بقالى كام يوم بسمع صوت طقطقة فى الملفات ودا طبعاً لأن الكوبلن الشمال عندى كان ضارب من أول ما أشتريت العربية من حوالى سنة ونظراً لأن فى المنطقة اللى ساكن فيها فيها إصلاحات رهيبة لخطوط المياه والشوارع بالكامل محفورة من أكثر من سنتين ( أه والله سنتين والأحداث السياسية كمان بتعطل الشغل أكثر ماهو عطلان ) المهم قلت خسارة أشترى كوبلن جديد ويحصله حاجة فقررت إنى أكبس الكوبلن وفعلاً فكيت اليمين كمان بالمرة عشان لقيته كان بدأ هو كمان يضرب وعملتهم الأتنين والكلام ده من حوالى 5 شهور لكن الظاهر شوارعنا الغالية عملت شغلها
المهم قلت أروح للعفشجى بص وعرفنا اللى فيها وقلت ليه ربط العفشة ونأجل تغيير الكوبلن لآخر الشهر على ما تفرج :Oc_sun1[1]: ولكن لاحظ وهو بيربط العفشة إن قاعدة الماتور الخلفية مكسورة وفعلاً كان عامل صوت طقطقة لكن مكنتش قادر أحددها بشكل منفصل وكنت فاكره الكوبلن
أشتريت قاعدة جديدة وفلتر بنزين بالمرة ورحت للميكانيكى فك يا عم وركب والورشة ماشاء الله زحمة كالعادة لانوس ( زبون مستديم كل ما أروح لازم يكون فيه واحدة أو أتنين بيصلحوا الفتيس وطقم الدبرياج ) على فيرنا على ميتسوبيشى ( كان خابط مش عطلان ماشاء الله عربية تحفة وكان بيطمن على الموتور ) وكان عنده كمان لادا بتغيير طقم شنبر ( اللهم أحفظنا ) من الساعة 2 الضهر وروحت بالعربية ورجعت ليه الساعة 5 الوضع كما هو قلت مش ماشى غير لما أخلص وخلصت على الساعة 8.30 م وكله بقى تمام والحمد لله
نرجع بقى لسبب كسر قاعدة الموتور إنى كنت دايماً بعمل فرملة على خفيف بالغيار ومش بعرف أعمل الحركة بتاعت دوسة البنزين بكعب الرجل مع الفرامل فكان بيبقى حمل كبير على قواعد الموتور والميكانيكى قالى الموتور والقواعد مش حمل الموضوع ده وعليه قررت إنى أبطل الحركة دى وربنا يذكرنى بقى لآنى أتعودت عليها