة .. يعني ايه رأيك في واحد راح يتخانق في التوكيل عشان طلبو منه 330 جنيه للزيت و الفلتر و قعد يزعق و يقلهم العربية في الضمان انا مش هدفع حاجة .. :) على اساس يعني الضمان هيغيره الزيت و الفلاتر .. و مش بعيد يكون مستني يفولهاله بنزين ... .. العيوب البسيطة اللي انت ممكن تفول انها متكررة حاجتين او تلالته وتافهين جدا ... و مش موجودين غير في اقل من 10 % من السيارات المباعة فقط .. صحيح هي نسبة مش قليلة بس برضو متقدرش تقول انها مشكلة عامة في كل العربيات .. و طالما التوكيل متكفل انه يعملها يبفى ماشي الكلام .. فبرة باب التنك انا غيرتها مرة واحدة بس :) .. و من ساعتها شغالة تمام .. لمبة التشيك انجن عمرها ما نورت عندي زي ما ذكرت .. هما دول المشكلتين اللي اتذكرو اكتر من مرة من ملاك العربية في الجروب .. غير كدة حاجات فردية و متفرقة زيها زي اي عربية ... انا عارف ان التقفيل المصري و المكون المصري بيزود نسبة المشاكل و الاعطال .. بس الحمد لله بتيجي في حاجات صغيرة و بتتعمل .. انت برضو ذكرت التكييف و السحب من تعليقات بعض الملاك عنها .. بس في مئات من الملاك معندهمش مشكلة لا في السحب و لا التكييف .. زي العبد لله .. وقت لما بدوس بنزين و اقرر اشد ... عمرها ما بتخذلني .. بل بالعكس .. السمارت درايف فيها بيحس بالدوسة و يفصل كومبريسور التكييف لو شغال عشان يديك العزم المطلوب لحد ما تخلص شدتك و بيشتغل تاني لوحدة لما رجلك بتهدى على الدواسة .. و الحمد لله معنديش اي شكوى من التكييف .. شعال كويس جدا علما اني في شرم الشيخ و درجة الحرارة هنا 40 فما فوق ... اتمنى من الله انها تفضل مرضية بالنسبالي و مغيرش انطباعي عنها مع الوقت على الاقل اول 100,000 كلم

تقبل تحياتي ..

تمام يا باشا معاك في نقطة مفيش عربية مفيهاش عيوب بس لما تكون عربية جديدة وفيها عيوب وان كانت بسيطة بس مقرفة دي هتزهق مالك العربية و الي بيضايق اكتر ان الوكيل مبيصلحش العيوب دي في الموديلات الجديدة ومش مهتم بالعربية خالص وبالنسبة للاستاذ الي اتخانق عشان تمن الصيانة دة انا مش عارف اقول اية والله بس دة راجل علي نياتة وفاهم الدنيا غلط و الي فهموة فهموة غلط و العربية انا متابعها من اول ما نزلت وكانت عجباني جدا جدا جدا وكنت بحبها جدا ومازلت بحبها ولما بشوفها في الشارع لازم اركن وانزل ابص عليها ولو فيها حد بتكلم معا ملاك العربية واشوفها عاملة معاهم اية منهم واحد فضلت ماشي وراة ييجي ربع ساعة لحد ما ركن وقالي بالحرف العربية دي جميلة جدا فيها شوية عيوب اة بس في المجمل عربية جميلة جدا وعيبها الوحيد هوة التوكيل غبور لو العربية معا توكيل تاني كانت هتعمل شغل رهيب و باقي الناس الي كلمتها برضو اشتكو من التوكيل وناس كتير في الجروب علي الفيس برضو بتشتكي من التوكيل وانا عارف ان العربية معا حضرتك كويسة وربنا يحفظهالك وتبقي احسن واحسن وربنا يحسن الحال وغبور يهتم بالعربية دي شوية ويعالج العيوب الي ظهرت سواء عامة او فردية عشان العربية تاخد مكانتها الي المفروض تاخدها في السوق واسف علي الاطالة وتقبل مروري

المشاركة الأصلية كتبت بواسطة mazagangee

العربية مش وحشة خالص ........ لكن محتاجة وقت عشان الناس ترجع تثق فيها زي اول ما نزلت بسبب تصرفات الوكيل اللي كان ممكن بسهولة و شوية ظبط يلم الليلة و كانت هتبقى العيوب دي دعاية ليه كمان لو كل واحد يشتكي من حاجة يهتموا بيها و يصلحوها كويس كانت هتبقى احسن دعاية ليه كصيانة و متابعة ما بعد البيع ..

العربية في فئة سعرية بتنافس فيها و هتكون اختيار عدد مش قليل من الناس رغم وجود مشاكل و عيوب فيها ..

غبور هوة الي بيدمر في العربية دي بالاستهتار بتاعة