ايه الحاجه اللى تخرجني من روتين الحياة والالتزامات ؟

**A3SAR** · 09-09-2013 07:37 PM

ازيكم يا شباب ..
جوايا اليومين دول زهق رهيب ., ومش عارف ناتج عن ايه
وبقيت بدور اشتري عربيه عشان اكسر الملل ده اهو حاجه جديده وتغيير
ورغم ان الحياة الزوجيه اليومين دول بقت صعبه من ايجار شهري كبير وجمعيات غير العيشه والاسعار اللى بقت تجنن .,. واللى حتي بقت تخلي الواحد كل ما يفكر يسافر اسكندريه مثلا يوم يروق فيه يفكر الف مره عشان الميزانيه متخربش
طبعا ده غير ان احوال البلد متخليش حد عاقل يفكر في فسحه اليومين دول ..
احنا محتاجيين فكره جهنميه تخلي الواحد يخرج من الملل والزهق اللى هوا فيه
بقيت كمان وانا قاعد في البيت عايز اروح الشغل ولما اروح الشغل عايز اروح البيت
اهو تمرد علي الوضع اللى بكون فيه وخلاص
انا مش عارف فيه حد بيجمعني نفس الشعور ده اليومين دول ولا لا
علي فكره انا حتي قنوات التوك شو في التليفزيون رجعتها ورااااااااا خالص عشان لما افتح التي في متفرجش علي حاجه منهم .. الواحد مبقاش ناقص اخبار تسد النفس
المشكله قبل الجواز كان الواحد بيطلع اليكس في اى وقت حتي لو الفجر ويجري بالعربيه ولا كان بيهمه وياما عملت حوادث وكانت الامور كلها بتتلم ولا كان بيهمني .. دلوقتي بقت حياتي بالورقه والقلم وده خنقني جدا
بس انا بقول مؤكد ان الناس بتلاقي حاجه تخرج نفسها من الروتين اللى بعاني منه ده .. ايه هي الحاجه دي بقي ده اللى بسأل عليه .. ؟

**Dr_Mido** · 09-09-2013 07:43 PM

افصل ده الحل الوحيد والمجدب والناجح

**A3SAR** · 09-09-2013 07:46 PM

طيب افصل ازاى .. ??
ده السؤال

**mohamed_selim** · 09-09-2013 08:12 PM

هات بلاى ستاشن و علم مراتك و العبو سوا !

**mostafa3000** · 09-09-2013 08:13 PM

فكر في الأكس بوكس

**reda elgohary** · 09-09-2013 08:29 PM

أنا جبت ذراعين بلاي ستايشن وعلمت زوجتى وبلعب معاها ، وبفكر أشتري طربيزة تنس طاولة ،، وكلو كسر للملل .
ربنا ييسر .

**reda elgohary** · 09-09-2013 08:30 PM

ربنا يصلح حالك وييسر أمرك ، وربنا يبعد عنا الشر .

**aliabdo** · 09-09-2013 08:39 PM

اطلع على مطروح قضى لك اسبوع هناك اخر روقان و هدوء و المصاريف فى المعقول

**mastr_n** · 09-09-2013 09:12 PM

الحمد للة مش لوحدى
فعلا واللة كنت لما بسافر اسكندرية ماسفرش ألا الساعة 2 بليل ومعايا البيت كلة والدنيا كانت أمان
دلوقتى الواحد بيفكر الف مرة لما بيسافر وطبعا بالنهار

واللة ياأخى مش لوحدك انا بحكم شغلى بشتغل شهر وشهر يعنى لما بكون فى الشغل برة مصر واللة وانا فى اول اسبوع بكون هاموت على مصر ونفسى انزل ولما انزل بكون عايز ارجع تانى

وفى الأجازة لما بنزل اخرج مع صحابى نص ساعة وعايز اروح فعلا الشارع مابقاش زى زمان
الناس اللى كانت ماشية بتضحك اختفت من الدنيا
عايز تسوق عربيتك لازم تحط اعصابك فى تلاجة وتقفل ازازاك عليك ومالكش دعوة بحد وعلى قد مشوارك وترجع بجد حراااااااااااااااااااااام حرقة الدم اللى الواحد بيشوفها فى البلد وكمية قلة الادب
والسلوكيات الغلط والبلطجة

معلش بفضفض معاكوا لأنى بحكم شغلى بسافر كتير وبزرو دول كتير فعلا بقينا من اسوء الشعوب

بس ان شاء اللة البلد من فضل ربنا لسة فيها ناس محترمين وهاترجع تانى زى زمان