محتاج شقه إيجار في أكتوبر .. وتجربة بحث مع السماسره
السلام عليكم ورحمة الله وبركاته
يوم السبت اللي فات نزلت لفيت في اكتوبر .. وكان معايا والدي وجوز اختي بعربيته
صراحه تعبنا جداً ولفينا كتير واليوم ضاع من الصبح .. وكل دة ماشوفناش غير يعتبر الحي ال 11
بس كنا بنروح ونرجع على نفس المكان اربع وخمس مرات
بصينا على الرابع من برا خاالص وسألنا بواب قال معرفش
دخلنا ال 11 على امل اني الاقي فيه حاجه مناسبه وتعجبني من حيث الموقع والمساحه والتشطيب الخ
صادفنا مكتب سمسار سألناه .. قال عندي شقه 68 متر ب 700 جنيه و مش عارف ايه ب 1100
والمده سنه .. سيبناه ومشينا
دخلنا الحي 12 لسمسار هناك اسمه الملتزم قصاد كافيتريا الخديوي علشان يفرجنا على شقه في ال 11 .. ب 800 او 700 مش فاكر .. 65 متر وصاحبها كان بيديها وش نقاشه .. ماعجبتنيش وماتفقناش
روحنا لسمسار تاني جنبه .. معندوش شقق ايجار فاضيه .. الموجود مفروش
وسمسار تاني كنت جبت رقمه واعلان لشقه من عالنت فرجنا على شقه على اطراف ال 11 من ناحية ال 12 .. 100 متر وحالة التشطيب تعبانه " هتصرف تشطيب كتير " وبنفس الوقت كبيره اوي عليه كمساحه وموقعها ماعجبنيش .. ب 800 جنيه وسنتين والسمسار اتصل تاني يوم قالي 4 سنين .. ماعجبتنيش في حجات كتير
روحنا لسمسار خامس في طريق منطقه اسمها ال 109 و ال 103 باين .. معندوش بردو وقال اصبروا شهرين يكون السوريين مشيوا والدنيا تظبط تاني والايجارات تنزل
كل ده واحنا بنلف بردو بالعربيه في الشوارع ندور على حد نسأله او نلمح اعلان شقه ايجار
كل اللي بنشوفه اعلانات سماسره وتليفوناتهم او مكاتبهم .. لدرجة اني كنت اتصل باعلان سمسار من يافطه .. يطلع نفس السمسار اللي كنت اتصلت بيه من شويه في اعلان تاني
جينا راجعين للسمسار الاولاني خالص اللي قال شقه 65 متر ب 700 وسبناه ومشينا
لقيت مكتب سمسار اسمه الاسلاميه عند " كشك الموف "
دخلناله فرجنا على شقه في المساكن اللي في وشه تبع الحي ال 11 .. 65 متر على الشارع نفسه اللي اسمه شارع التحرير بعد كشك الموف بشويه على يمينك وانت رايح على ال 12 كده
وخلفها سنتر اعتقد اسمه البكري
الشقه الخامس والاخير وتشطيبها جيد جداً .. يعني تتنضف وتفرش عفشك
محتاجه بس حجات بسيطه جدا زي سلك مقطوع على شباك عايز يتغير .. عتبه لباب الشقه علشان الحشرات
لكن السباكه تمام وكله سليم وشغال ونضيف .. الدهان نضيف وشكله حلو .. الارضيه سيراميك مش بلاط عادي زي اللي شوفتهم قبلها
صاحب الشقه مغير نظامها فخلاها
غرفه كبيرره .. ورسبشن قطعه واحده ولكن مناسب ومعقول .. وحمام كبير ومطبخ كبير
والشقه عليها باب حديد
الشقه عجبتني .. صحيح ماكنش ده طموحي وتوقعي قبل ما اروح اكتوبر اتفرج .. لكن بعد الدوخه واللف حسيت ان دي افضل حاجه متاحه
كموقع جنب الخدمات وجنب كشك الموف علشان المواصلات .. وكهدوء .. ومساحة الشقه على ادي .. وتشطيبها حلو
الايجار 700 وتأمين شهر .. والمده سنه وهي دي المشكله
دة موقعها Wikimapia - Let's describe the whole world!
روحت تاني يوم اللي هو امس بنية اني اكتب عقدها حسب ماتفقت مع السمسار
واتعشمت اني لما اقعد مع صاحب الشقه اقنعه بسنتين على الاقل .
لقيت الشقه صاحبها مش موجود واخته اللي قاعده في اكتوبر هي اللي هتكتب العقد وكده
كلمتها على سنتين رفضت .. وقالت انهم هيجددولي طالما انا كويس معاهم وهما مش محتاجين الشقه وقعدت تحلفلي
قولتلها طيب هدفع ايجار بدل 700 هيبقى 750 بس لمدة سنتين .. وهتجزي معاكي افضل من ال 10% اللي عايزين تزودوها بعد السنه في حالة التجديد .. بردو رفضت
طيب السنه بالنسبالي 10 شهور لأن انا هنقل في شهر .. ولو همشي فيها شهر قبلها .. فكده انا سوحت روحي ومش هحس اني مستقر وهبقى في حالة قلق وتوتر
قولتلها طيب هنكسر السنه بس ونخليها سنه ونص يعني 18 شهر .. وبعد السنه تزيد النسبه اللي تحددوها وتكتب في العقد من دلوقت .. رفضت
اديتني صاحب الشقه في التليفون كلمته .. لقيته مصمم على سنه بردو وبيقول علشان نجربك وهنجددلك
قولتله انا لو وحش مش هفضل اجي على نفسي كده وطلبي مش كتير مقابل تنازلاتي .. انا طالب 6 شهور زياده فقط ومش ببلاش .. وانا اساسا قاعد في شقه حالياً افضل منها بكتير كتشطيب وانا اللي مشطبها ومركب تكييف غالي هيكلفني في نقله .. وقاعد اهلي جنبي بنفس المنطقه واخواتي وولاد اخواتي وكل الدنيا عندي
لكن انا عايز اهرب من الدوشه واطلع من العشوائيات .. وتقدر تشرفني في بيتي وتشوفني عايش ازاي بما انك في منطقه جنبي .. علشان تبقى مطمئن اكتر .. بردو رفض
ورفض كمان اني اركب التكييف علشان هكسر مكان ماسوره التكييف الاسبليت .. رغم اني قولتله دي بتبقى فتحه صغيره وهسلمهالك زي ما سلمتهالي .. واللي بيني وبينك ايجارك كل شهر وتستلم شقتك بعد المده بحالتها ومعاك التأمين لأي ملاحظات
اخته قالتلي .. ازاي ؟ مش هو هيجي ويعدي عليك من وقت للتاني ويدخل ويبص على شقته من جوه ويطمن ان كل حاجه بحالتها
قولتلها .. فرصه سعيده وانا مليش نصيب فيها كده
دي تجربتي في البحث داخل اكتوبر ومحاوله كتابة عقد شقه
اللي انا عايزه .. شقه مش كبيره لأني لوحدي .. وانا اللي بنضف وبعمل كل حاجه لروحي
الشقه الكبيره هتتعبني في نضافتها وعفشي مش هيبان فيها .. والتكييف مش هيعمل فيها حاجه
فالصغيره هتريحني في كل حاجه
وعايزها اطول مده ممكنه 3 سنين مثلا او سنتين اقل شىء لو الشقه زغللت عيني يعني
ماتكونش في حي شعبي او مكان مطرف او كئيب او الخدمات بعيده عنه او المواصلات بعيده عنه
هدوء تام .. جيران في حالهم .. اقدر اجيب فيها تليفون ارضي علشان النت .. وتكون الشقه متشطبه كويس ونضيفه وتشطيبها معمول صح .. لأن في شبابيك بتبقى راكبه صراحه عايزه تتشال وتركب من جديد .. تلاقي في فرق بين الشباك والحلق يعديلك ابراص .. وانا بقرف مالحجات دي اوي .. وماتكونش دور ارضي ولا اول
انا شغلي كله جوه شقتي وحياتي كلها جوه شقتي .. وبقعد بالايام ماطلعش برا الشقه .. مابحبش حد يجيلي ولا بحب اروح لحد .. ومش فاضي ولا رايق اني اضايف حد
بمعنى اصح عايز افضي دماغي واروق بالي لشغلي ومايشغلنيش مشاكل فرعيه او حجات مزعجه .. علشان عندي هدف عايز احققه
في ناس بتسألني ليه مش عايش مع اهلك رغم انه بيتنا وفيه بدل الشقه شقتين فاضيين وبيتنا بتاعنا
اسباب كتير اهمها انه في مكان مطرف جنب الدائري ومفيش نت .. اللي هو اساسي علشان شغلي
ياريت اللي عنده شقه في اكتوبر بالمواصفات دي او يعرف حد عنده يدلني عليه .
