الموضوع: انا اتجننت و حانتحر يا رجالة يا تلحقوني يا متلحقونيش !!!

كنت ناوي اشتري العربية بي واي دي اف 3 موديل 2014 اتومانيك لان سعرها حلو ومميزاتها فول اوبشن واتوماتيك ياباني وماتور ياباني وكنت فرحان وسعيد وطاير من الفرحة .
.
.
.

بس بعد الي شوفتوا وسمعتوا فى قسم العربيات الصينى خلاني اقلق واتراجع عنها

ناس تشكر فيها وناس تقول ابعد عن الصيني وغنيلوا وناس تقول التوكيل الامل زي الزفت وفي الاسكندرية حلو انا اول مرة اشوف توكيل يبقى حلو فى منطقة وزفت فى منطقة تانية

و ناس تشتكي من التقفيل المصري والعزل وناس تقول الماتور الصينى 1500 سي سي احسن لانه بتاع هوندا سيتى وتقفيل الصينى احسن الف مرة من المصري وناس تقول المصري احسن االماتور لانسر 1600 بومة

وناس تقولك سعر الصينى في اعادة البيع وحش وناس تقولك العربية بقالها خمس سنين وشغالة تاكسي ومطلوبة والناس جربتها والا مكنتش اشتغلت تاكس . وناس تقولك الدهان زي الزفت وحيجي للعربية صدا وبرومة وناس تقولك الباب بيقفل بعد ما بتتخانق معاه وده طبيعي في الصينى .

وتجي تقارن العربيات الى نفس مستواها وسعرها تلاقي الفيرنا يقولك واطية عن الارض وبتسلم على كل المطبات ولازم تتربط عفشة من ورا كل فترة وما تورها كوري وضيقة وشنطها ديقة بس ماسكة سعر ؟

اكنه زي الى بيقولك عندنا فيه شوربة ضفادع و ودن كلب ارمل وييتم بعفن الخبر المحمص بس حنجبلك معها رز بلبن تفتح نفسك .

الرينو لوجان يقولك العربية بتتقلب وفيها عيوب صناعة فى دواسة البنزين وقطع غيارها غالية ومش متوفرة بكثرة وسعر اعادة البيع حتخسر كتير وتقفيل مغربي .

طيب اعمل ايه يعنى اشتري بي واي دي ولا لا .. ولا اجيب عجلة احسن ولا اخدها متورجل ديه حاجة تجنن يا جدع مفيش حاجة عدله في البلد ديه ولا ايه

أنا حتجنن خلاص يا تلحقوني يا متلحقونيش والى يحصلني يكسرني

المشاركة الأصلية كتبت بواسطة eng.mina

انا حارد علي حضرتك في نقطة الفيرنا بكل حيادية موضوع تربيط العفشة ده كلام اول مرة اسمعه مع العلم العربية معايا من الزيرو من 2007 وعاملة دلوقتي 94000 كيلو وعمري ما ربطت العفشة الخلفية باستمرار زي ما الناس بتقولك يعني تربيط كامل للعفشة علي فترات طبيعية جدا زي اي عربية وبالنسبة لموتورها هو ممتاز جدا ومحصلش منه اي مشاكل الحمد لله طالما محافظ علي صيانتها وطبعا اكيد حضرتك عارف موضوع توافر قطع الغيار ودي من احسن مميازتها نيجي للعيوب بأه :
1- الصالون فعلا ضيق زي ما الناس قالت لحضرتك مش مريح لو العربية دايما بيركب فيها ناس علي الكنبة الخلفية وحضرتك من هواة رجوع كرسي السواق للأخر زيي كده .
2- بعض عيوب التقفيل ودي نسبية من عربية للتانية .
3- موضوع الحكات ده عالجوه في الموديلات الجديدة العربية بقت أعلي و صغروا علب الشكمان اللي في النص والاخيرة فمش حتحك غير في مطب غبي وده طبعا لو راكب ناس كتير في العربية و فيها شنط وكده .
4- رعشة علي السرعات العالية من 120 وانت طالع مش لاقيلها حل مع العلم غيرت الجنوط لجنوط سبور تايواني وركبت كاوتش بريدجستون ولسه برده نفس الموضوع يمكن المشكلة دي في عربيتي بس وانا كيفت نفسي عليها .
وده ملخص تقرير عنها بس بالامانة رغم عيوبها بس عربية اصيلة وعمرها ما عملت حركة نقص اهم حاجة المحافظة علي صيانتها من البداية

يا استاذ مينا انا بشكرك جدا على ردك مهي دية المشكلة لكل حاجة ميزة وعيوب طبعا بس فيه عيوب ممكن التغاضي عنها وتكون مقبولة على حساب اشياء اخرى مثل سعر العربية لكن لما نشتري عربية ب 92 الف جنية ومع التقسيط ممكن توصل 100 فما فوق ساعتها بنفكر ونقول طيب اية البديل يعني لما اشتري عربية الاقها بتترج ولا التقفيل بتاعها وحش وديقة وخصوصا انى طويل كمان وكانك اخدتها من على لساني انى بحب ارجع الكرسي لاخر حاجة وشكلها حاجة مشتركة بينا بينما في عربية تانية فيها كل الى بتحلم بيه بس صينى ساعتها حتحس بعدم الرضا وانك دفعت فلوسك على الارض . انا لما قارنت الفيرنا والبي واي دي لاقيتهم فيهم حجات مشتركة التوكيل غبور والامل لاقيت تعليقات ان الناس بتشتكي منها ... تقفيل العربية في الاتنين فيهم نفس المشكلة وهنا تخش في حيرة طيب اجيب ايه ؟؟؟؟

Mecha

انا معاك ان الياباني حلو طبعا بس للاسف سعرة حراق ثانيا حاجة زي كورولا مثلا مش ياباني والبي واي دي ماتورها ماتسوبيشي و فتيسها ياباني فاعتقد طلما التقفيل بقى مش ياباني يبقى ما بقتش تفرق .

استاذ jojojojo - shawke hamed

مين يشهد للعروسة هههه الفيرنا حلوة بس العربية صالونها ديق ما تنكرش وده الي مضايقني فيها بغض النظر عن عيوبها التانية زي الشنطة عدم الثبات على السرعات العالية ده غير تقفلها ومفهاش اوبشن زي الحساسات الخلفية مثلا ده غير ان ماركة الفيرنا في مصر بس على حد علمي وهى الاكسنت القديمة موديل 2004 لكن عالميا الموديلات مش معروفه زي الاكسنت - النترا - سوناتا - ايزيرا .

وعلى راي الشاعر الكبير .. سلمني نضيف اسلمك نضيف .

ونرجع ونقول تاني اشتري ااااااااايه يا عفريت الاسفلت ... حد يقولي قبل ما اتجنن ...حادي بادي كرمب زبادي شالوا وحطوا كلوا علادي

متابع

معلش عندى استفساريييين
أولا هو ليييه محدش اقترح الشيفرووووليه؟؟؟؟؟؟
مع إن فيها كل اللى حضرتك طالبه من مواصفات
1- سعرها حدود 90 - 105 بالتقسيط .(اللانوس أقل من كدة والأفيو من غير تقسيط بنفس السعر)
2- تكييف و اتوماتيك.(هاتلاقى)
3- سعر اعادة البيع و ماسك نفسه.(شعبية ومنتشرة)
4- تبقى سهلة في البيع مش تقيلة ومرغوبه .(برضه شعبية ومنتشرة)
5- توكيل محترم .(ما افتيش فيها)
6- معمرة وقليلة الاعطال والعيوب.(معايا زمايلى فى الشغل ما اشتكوش من أعطال كتيرة مع ملاحظة مشوار الشغل رايح جاى من 50 إلى 60 كم يوميا)
7- قطع الغيار رخيصة ومتوفرة . (نسبيا)
8- صالونها كبير ومريح .(أعتقد)
9- سيدان مش هاتش باك . (ما افتكرش فى منهم هاتش باك)
ثاني استفسار
أنا واخد بالى انك بتدور على نوع العربية وناوى تقسط
إذن أعتقد انك عارف هاتقسطها ازاى
أنا بقى عارف العربية بس مش عارف أقسطها ازاى وفين
مستنىرد حضرتك فى الاستفسارييين

المشاركة الأصلية كتبت بواسطة eng.mina

انا حارد علي حضرتك في نقطة الفيرنا بكل حيادية موضوع تربيط العفشة ده كلام اول مرة اسمعه مع العلم العربية معايا من الزيرو من 2007 وعاملة دلوقتي 94000 كيلو وعمري ما ربطت العفشة الخلفية باستمرار زي ما الناس بتقولك يعني تربيط كامل للعفشة علي فترات طبيعية جدا زي اي عربية وبالنسبة لموتورها هو ممتاز جدا ومحصلش منه اي مشاكل الحمد لله طالما محافظ علي صيانتها وطبعا اكيد حضرتك عارف موضوع توافر قطع الغيار ودي من احسن مميازتها نيجي للعيوب بأه :
1- الصالون فعلا ضيق زي ما الناس قالت لحضرتك مش مريح لو العربية دايما بيركب فيها ناس علي الكنبة الخلفية وحضرتك من هواة رجوع كرسي السواق للأخر زيي كده .
2- بعض عيوب التقفيل ودي نسبية من عربية للتانية .
3- موضوع الحكات ده عالجوه في الموديلات الجديدة العربية بقت أعلي و صغروا علب الشكمان اللي في النص والاخيرة فمش حتحك غير في مطب غبي وده طبعا لو راكب ناس كتير في العربية و فيها شنط وكده .
4- رعشة علي السرعات العالية من 120 وانت طالع مش لاقيلها حل مع العلم غيرت الجنوط لجنوط سبور تايواني وركبت كاوتش بريدجستون ولسه برده نفس الموضوع يمكن المشكلة دي في عربيتي بس وانا كيفت نفسي عليها .
وده ملخص تقرير عنها بس بالامانة رغم عيوبها بس عربية اصيلة وعمرها ما عملت حركة نقص اهم حاجة المحافظة علي صيانتها من البداية

صديقي المواطن الحبيب
بعد إذن صاحب الموضوع
مفيش حاجة إسمها رجة وتتعايش معاها هناك 3 أسباب لعمل إرتجاج في عربية سحب أمامي
أولا لو مش بترصص في مكان محترم كل شهرين
ثانيا.لما غيرت الجنوط فضلت الرعشة ولا زادت عشان أحيانا بيبقه فيه فراغ في نص الجنط ومحتاج تعمل له حلقة ألمنيوم أو.فلنشة صغيرة تفلون عند الخراط
أما السبب الثالث وهو.اﻷعم الراجح عندك الشفت بتاع الكبالن مش مظبوط وده بيتغير وده رعشته بتكون في السرعات ورعشته بتكون دبدبة لفوق وتحت أما رعشة الترصيص فهي شمال يمين موضوعك بسيط وتبا للمستحيل ودمتم للنضال

المشاركة الأصلية كتبت بواسطة saddam

صديقي المواطن الحبيب
بعد إذن صاحب الموضوع
مفيش حاجة إسمها رجة وتتعايش معاها هناك 3 أسباب لعمل إرتجاج في عربية سحب أمامي
أولا لو مش بترصص في مكان محترم كل شهرين
ثانيا.لما غيرت الجنوط فضلت الرعشة ولا زادت عشان أحيانا بيبقه فيه فراغ في نص الجنط ومحتاج تعمل له حلقة ألمنيوم أو.فلنشة صغيرة تفلون عند الخراط
أما السبب الثالث وهو.اﻷعم الراجح عندك الشفت بتاع الكبالن مش مظبوط وده بيتغير وده رعشته بتكون في السرعات ورعشته بتكون دبدبة لفوق وتحت أما رعشة الترصيص فهي شمال يمين موضوعك بسيط وتبا للمستحيل ودمتم للنضال

يا باشا خد راحتك على الاخر انت صاحب مكان انا عايزك تقطعوا ههههه

بس اعتقد حتى لو مرصص ان وزن العربية بيفرق بردوا فى السرعات العالية و في الثبات و عرض الكاوتش والايرودينامكينة للعربية وارتفاعها عن الارض وفيه سبب انتو نسينوا خاااااااالص العين بردوا .. يركب جمبك واحد شرارة ويقول يا رب انا مش عايز عربية فارهة زي دية انا عايز توتوك بس يا سيدي ينزل من هنا تلاقي العربية بترقص عشرة بلدي احنا بنحاول نقنع نفسنا انو ترصيص وتيل فرامل وناخدها بجانب علمي .

المشاركة الأصلية كتبت بواسطة akmm

لو انت فى كذا مشوار معاك حاول تركب العربيه ال byd وتسال السواق عنها واكيد هيقول لك اصل الحكايه مع العربيه اللى بيحرت بيها على مدار اليوم .... وموفق .

مهو اول مرة شوفتها و نظرة فاعجاب فحب كان في عربية تاكس سالت السواق العربية دية اسمها ايه
قالي الامورة دية بي واي دي قالي عفشتها كورلا وماتورها مشيوبيشي من ساعتها دخلت دماغي