الموضوع: الشارك ... تالت مره

السلام عليكم
من سنه ونصف تقريبا نزلت لحضراتكم موضوع باسم الشارك منها واليها وقلت فيه أنى بعت شارك ٢٠٠٨ هاى لاين عشان أغير وفضلت ابحث وفى الآخر اشتريت شارك هاى لاين موديل ٢٠٠٩ ...
المهم معايا زميل فى الشغل طلب وألح عليا انه يشتريها بعد ما يقرب من سنه ونص المهم ضعفت وبعتها له لأنى بعيد عنكم عندى مرض التغيير .
اول حاجه فكرت فيها بعد ما بعت الشارك السيراتو الشكل الجديد وقريت عنها على النت وأتفرجت على فيديوهات وعجبنى شكلها من خلال الصور والفيديوهات وفعلا لقيت واحده هاى لاين كسر زيرو بكياسها ولما رحت اعاينها لقيت العربية زيرو بس بصراحة مابهرتنيش ومع ذلك قلت اوكى اشتريها ودخلت البنك سحبت وروحنا الشهر العقاري علشان التوكيل وتشاء الظروف ان كان فى ختم مش واضح والموظف مارداش يعمل التوكيل بينى وبينكم قلت الحمد لله ولما صاحب العربية قالى نروح شهر عقارى تانى رفضت وصارحته أنى مارتحتش للعربية بشكل كبير ولانه تاجر طلبت منه لو يدورلى على اوكتافيا أو كورولا هاى لاين وسيبته
وسبحان الله لقيت نفسى بدور على الشارك مره تانيه وفعلا ربنا وفقنى فى عربيه هاى لاين كويتي بحالة الزيرو ودى تبقى تالت عربيه شارك ... الخلاصة ان الكوريين لسه بينهم مسافة بينهم وبين اليابانيين والالمان تانى حاجه يبدو ان الشارك بقت قدرى ... وبحمد ربنا على هذا القدر .
حاجه أخيرة عايز أقولها ان كل مره باشترى شارك بكون فرحان بيها كما لو كنت اول مره اسوقها.
أيها الشاركاويين ارفعوا روؤسكم .

المشاركة الأصلية كتبت بواسطة saddam

صديقي المواطن إنت معندكش حب المغامرة وبتخاف من التجديد ومتفرحش إنت كده محتاج تقعد مع نفسك ﻷن مثلا لة مرسيدس حتى لو موديلات قديمة ستينات كنا قلنا ماشي لكن ميتسوبيشي سيارة.تجارية قيادتها عادية كل مميزاتها إنها إنتشرت كتير في مصر عامة ربنا يوفقك وتلاقي حل للعربية الرابعة ودمتم للنضال

اختلف مع حضرتك فى كل إللى قلته تقريبا ... بالعكس انا تقريبا مدمن تغيير يعنى اقرب إلى حب المغامرة
ثانيا الشارك عربيه صعب ان يتقال عليها تجارية يمكن حضرتك تقصد البومة لان هى إللى انتشرت إنما الشارك مش منتشرة
أخيرا لو حضرتك سقت الشارك ممكن تغير رأيك مين عارف يمكن العربية إللى جايه تكون شارك الشكل الجديد ... تحياتي