الموضوع: تقييم شامل عن سيريون 2008 -glx 1300 Cc

أنا الحمد لله استلمت العربية سيريون 1300 Glx حمراء يوم 23-6-2008 و العربية ماشاء الله جميلة جداً و أدائها جيد جداً جداً و عامل بها حوالى 6300 كم و دا تقييم بسيط لها على حد إمكانياتى و عذراً على التأخير كثيرأ لظروف عملى المرهقة و إنشغالى الدائم بس أنا بدأت فى التقييم دا من بعد ما جبت العربية بحوالى إسبوع لكن لحد دلوقتى معندش وقت خالص علشان أكمله بس الحمد لله كدا وصل لشكل مقبول و يارب يعجبكم و عذراً على الإطالة بس حبيت أقول كل اللى فى نفسى

طريقة الشراء و السعر
==============
- ثمن السيارة 88 ألف دفعة مقدمة 40 ألف و القسط 1334 جنيه على 4 سنوات بفائدة 8% من توكيل ديهاتسو نفسه (الشركة العالمية المتحدة للتجارة - عبد اللطيف جميل) و بذلك إشتريت السيارة من المالك الأساسى لها و بعدت عن شبهة البنوك
الزوجة الضامن بمفردات مرتبها بحيث لا يتعدى القسط 40% من المرتب وانا كمان مفردات مرتبى و صورة البطاقة ووصل نور
- التأمين عند بيت التأمين المصرى السعودى بنسبة 2.75% من ثمن العربية و دى نسبة كبيرة نسبياُ بس دا تأمين إسلامى تكافلى و إن كان المفروض أن يوزع نسبة الفائض من الأرباح على المشتركين و هذا لا يحدث بسبب ان التأمين على السيارات غالباً لا يحقق أرباح فى معظم الشركات و لكن يكفى صيغة العقد الشرعية و لجنة الفتوى فى الشركة برئاسة دكتور نصر فريد واصل

تكاليف الترخيص
===========
الترخيص لمدة سنة و احدة لحظر بيع السيارة ولا تجدد إلا بخطاب من الشركة البائعة
ودى الأسعار على القانون الجديد
أوراق الفحص 23 جنيه
التأمين الإجبارى 69 جنيه
الضرائب و الدمغات 207 جنيه
النمرة 100جنيه (ص س أ)
الطفاية حوالى 100 جنيه و لكن الحمد لله استلمتها من التوكيل عند الشراء
الحمد لله لم أدفع أى رشاوي بمسمياتها (إكراميات و خلافه) وتمت الأجرائات الحمد لله بسلاسة

مواصفات و كماليات العربية
=================

موتور 1300
اتوماتيك
4 زجاج كهرباء
تكييف
باور كهرباء
سنتر لوك
مرايات كهرباء
راديو سي دي مدمج فى التابلوه (audio)
4 سماعات (2 امامى و 2 خلفى فى الابواب)
2 ايرباج
ABS, EBD
جنوط سبور 14
مقابض بلون السيارة + مقابض نيكل بالداخل
سبويلر خلفى
امكانية التحكم فى ارتفاع كرسى السائق
مسند يد بين الكراسى الامامية
4 حامل اكواب امامية + 1 خلفي فى الكونسول
فرش اسود فاخر + 2 مخدع رأس خلفى
امكانية طى الكنبة

الحجم و المظهر الخارجى
===============
العربية حجمها الخارجى ممتاز جداً فى الركن و المناوارات على الطريق وأنا مبسوط جداً من الحجم دا بسبب الزحام الشديد و عدم توافر خرم إبرة للركنة وسط البلد و المرونة الرائعة وكمان الحجم الصغير مأثر فى وزن العربية 940 كجم

الحجم الداخلى و أماكن التخزين
====================
الحجم الخارجى للسيارة لا ينم مطلقاً عن الوسع الداخلى للسيارة و الخمسة ركاب لن يشعروا بأي ضيق أو تعب فى القاعدة و إن كان الحجم الصغير ده مقلل من حجم الشنطة (و دا الطبيعى فى العربية الهاتشباك) و لكنها مش صغير لدرجة إنها ماتخدش شنطة سفر كبيرة و كمان ممكن الكنبة الخلفية تتقفل لتوسيع الشنطة بالإضافة لأماكن التخزين المتعددة و الكثيرة فى العربية حوالى 4 أدراج متعددة الأحجام فى التابلوه و 2 فى الأبواب و خمسة حوامل أكواب و كونسول جانبى على يمين السائق

فى ملاحظة بالأرقم لاحظتها
العرض الداخلى للسيريون 1400 مم و للتريوس 1385 مم
الطول الداخلى للسيريون 1830 مم و للتريوس 1800 مم (مجرد ملاحظة للمشككين فى الوسع الداخلى)

فيه كمان ملاحظة الإيرباج للراكب الأمامي لها مكان منفصل (شبه الدرج) يعني فى حالة الإنفجار بدون داعي (لا قدر الله) لن تتكلف تصليح أو تغير التابلوه بالكامل فقط هذا الدرج و الجزء الخاص بها فى الدريكسيون

العفشة و الثبات
===========
العفشة ماشاء الله جميلة و ناعمة إلى حد كبير ولكن كنت أنتظر أكتر من كدا وبالتأكيد هناك الأفضل لكنها مرضية إلى حد كبير. ثبات العربية الحمد لله جيد جداً أنا جربته فى أكثر من موقف نفق الأزهر بمنحنياته الكثيرة و الضيقة بسرعة 120/110 كم ولم تغادر العربية الحارة التى كانت تسير فيها ودا بالنسبة لى مرضي جداً(النفق سرعته 50كم بس كنت بجرب يوم الجمعة وكان فاضى)وأيضا على طريق الغردقة الضيق و الصعب بس الحمد لله كان ثباتها مقبول و إن كان ثباتها فى المجمل لا يتعدى 8 من 10 ودى نسبة معقولة جداً

الموتور و الأداء
==========
الموتور 1300CC أدؤه جيد الحمد لله و سحب العربية معقول رغم إنها اتوماتيك بس فعلاً مش هتحس إن دا سحب عربية أتوماتيك إلا فى الطلعة الأولى و بعد كدا سحب العربية جيد جداً.
العربية ماشاء الله بتبقى ماشية على 100 تقريبا على RPM حوالى 2200 120 كم على 3000 و 140 كم على 3500 RPM و فيه زرار فى الفيتيس للحرق على الموتور بيرفع لفات الموتور من 2000 الى 4000 أو أكثر بس مش بيشتغل قبل سرعة 80 كم هوا كا اللى بيعمله بالظبط إنه بيقفل ال Over Drive بس لو حرقت على الموتور بنفسك مش هيبقى ليه لازمة
بس حوض الموتور صغير شوية ودى قد تكون حاجة مقلقة فى حالة الحوادث لاقدر الله لكن فى الأخر دى طبيعة الهاتشباك و أكيد حاجة زى دى معمول حسابها من قبل المصنعيين و كمان لو شفت إختبارات التصادم لأى عربية حوض الموتور فيها كبير هتلاقى كله فى الآخر بيوصل لنفس المرحلة بس المهم إنها تحمى الراكبين
صوت الموتور عالي شوية بالنسبه لسيارات أخرى زى الهوندا بس هوا فى المجمل مقبول ولن تشعر إنه مزعج

العزل الداخلى و التقفيل
==============
العزل الداخلى جيد ليس أكثر يعنى عزله للصوت ضعيف وممكن يبقى جيد ولكن ليس جيد جداً بس أنا بحب أسمع صوت الموتور و العربيات اللى جنبي مش بحب أتعزل نهائياً بس كنت أتمنى يبقى أحسن من كدا شوية
التقفيل ماشاء الله ممتاز و معمول بشياكة قوي و الخامات الداخلية جيدة جدا و اضاءة الصالون جيدة جدا . في 3 لمبات في الصالون و اللي ف النص بتنور لما الباب بيتفتح

استهلاك البنزين
==========
استهلاك البنزين عالي شوية بس اكيد ده مش دا الطبيعي و انا منتظر لما اروح التوكيل ان شاء الله علشان اشوف الاستهلاك ده طبيعي ولا لأ. احيانا الصفيحة بتعمل معايا 210 كم و احيانا 240 كم و ده داخل البلد و فى السفر السرعة ما بين 80 و 120 و نصف الطريق بالتكييف الصفيحة عملت 266 كم بس انا حاسس ان ده كتير جدا علي عربية 1300 و قلتلهم على الموضوع دا فى التوكيل فى صيانة ال 1000 و قالولى دا لسة هيتظبط فى صيانة ال 5000 بس بعد صيانة ال5000 قاللى إن كل قراءات الكمبيوتر سليمة يعنى العيب مش من عندهم خالص بس أنا مش مبسوط خالص من الإستهلاك ده و مش عارف أعمل إيه

الفرامل و الأمان
==========
الفرامل ما شاء الله كويسة جداً جداً و استجابتها عالية الحمد لله ودا بيدينى إحساس بالثقة فى العربية و فى الأمان ساعة الخطر عافانا الله و عافاكم من أى مكروه
ال ABS + EBD جيد جداً وبيديك إحساس بالأمان و بيعزز ثبات العربية ساعة الفرامل على السرعات العالية و دا فعلاً من الحاجات اللى ربنا يسرهالى علشان ينجينى من حوادث مؤكدة

التكييف و النظام الصوتى
===============
التكييف جيد جداً و تأثيره على السحب مش كبير و فى المعظم مش بشغله على أكتر من 2 و درجة حرارة متوسطة بس أداؤه كويس جداً بس بيكون أفضل لو حجزت أشعة الشمس
النظام الصوتى جيد جداً و إن كانت حركة مستفزة إن الكاسيت audio فقط ومن الصعب تغيره لأنه جزء من التابلوه توزيع الصوت جيد جداً لكن أنا ماقدرش أحكم عليه من و جهة نظر المحترفيين و عشاق الصوتيات و الأغانى

التوكيل
=====
التوكيل كويس جداً ومحترم قوي وبيعملوا حركات كويسة زى التأكيد على ميعاد الصيانة قبلها بيوم و بيكلمك بعد إجراء الصيانة بكام يوم علشان يعرف لو كانوا عملوا الواجب معاك ولا لأ وعن مقترحاتك كمان , دا غير المعاملة الكويسة فى التوكل سواء فى الإستقبال أو المهندس اللي بيقعد معاك وبيعرف جميع مشاكلك و بيحاول يحل المشاكل دي كأنها تخصه, أنا بتعامل مع مهندس أحمد عبد الوهاب ودا يا جماعة من أكتر الناس المحترميين بجد و شخص خدوم جداً و عارف نايل موتورز بس إحنا شكانا كدا صدعناه بس هوا بيحترم أعضاء نايل موتورز و عارف معاذ و أبو عبد الله (اللى عرفه بالمنتدى جزاه الله خيراً)
بس التوكل فيه بعض العيوب أهمها المواعيد يعن أنا حاجز صيانة ال 5000 قبلها ب 35 يوم و كمان أنا شايف إن أسعار التوكيل غالية شويه سواء فى المصنعية أو قطع الغيار بس هى أقل من عربيات تانية كتير (يعنى غيرلى فيوز مكان واحد محروق و كانت المصنعية 35 جنيه و أنا لو أعرف سبب المشكلة فى الكهرباء كنت غيرت أنا الفيوز و خصوصاً إن فيه 3 إحطياطى بس عرفت بعد كدا إنها إتحسبت نصف ساعة شغل و الساعة ب 70 جنيه بس إتعلمت أشيل مفك تيست معايا علشان أكشف على الفيوزات بنفسى)

العيوب
====
عيوب العربية قليلة جداً و فى منها عيب و ميزة فى نفس الوت بي للأمانة هقول كل حاجة
1- الصاج ضعيف شويه ودا كعادة العربيات اليابانى كلها بس دا بيكون كويس فى حالة لو بترد صاج على البارد
2- الإكصدامات مرنة و مثبتة بكلبسات ودا عيب إنها سهل تطبق أو تخدش بس الميزة إنها معمولة كدا لحماية المشاة فى حالة التصادمات الخفيفة
3- صوت العربية عالى و عزلها للصوت ضعيف
4- مكان زرار الإنتظار سئ جداً و من الصعب توصله بسرعة من غير ما تبص عليه ودا ماينفعش فى ساعة الخطر كان المفروض يبقى أعلى من كدا و أوضح من كدا بس هوا حجمه مناسب
5- إداء العربية بحس إنه بيقل كتير لو طالعة كوبرى أو طريق مرتفع شويه
6- السي دي audio فقط و صعب تغيره لأنه جزء من التابلوه بس شكله كويس و صوته كويس جداً
7- العربية full option و مافيهاش إنذار ووحد رفع للزجاج و دى حركة مستفزة وكمان سعرهم فى التوكيل أغلى من برة بكتير رغم إنها ماركات منتشرة فى السوق وكمان السعر شامل التركيب بس فى التوكيل التركيب للإنذار فقط ب 144 جنيه
8- وأخيراً مواعيد التوكيل و إن كان ده مش عيب فى العربية بس عيب فى الخدمة


كل الشكر و التقدير لمن ساعدنى فى إختيار العربية دى و خصوصاً الأستذ محمد أبو عبد الله و الأستاذ معاذ و كل أعضاء المنتدى و جزاكم الله خيراً كثيرا