الهاند بريك

**eldeplomasy** · 07-09-2008 05:11 AM

عندي في الشاهين موديل 2006 الهاند بريك عدد التكات فيه لما اجي اشده 3 وكانت الفرامل ضعيفه بس كان سحب الموتور كويس فلما رحت التوكيل وضبطلي الفرامل بقت الهناد بريك 2 بالعافيه وسحب العربية ضعف وحاسس انها قافشه شوية وفلما ضبط الهاند بريك ل 3 تكات سحب العربية اتضبط بس الفرامل رجعت ضعفت تاني

فكنت عايز اعرف السبب وايه العلاقه بين الهاند بريك وفرامل الرجل وايه الضبطه الصحيحه للهاند بريك كام تكه؟؟؟

وشكرا جزيلا مقدما

**eldeplomasy** · 07-09-2008 01:55 PM

هو مفيش مهندسين بيدخلوا الموقع في رمضان ولا ايه؟؟؟

**chihab18** · 07-09-2008 03:11 PM

انا عاوز اسال نفس سؤالك ؛ الفرامل بقت تكتين بدل اربعه ؟

**Akram** · 07-09-2008 06:29 PM

فرامل الرجل بتمسك الأربع عجلات في نفس الوقت لكن فرامل اليد بتمسك العجلتين الخلفيتين ,
فلو انت سايب فرامل اليد و أثرت على السحب و انت ماشي , فده معناه ان الفرامل قافشة على طنابير العجلتين الخلفيتين و ده كمان بيأثر على الطنابير الخلفية بالإضافة لتأثيره على السحب ,
لو تيل الفرامل الخلفية جديد يبقى الفرامل ممكن تكون 5 تكات لكن لو التيل خف شوية فالميكانيكي بيلجلش على فرامل اليد علشان تمسك على تكة أقل ,
المهم ان الفرامل تمسك و متكونش قافشة على الطنابير .

**mrghost** · 07-09-2008 11:11 PM

بص ياباشا انت ممكن ترجلش فرامل اليد من عند الذراع اللى جنب عصا الفتيس هتلاقى صاموله 13 كل ماتربطها الفرامل تشد والعكس بس بعد ماترجلش امشى بالعربيه وشوف العجل اللى ورا بيسخن ولا لا وبكده تظبطها زى ما انت عاوز من غير ماتخلى العجل اللى ورا يسخن اوى ويكتف العربيه يادوب يكون دافئ وشكرا

**chihab18** · 08-09-2008 12:33 PM

انا لما بمشي علي السرعه المنخفضه في الزحمه يعني امشي متر واقف ومتر تاني واقف الاقي في صفرة في العجل علما بان لما بمشي عادي السرعه الطبيعيه داخل البلد 20 كليو او اكتر مابسمعش صوت صفرة ؟ فياتري السبب ايه ؟

**AHMEDCAR** · 08-09-2008 02:07 PM

الافضل انه يرجلش من عند الفرده نفسها

**hazem_khidr** · 08-09-2008 07:03 PM

المشكله عندك ان الفرامل ضعيفه
شوف ماستر الفرامل
اصل 3 تكات بالنسبه لفرامل اليد كويس جدا

**Akram** · 08-09-2008 09:20 PM

المشاركة الأصلية كتبت بواسطة chihab18

انا لما بمشي علي السرعه المنخفضه في الزحمه يعني امشي متر واقف ومتر تاني واقف الاقي في صفرة في العجل علما بان لما بمشي عادي السرعه الطبيعيه داخل البلد 20 كليو او اكتر مابسمعش صوت صفرة ؟ فياتري السبب ايه ؟

صوت التصفير ده غالباُ التيل محتاج يتنضف ,
لو تعرف تفك التيل و تنضفه بصنفرة أو زي الميكانيكية بينضفوه بالفرك على البلاط ,
و لو مش تعرف يبقى روح لميكانيكي و يعملك الحكاية و مش هياخد وقت .

**chihab18** · 08-09-2008 10:47 PM

المشاركة الأصلية كتبت بواسطة Akram

صوت التصفير ده غالباُ التيل محتاج يتنضف ,
لو تعرف تفك التيل و تنضفه بصنفرة أو زي الميكانيكية بينضفوه بالفرك على البلاط ,
و لو مش تعرف يبقى روح لميكانيكي و يعملك الحكاية و مش هياخد وقت .

الصفرة من غير ما ادوس فرامل يعني والعجل ماشي ببطء ؟ علما بان الفرامل فعلا نظفتها بالطريقه اللي انت بتقول عليها من حوالي اسبوعين ؛ بس فضلت الفرامل ضعيفه كذا يوم لحد ما رجعت قويه تاني
والصفرة دي بتختفي تماما والعربيه ماشيه بالسرعه العاديه لها اما في السرعه البطيئة بتبان ؛ وده اللي محيرني ؟