الموضوع: لو سمحتوا يا جماعة ساعدوني - العربية بتدور زق

اكشف على البطاريه ده اول حاجه ومعاه ايضا يتم الكشف على الدينمو
واعطال الدينمو اما كتاوت او سيليكونات الكتاوت ممكن تتغير فى حالة السيلكونات الدينمو كله بيتغير وهو استيراد من 250ج الى 300ج
وملحوظه هامه
فى حالة السيلكونات ممكن تلاقى الدينمو شحنه تمام ولاكن بيهرب كهرباء عند ايقاف العربيه وتركها ويفضل يهرب كهربا طول ما الدينمو سخن واول ما الماتور يبرد بتفصل تهريب وعشان كده اكتشاف الموضوع ده صعب جدا لأنه بيحتاج متابعه من الصنيعى ولازم يستنى العربيه لما تبرد ويختبر تهريب الشحن لاكن للاسف لما بتيجى تروحله للورشه بيكون الماتور سخن وطبعا بيكتشف ان فيه تسريب كهربا من العربيه (من خلال تأختبار تهريب الشحن ) ويبتدى يدور ودماغه دوديه لكل حاجه وبعد كده يلاحظ ان التهريب أنتهى ( طبعا ديه خدعة السيلكونات ) فيفتكر ان الى كان بيصلح فيه ظنا منه ان ده العيب اتصلح وكل حاجه بقت تمام وبعد ماتمشى بالعربيه من عنده وتتركها للصباح تنام البطاريه تانى ودوخينى يالمونه .


طيب نكتشف ان فيه تسريب كهرباء بالعربيه ازى من الطريقه الأتيه
تتاكد من اطفاء جميع كهرباء العربيه تماما
هتجيب لمبة 5 امبير مثلا زى بتاعت صالون العربيه كده وتوصل على قضبيها سلكتين
تخلع قشاط قضيب البطاريه السالب (-) الى هو سلك العربيه الأرضى وتوصله باحد سلوك اللمبه والطرف الأخر بقطب البطاريه السالب (-)مباشرة
لو اللمبه نورت يبقى فيه تهريب منورتش يبقى لا يوجد تهريب كهرباء
وفى الحاله ديه اما العيب فى البطاريه نفسها او فى كفاءة شحن الدينمو