معلومات جديدة حول باور الابيزا و الكوردوبا 2001 من واقع كاتالوج عربيتي
السلام عليكم احبابي و اصدقائي
من خلال متابعتي لعربيتي الفترة الماضية و صيانتها قلت ابص علي زيت الباور او بمعني اصح هو اسمه سائل الباور لأنه مش زيت
المهم لقيت مستوي سائل الباور عندي اعلي من ال min قليلا جدا يعني قرب في مرحلة الخطر و العربية عندي بقالها سنتين و نصف و 55 الف كيلومتر بعد المائة الف عند المالكين اللي قبلي يعني وصلت الأن 155 الف كيلومتر من عمرها
فكرت اغير سائل الباور فقلت استشير اخوتي و من سبقوني عن خبرة في هذا الجزء من السيارة المبهم في صيانته بالنسبة لي سألت اخي احمد مبارك قال لي ان اي حد بيغيره الطلمبة بتزن !!!!! اوباااااااا ؟؟؟؟ و هنا خفت و قلت مش هغير و هو قلي زوده و كبر مخك خليها ساكته و شغاله
سألت اخي ابو السيد قلي ممكن تعمل اخف الضررين و تسحب كل سائل الباور اللي في قربة التزويد و تحط جديد و تبقي كده غيرت تقريبا الزيت بنسبة تصل الي 80 % و تبقي برده مفضيتش الدورة و تبعد عن قصة الزننننن بتاع الطلمبة و المعتاد حدوثه مع اي تغيير او فك لدورة الباور في كل العربيات دي سواء بولو او ابيزا او غيرهما من المجموعه
كلام الاتنين منطقي ..... قلت اشتري زيت بدأت ادور و اشوف عشان مجبش حاجه غير الصح قلت ياد ما تفتح كاتالوج العربية اللي عندك و تشوف بيقولو ايه عن القصة دي و نوع الزيت و هنا لقيت مفاجأة
1- لا يوجد نوعية لزيت الباور في كاتالوج عربيتي الكوردوبا 2002 و متكلمين بما فيه الكفاية حول زيت الموتور و سائل الفرامل و سائل التبريد و حكايات من هنا للصبح و لكن لا يوجد مواصفات او نوعية لزيت الباور و ده كله و غيره كتيييييييييييييير مشروح في جزء الكاتالوج اللي اسمه owner manual
2- في كتيب الصيانات الدورية اللي اسمه inspection and maintenance plan و ده احد اجزاء من الكاتالوج عندي بيقول ان بعد كل 60 الف كيلومتر فقط بيتم عمل تزويد لسائل الباور لو احتجت لذلك مكتوب كده بالانجليزي :-
power steering :- check fluid and if necessary , top up .
و بس و شكرا علي كده ولا فيه تغيير لسائل الباور و لا نوع و لكن فيه بعض التعليمات في الكتيب الأساسي
3- التعليمات التي ذكرت في كتيب ال owner manual حول الباور ستيرنج عموما و هي كالتالي :-
do not keep the steering wheel fully turned more than 15 seconds when the engine is switched on , as the hydraulic oil will be heated to high temperature by the servo pump
this could damage the power steering system
furthermore every time you turn the steering wheel as far as it will go the engine off , you will hear a series of noise made by the excessive effort of the servo pump . the engine tick over may also be reduced for a short time
طبعا حبيت انقلكم الكلام حرفيا أن الترجمة ممكن تتفهم بطريقة و عن جزء معين و تترك بعد أخر بما يكون ليه دلاله معينه
طبعا المفهوم ان مينفعش نجيب العجل الباور للأخر يمين او شمال لمده اكثر من 15 ثانيه لأن ده هرفع درجة حرارة السائل جدا بواسطة طلمبة الباور و ده هيجيب اجل نظام الباور عموما بدري بدري ....
بالاضافه الي انك مع كل مره بتلف فيها العجل بزياده فده هيخلي المحرك يقف اكتر و هتسمع صوت للباور بزياده ناتج عن الجهد الزائد لطلمبة الباور
اخر جمله مش فاهمها قوي و برضه الترجمه ليها مش مفهومه و اتمني اللي يفهم منها حاجه يقول (the engine tick over may also be reduced for a short time)
و بالتوفيق للجميع و اتمني نفتح باب النقاش حول هذا الموضوع عشان كمان عايزين نعرف نغير سائل باور نوعه ايه و شكله ايه و صناعته فين و هل ينفع سائل الفتيس الاتوماتيك ولا لأ و هكذا
