عربية الست عطلانة

**janagabr** · 10-09-2013 12:25 AM

طبعا في ظل انتشار اخلاقنا الحميدة وما نمتاز به امانة وحب الغير بل يصل احيانا الي ايثار مصلحة الغير علي النفس

وطبعا احنا عارفين ان المرأة نصف المجتمع بس المرأة عندنا طماعة شوية فاصبحت المجتمع كله وبما ان القانون عندنا بيفحت اي حد تسول له نفسه التحرش بالمرأة

علي فكرة احنا تاني دولة علي مستوي العالم في التحرش بالمرأة

حبيت احكي عن ما يحدث لها يوميا من تحرشات عندما تتعطل بها السيارة

انا لا استطيع ان اري واحدة ست او بنت واقفة وعربيتها عطلانة واسيبها لوحدها لازم انزل اطمن انها مستنية حد جايلها او في حد ثقة واقف معاها بيصلحلها العربية ويا سلام لو وقفلها تاكسي ولا موتوسكل باتجنن واركنلها علي طول

فمرة نزلت لواحدها قولتلها اي مساعدة قالتلي شكرا ربنا يخليك في سواق تاكسي ربنا يكرمه خد فردة الكاوتش النايمة وراح عند اقرب بنزينه يصلحها وجاي علي طول قولت طاب استني لحد مايجي ( ساعة اتنين تلاتة يوم شهر ) الراجل مجاش وانا كنت عارف اصلا انه مش راجع لأ كمان من طيبة الست اديته 50 جنية عشان مايدفعش حاجة من جينة ( كنت هاعيط من الطيبة ) قولتلها كلمي حد من اهلك خليه يجي ويديلك الاستبن بتاعه لحد ما تروحي وفضلت معاها لحد ما ابنها جه

مرة تانية واحدة بنت محترمة جدا عربيتها عطلانة فاتحة الكابوت وقاعدة جوة العربية كنت ماشي علي رجليا ايام الصحة قولتلها العربية عطلانة لقيتها كانت بطعيت ايه يا بنتي في ايه قالتلي جه ولدين بموتوسكل يساعدوها وهي سايبة شنطتها علي الكورسي وواقفه مع واحد عن الكابوت قام التاني خد الشنطة وهي مش واخدة بالها وجريوا فمكنش معاها فلوس ولا الموبايل قولتلها طاب خدي موبايلي كلمي حد خليه يجيليك قامت مكلمه باباها والراجل جه وجاب الميكانيكي بتاعه وقاعد يشكرني وكان عايز يديني فلوس بس طبعا رفضت

مرة تالته كنت راكن بالعربية مستني واحد صاحبي وكالعادة مواعيدة مظبوطة لقيت واحدة عربيتها عطلت قدامي قولت في سري ( بقولك ايه فكك منها انت مش فاضي ) وفضلت قاعد متابعها اشوفها هتعمل ايه وطبعا فتحت الكابوت وفضلت واقفة قدامة شوية وفضلت تلف حوالين العربية اكنها بدور علي حاجة المهم جه سواق تاكسي روش ونجم نجم نجم ضارب النضارة الشمس والسلسلة علي رقبتة وفاتح القميص ومبين وساخة ( شعر ) صدره لحد كرشة ومفيم التاكسي ونزلها قولت لأ بقا وكالعادة نزلتلها وقولتها علي جنب انا همشي سواق التاكسي واساعدك انا عشان هو هيمصلح عليكي قاليتلي ماشي روحت للسواق قولتله مشكرين يا برنس شد انت ومد شوف اكل عيشك بدور العربية مالقيتش بنزين ( الكلام ده من اربع خمس سنين ) روحت واخد جركن وماليته وحطينا البنزين ومشيت وبرده صاحبي ماجاش غير بعد ما البنت ما مشيت بربع ساعة وكان عقاب التأخير لصاحبي اني شايلته الخروجة كلها علي حسابه

وفي النهاية هتلاقي ان مساعدة الاخرين في وقت زنقتهم بدون ماتاخد فلوس منهم ما هي الا مساعدة لنفسك اصلا

لانك اكيد هيحصلك مواقف زنقه زيهم مش لازم في العربية ممكن في شغلك في بيتك في صحتك فهتلاقي ربنا بيبعتلك اللي يساعدك او يحلهالك بمنتهي البساطة

لان لو البنت اللي هيا ضعيفة عطلت في الشارع في وسط المدينة واحنا الرجالة الاقوياء في مواجه الاخرين سيبناها

فممكن احنا الرجالة الاقوياء نعطل في الصحراوي او في حته مقطوعة وساعيتها هنكون ضعفاء زي البنات امام اقوياء الصحراوي والحتت المقطوعة اللي هما البلطجية وحاملي الاسلحة

نظرية برده يا كابتن

وفي النهاية نلجأ الي الله ان يفك كرب المكروبين

وان يهدي المصريين الي الخير والصواب

حفظ الله مصر ورزقها الامن والامان والاستقرار

**aw2100** · 10-09-2013 01:42 AM

ربنا يكتر من امثالك والخير اللى بتعملة يكون فى ميزان اعمالك تحياتى !!

**saddam** · 10-09-2013 02:19 AM

ربنا يعينك يا مواطن وكمل نضالك زي منته بس عايزك أنشط مرة من 4 سنين شفت بنت على طريق إسكندرية عربيتها آخر موديل عطلانة وكان ساعتها أيامها الواحد لما بيكون مبسوط ماديا وسعيد بيبقه بيقطر شهامة رحت بكل أدب بصيت على عربيتها لقيت الكمبيوتر ضارب بعد فحص ربع ساعة وقلتلها أستسمحك بالبطاقة قالتلي ليه قلتلها الدنيا بقت ليل وعربيتك لازم تتشال وإتفضلي آدي عربيتي وخدت موبايلها طلعت منه كام نمرة وإديتلها عربيتي الخاصة وإديتها الكارت بتاعي كل ده أيام مكنت غني قبل متيجي الثورة وأقفل شركتي وأضرب طقم تفليسة وخدت عنوانها وطبعا هي كإنسانة راقية جدا مقالتش حاجة إستغربت اﻷول ملحوظة عربيتها كانت مرسيدس عيون 2005 وعلى طول العربية المرافقة ليا طلعنا حبل السحب ورجعنا بالعربية لمصر وأنا مسحوب ووديتها مباشرة لصاحبي بيصلح كمبيوترات وكان قافل بيت معاها حد من الرجالة وروحت أنا بالعربية التانية مع حد من الموظفين والعربية إتصلحت تاتي يوم بمبلغ بسيط 500 جنيه طيعا حد غيري كان حبجيب كمبيوتر بمبلغ خرافي ومش عايز أقولكم كل شوية حد من أهلها يكلمني ككب إنتو فين طب العربية مفكرين أكون سرقتعا ولا حاجة رغم إني مديها عربيتي جيب 2009 زيرو النايلون بالكراسي طبعا طمنت أهلها وقلتلهم المهم تكون عربيتي بخير وكنت خايف عليها بصراحة المهم بعت عربيتها عملتلها حمام وغلفت الكراسي بالنايلون والرجالة عملولها بولش وتلميع وخدت العربية وديتهالهم أبوها طلع راجل محترم وطلع مسيحي كابتن في مصر للطيران وعملولنا غدا وكان كل فترة بيسأل عليا ولولا إن الواحد مكانش حابب يستغل المواقف دي كنت طلبتها للجواز
دلوأتي بعد 4 سنين لو إتعادت نفس الظروف تاني غالبا مش حوقف ولو وقفت ممكن أسحبها أو أديها جركن بنزين ﻷن دلوأتي فيه حرامية بيخلوك توقف عن طريق يصدرولك ست في مواقف زي دي يااه فغلا صدق المثل اللي بيقول الفلوس بتغير النفوس
خلاصة القول ساعد على طول حتى لو كان راجل مش شرط ست بس أمن نفسك كويس
ودمتم للنضال
صاحب الموضوع برافو

**Silent~Dream** · 10-09-2013 12:38 PM

بصراحه ده المفروض الى يتعمل عشان مفيش حد يشتغلهم او اى حاجه بس يخلى باله جدا عشان البلطجيه
الى بيعملوا كده على الطرق السريعه

**ابو لؤى** · 10-09-2013 12:53 PM

فى مره اتوماتيك المارش عطل والعربيه بطلت منى على كوبرى اكتوبر بصراحه اتحرجت اوى اوى لانى وقفت الكوبرى كله حاولت ازقها ولا الهوا جالى شاب راكب موتسيكل عالى كده وحاطت سمعات فى ودانه قعد يتحايل عليا عايز يساعدنى قولتله لا شكرا ربنا يخليك انا بعمل قفله فى المارش بتدور على طول والحمد لله دارت بس اتبسطت جداا لان فى ناس بتساعد السيدات بس جزاك الله خيرا على مساعده السيدات وياريت لو لاقيت شاب عطلان برده تقف معاه

**ابو لؤى** · 10-09-2013 01:27 PM

المشاركة الأصلية كتبت بواسطة ahmed air

فى مره اتوماتيك المارش عطل والعربيه بطلت منى على كوبرى اكتوبر بصراحه اتحرجت اوى اوى لانى وقفت الكوبرى كله حاولت ازقها ولا الهوا جالى شاب راكب موتسيكل عالى كده وحاطت سمعات فى ودانه قعد يتحايل عليا عايز يساعدنى قولتله لا شكرا ربنا يخليك انا بعمل قفله فى المارش بتدور على طول والحمد لله دارت بس اتبسطت جداا لان فى ناس بتساعد الشباب كمان جزاك الله خيرا على مساعده السيدات وياريت لو لاقيت شاب عطلان برده تقف معاه

تعديل