تقرير مصور و تجربه قياده مرسيدس c250 م 2011 و مقارنه بال 316 F30

**Ahmed_Adham** · 10-09-2013 06:06 PM

المشاركة الأصلية كتبت بواسطة horas3000

لكن ال bmw اللي بتناسب اسلوب سواقتي اكتر

الجمله دي هيه خلاصه المقارنه.

**midnightman_74** · 10-09-2013 09:57 PM

بالنسبة للتكييف ... اية الفرق بين العربيتين ؟؟

**horas3000** · 11-09-2013 01:42 AM

المشاركة الأصلية كتبت بواسطة Ahmed_Adham

الجمله دي هيه خلاصه المقارنه.

بالظبط كده
و انا قايل ده بالفعل في تقريري عن ال f30

المشاركة الأصلية كتبت بواسطة midnightman_74

بالنسبة للتكييف ... اية الفرق بين العربيتين ؟؟

واحد تقريبا
و ان كان في المرسيدس حسيت ان تبريده اسرع
يمكن عشان فيها فتحات خلفيه عكس عربيتي

**Silent~Dream** · 12-09-2013 01:00 AM

طيب ايه راى حضرتك فى الفرق بين f30 335 او c 350 هل هيكون نفس الفرق زى هنا عشان فرق المواتير بس
و بالطبع اداء البى ام افضل لكن ايه الافضل بالنسبه لطرق مصر اقصد كعربيه اجمالى

**inspiron** · 12-09-2013 12:46 PM

الـ f30 335i مزودة بمحرك 3000 سي سي بقوة 300 حصان ( نفس المحرك الموجود في 535i )

الـ w204 c350 blue efficiency مزودة بمحرك 3500 سي سي بقوة 310 حصان.

العربيتين نفس زمن التسارع من 0-100 في 5.40 ثانية

السرعة القصوي للـ 335 هي 255 كم/س محددة إلكترونياً.
السرعة القصوي للـ c350 هي 260 كم /س محددة إلكترونياً.

**horas3000** · 12-09-2013 01:26 PM

المشاركة الأصلية كتبت بواسطة mohaismail

انت قلت العزل فى مرسيدس افضل
هل ال بى ام العزل فيها مش كويس اوى ؟ وايه بالظبط اللى بيبقى مسموع هل صوت الموتور ولا احتكاك جسم العربية بالهوا ولا احتكاك الكاوتش على الطريق والعربية عاملة معاك ايه فى المطبات واستهلاك البنزين
ال 3 نقاط دول بالذات يهمونى اوى لانى عايز اجيب عربية مسمعش فيها صوت نهائى يعنى اقفل الزجاج وانفصل تماما عن الشارع وبقارن بين ال بى ام الفئة الثالثة واودى a3 وفولفو وممكن ادخل ال x1 فى الموضوع عشان ارتفاعها عن الارض.

لا العزل في البي ام كويس جدا
بس في مرسيدس احسن
و اكتر حاجه مسموعه احتكاك الكوتش (يمكن عشان رن فلات والله اعلم) بس طبعا لو شغلت الكاسيت مش هتسمع حاجه
و لو يهمك العزل يبقي عليك و علي المرسيدس
الاودي و الفولفو معنديش فكره عن العزل فيهم و ال x1 هفترض انها زي ال 3
و عموما الفئه دي من العربيات العزل فيهم يبقي كده كده عالي و الفروقات ما بينهم قليله جدا

المشاركة الأصلية كتبت بواسطة Silent~Dream

طيب ايه راى حضرتك فى الفرق بين f30 335 او c 350 هل هيكون نفس الفرق زى هنا عشان فرق المواتير بس
و بالطبع اداء البى ام افضل لكن ايه الافضل بالنسبه لطرق مصر اقصد كعربيه اجمالى

بص انا الناس شككتني في نفسي
و مش عارف هل المرسيدس اللي سقتها فيها حاجه و لا ايه
لان اتفرجت علي فيديوات ليها و الاداء واضح انه اعلي من اللي شفته بكتير
اصل عربيه حمايا مركونه و مش بيتحرك بيها الا في الاجازات و دي كبيرها شهرين تلاته في السنه و هو اصلا من النوع اللي سواقته هاديه فيمكن العربيه مش متفتحه كويس و اهو العربيه داخله علي 3 سنين و لسه عامل 12 الف

و زي ما انت قلت في راي البي ام تتفوق كاداء لكن اللي يناسب الطرق المصريه اكتر هي المرسيدس بصراحه
الطرق هنا صعبه و عايزه عربيه مريحه تعزلك عن كل اللبش اللي في الطريق

المشاركة الأصلية كتبت بواسطة inspiron

الـ f30 335i مزودة بمحرك 3000 سي سي بقوة 300 حصان ( نفس المحرك الموجود في 535i )

الـ w204 c350 blue efficiency مزودة بمحرك 3500 سي سي بقوة 310 حصان.

العربيتين نفس زمن التسارع من 0-100 في 5.40 ثانية

السرعة القصوي للـ 335 هي 255 كم/س محددة إلكترونياً.
السرعة القصوي للـ c350 هي 260 كم /س محددة إلكترونياً.

انا علي حد علمي و اتاكدت من الموقع بتاع الشركتين
ال 335 306 حصان و عزم 400 نيوتن
ال c350 برضه 306 حصان لكن عزم 370 نيونن و علي rpm اعلي

و الاتنين توب سبيد 250 محددة إلكترونياً

0-100 ال 335 5.5 و المرسيدس كاتبين -6

و كاداء الموضوع محسوم لل 335 طبعا خصوصا انها تيربو
لكن برضه كراحه و عزل و كده المرسيدس طبعا

**Silent~Dream** · 12-09-2013 07:34 PM

تسارع 335 الاوتو 5.1 والمانوال 5.4 المرسيدس 6 ثوانى البى ام متحددين 250 ده على الورق لكن الراجل قال بالنسبه لطرقنا اللطيفه الجميله
مرسيدس عزلها افضل شويه و مريحه عن بى ام شويه

BMW 335i Sedan - Features & Specs - Specifications - BMW North America

Mercedes-Benz Egypt - Technical data - Models

واتاكدوا من على اليوتيوب ( الفيديو ده كمان فيه المرسيدس دفع رباعى و تسارع 6 ثوانى )

https://www.youtube.com/watch?v=pzPcSdwQBRA

https://www.youtube.com/watch?v=fBH7AGKPvbc

**برنس الليالي** · 14-09-2013 05:55 PM

الله عليك يا باشا ... كان فين التقرير دا من زمان والله ما اخدت بالي منه !!

ما شاء الله انا اول ما شفت المرسيدس شفت حاجة فخمة جداً فعلاً وتناسب ناس كتير اوي

والـc250 عربية تحفة وفعلاً حكاية التسارع دي مظبوطة متشكش فيها طلاما هي فعلاً الـc250

وفعلاً في اخ هنا معرفة جرب المرسيدس وبيقول انها تتفوق جداً في حكاية الفرامل دي

سبحان الله الكمال لله وحده فعلاً وكل عربية فيها اللي يعجبك واللي يضايقك مهما طلعت بالفئة السعرية

-- بس انا شايف ان بجد عربيتك ما شاء الله عليها, عليها وقفة وحش كاسر مع اللون الابيض دا

واعشق حاجة اسمها تابلو البي إم بالرغم ان تابلوه البي إم معروف انه سيمبل

بس بجد عليها طرة تحفة مقارنة بطارة الـC بصراحة البي إم تكسب 1000% وهو نفس تابلو الـ1 Series

-- وفعلاً الخبير احمد الوكيل اللي كلنا بنتابعو بيقول ان الـ3 تتفوق على الـC بفرق كبير خصوصاً الـ328

وان العربية بتتحول بجد بعد خاصية الاسبورت بلس

تسلم يا باشا على التقرير وانا من اشد المعجبين بالـ3 وادائها الرائع وركوبتها اللي بتاخدك لعالم تاني

بس انا ليا سؤال عند حضرتك .. هي الـ3 مصفحة من الاسفل كويس عشان بس موضوع المطبات دا ؟

ولا بمجرد ما تاخد مطب حلو بعد اول عجلتين ممكن يزعلك جامد ؟