لا معلش حتى لو ايه مستحيل الشارك تكون احسن من سيفيك الفكرة فى زيرو ومستعمل انما لو زيرو يبقى سيفيك طبعا مفيش مقارنة
ثبات و راحة وقطع غيار وتوكيل احسن من الشارك
الحقيقة لو العربيتين زيرو يبقى مفيش مقارنة السيفيك تكسب طبعا :M_yes[1]:
عرض للطباعة
لا معلش انت يا باشا... مش علشان حضرتك كان عندك تجربة لعربية شارك كنت كتبت عنها قبل كدة وقعدت تقول ان الباور خفيف ومش عارف ايه يبقى توصل ان الشارك مستحيل تتقارن بالسيفيك... على اساس ايه السيفيك دي مرسيدس؟؟؟ لو دخلت على اي موقع مقارنات اجنبي وحطيت الشارك هتلاقي وحبيت الموقع يرشحلك اقرب عربيات في الكاتيجوري ده علشان تعمل مقارنة تفصيلية هتلاقي انها بتتقارن عادي جدا بالسيفيك والفوكس والكورولا والحاجات دي... مش اختراع يعني!!
وبعدين مش القصة مواقع يعني لا تفتكر اني بنيت رايي عليها ولا حاجة... لا يا هيثم بيه انا مالك للشارك وعارف انا بقول ايه كويس... السيفيك لا تتفوق على الشارك غير في قطع الغيار والتوكيل -معاك حق- وازود من عندي حتة العزل السيء في الشارك....
غير كده الله يخليك متقوليش ثبات السيفيك ولكلام ده لاني بجيب بالشارك 220 عادي جدا ولا الهوا واقسملك ان مفيش عربية تانية في الفئة السعرية دي حسيت معاها بالثقة دي... الشارك ثباتها وهمي (والسيفيك طبعا كمان)... فبلاش حتة مستحيل دي علشان عمري ما بسمع الكلام ده غير في مصر بصراحة... خش يا باسا اي منتدى خليجي او غربي وشوف ان الطبيعي تلاقي واحد يقول لانسر هاندلينج افضل وواحد تاني يقول موتور السيفيك افض وكدة يعني.... مش مستحيل الشارك تيجي جنب السيفيك!!!
وبعدين على فكرة من ضمن اسباب اني شايف الشارك افضل ان اعلى فئة فيها تمنها اقل من اقل فئة في السيفيك (رغم ان فرق السعر في امريكا يكاد لايذكر سبحان الله)... فانا بدفع فلوس اقل وباخد تقريبا نفس مستوى الاداء... فايه اللي يخليني ادفع 215000 علشان استمتع بثبات السيفيك مثلا لما ممكن ادفع 170000 بس واخد نفس الثبات؟؟؟ متهيألي وجهة نظر ولا ايه؟؟؟
حاجة كمان... قعدة الشارك وزوايا الرؤية اكتر راحة -بالنسبة لي- من السيفيك... والكنبة اوسع شوية من السيفيك...
لو عايز تقوللي بقى ان السيفيك تزيد مرايات ضم وكروز كونترول والحاجات دي هقولك اوكي اعترف ان اوبشنز الشارك تعتبر متوسطة بالنسبة للمتاح حاليا... بس انا شخصيا مرضي تماما ومش حاسس ان فيه حاجة جامدة ناقصاني...
عارف اللي بيخلي النسبة الاكبر من الناس بتروح اوتوماتيك للسيفيك ان جميع موديلاتها حتى من التسعينيات مشهورة بثباتها على الطريق وبالتالي ثقة الناس فيها كبيرة بمجرد سماع الاسم وقبل حتى التجربة... زائد طبعا ان هوندا شركة اكبر وبالتالي سمعتها افضل... انما ده لا يمنع ان الشارك عربية فذة بالنسبة لميتسوبيشي وتصل بسهولة لمستوى السيفيك ولا تقل عنها غير في شوية تجهيزات بقت موجودة في الكوري دلوقتي...
حضرتك قولت الشارك لو هاى لاين تبقى احسن من السيفيك ..... انا قولت لك لأ لأنى مجرب الاتنين و صاحبى اللى معاه العربيتين بالنسبة له السيفيك افضل بمراحل .... بالنسبة لموضوع الثقة اللى حضرتك بتتكلم عليه ده من اساسيات الفروق وانت راكب السيفيك على السرعات بتكون مطمن عن الشارك وبعدين احنا بنتكلم عن الشارك والجيل الثامن من السيفيك لأن الجيل الجديد عالجوا العيوب اللى فى الثامن زى الرؤية على حد قولك ....عموما ممكن يكون الفرق فى الموديل القديم و الحديث اللى مع سيادتك ..... اتمنى ان حضرتك فى النهاية تجرب السيفيك يمكن تفهم قصدى
تحياتى
يا باشا انا اللي اتمنى ان حضرتك تصدق اني مجرب السيفيك والله العظيم تلاتة... انا ما اخترتش الشارك اعتباطا يعني... لا والله جربت حاجات كتيييير في الشغل ومع اصحابي وكل حاجة زي حضرتك بالظبط...
يعني حضرتك شايف ان السيفيك افضل وان صاحبك شايفها افضل ومش قادر تتخيل اني شايف الشارك افضل؟؟؟ ليه مش فاهم؟؟؟ انا على فكرة ما قلتش الشارك تكتسح السيفيك ولا حاجة انا بقول السيفيك لا تتفوق على الشارك في الثبات (والله عن تجربة برضه)... وقلت ان ثبات السيفيك وهمي (زي الشارك) صح؟؟؟
انما هعيد تاني... اللي مخليني شايف الشارك افضل ان بأداءها وثباتها (اللي شايفهم ميقلوش عن السيفيك) سعرها لا يقارن بسعر السيفيك المبالغ فيه جدا جدا...
انما لما حضرتك تيجي تقولي مفيش مقارنة ممكن واحد مش مجرب زي صاحب الموضوع يتهيأله ان الشارك دي حاجة كدة في مستوى الالنترا مثلا في الثبات.... وده بقى هو اللي مستحيل...
انما كان المفروض حضرتك -مع حبك للسيفيك- تدي الشارك حقها ومتحسسناش انها بتعوم مثلا على اي سرعة علشان يبقى ثباتها لا يقارن كدة بالسيفيك...
يا فندم الشارك بتبقى على ال220 ومكلبشة في الارض فمش عارف بقى علشان نقول السيفيك اكتساح يبقى هي بتمشي على سرعة 300 مثلا ولا حاجة؟؟؟
لو حضرتك مش مقتنع ممكن تجرب الشارك على سرعات زي كدة وفي الملفات وابقى قولنا حسيت بايه (مع ارتفاع العربية الكبير عن الارض كمان)....
ولو مش عايز تجرب او تقتنع ياريت تجيبلي اي مشاركة واحدة هنا او اي مكان تاني لقيت فيه مالك للشارك بيقول عن ثباتها عكس اللي انا قلته...
مش هتلاقي صدقني!!
تحياتي...
ما انا قولت لحضرتك بس مخدتش بالك ممكن يكون فرق الموديلين للشارك ممكن يكونوا عالجوا العيوب واللى كان منها الباور اللى حضرتك قولت انه اتغير على حد قولك
وبعدين موضوع السعر برضه قولتلك الحيل السابق السيفيك كانت بتبدأ من 158000 و الشارك كانت الفئة اللى قبل الهاي لاين 155000 يعنى الفكرة مش اوبشن
بالنسبة لى انا اصلا مش بحب العربيات اليابانى خالص انا بفضل الاوروبى عامة و البيجو على الاخص بس السيفيك والجيل الثامن ده كان مميز اوى غير كده ولا يفرق معايا
و طالما حضرتك جربت ومقتنع خلاص دى وجهة نظرك طبعا انا مش مفروض انى اقنعك بحاجة احنا بنتناقش وبالمناسبة لو تعرف حل لتعديل الباور الكهرباء وتكلفته ياريت تقولى وشكرا
معلومة أحب اضيفها ...
توكيلات تويوتا وهوندا معبطين جامد في أسعار عربياتهم في مصر ...وخصوصا كمان أنها تقفيل تركي ...
في أمريكا الشماليه ...لانسر شارك وكورولا ومازدا وصني كلهم فئة سعرية واحدة وإللي بيختار بيبقي حسب راحته النفسية ..
الأمبريزا شريحة أعلي وداخله مع الأروبي في الأسعار ...
ببساطة كون الأمبريزا ياباني والكورلا تركي ومع ذالك سعر الكرولا او السيفك أغلي فده نصب علني ...والتوكيلات مسعرة حسب البيع والطلب مش حسب الجودة أبدا ...
متفق مع الاخوة
الشارك علشان زيرو بس مش اول فئة