بيجو ٣٠١ اوتوماتيك ولا مانيوال

**modysasazin** · 11-09-2013 10:08 PM

السلام عليكم
انا بجد معجب جدا بالمنتدى عموما
وبالناس هنا في القسم خصوصا
ولهم مني كل الاحترام والتقدير.
باختصار وبدون اطالة،
اناكنت حاجز نيسان صني الشكل القديم اوتو وكنت مقتنع بيها جدا وخلاص كنت هستلم
لحد ما شفت معشوقة الجماهير ٣٠١ وبصراحة العربيه عجبتني وقررت اجيبها وفعلا حجزتها مانيوال عشان اقدر على الفرق في التمن ما بينها وما بين الصني الي هو ٨ الاف .
بس المشكله اني عايز عربيه اوتو والفرق ما بين المانيوال والاوتو كبير ١٦ الف
وخصوصا اني بفكر في مشروع الجواز ربنا يسهل وانتوا عارفين اني لو دخلت في اي حوار المصاريف بقت عامله ازاي
انا اسف اني وجعت دماغ حضراتكم بظروفي بس انا محتار جدا
فهل الاوتو تستحق الفر ق الكبير ده في السعر الي هو ١٦ الف
ولكم جزيل الشكر

**sehs15** · 11-09-2013 10:50 PM

مفيش اي فرق بين الاوتو البيزلاين والمانيوال خاااااالص ... و فرق السعر كبير .. خليك في المانيوال احسن .. لو هتجيب اوتو اعلي شويه وهات الهاي لاين . كان نفسي تبقي في مانيوال كامله بنفس سعر الاوتو مثلا

**Haitham G** · 11-09-2013 11:32 PM

كلام مظبوط مفيش فرق بين المانيوال و الاوتوماتيك لو متعود على المانيوال خليك فيه انما لو حتجيب اوتو يبقى حاول تجيب الهاى لاين عشان فرق الاوبشن يستاهل و بالتوفيق ان شاء الله

**modysasazin** · 12-09-2013 03:52 AM

شكرا جزيلا على نصايحكم

**captianyamany2** · 12-09-2013 12:29 PM

فعلا مفيش اي فرق بين المانيوال والاوتو بيزلاين يستهال فرق الفلوس ده وخصوصا ان اهم ما يميز ال301 هو سعرها انا ركبت المانيوال منها وناوي ان شاء الله اجيبها بس محتاج معرض يقسطلي مباشر بدون بنك ياريت لو حد يقدر يفدني ..............................

**amrelsaqqa** · 13-09-2013 03:16 PM

خليك في المانيوال وان شاء الله مش هتندم
المانيوال الجديد ناعم ومش متعب
وانا عملت زيك بالظبط وحجزت المانيوال الحمد لله وفعلا 16 الف فرق فتيس فرق كبير جدا، ومعناه ان الفتيس اصلا غالى ، يعنى لا قدر الله لو جبت اوتوماتيك والفتيس حصلله حاجة هتبقى مشكلة

الاوتوماتيك راحة بال فقط اثناء السواقة في الزحمة
انما المانيوال راحة بال على طول ، الفتيس مش هيبوظ ، عربيتك وقفت تزقها ، استهلاك بنزين اقل .. سحب اعلى ، تحكم اكبر في العربية خصوصا في الطوارئ ، صيانة ارخص ...
الصراحة المانيوال كله مميزات
ورغم انى تقريبا اتعودت على سواقة الاوتوماتيك في الكورولا بعد ما كنت بسوق مانيوال زمان ، انما راجع للمانيوال تانى بقلب جامد وان شاء الله مش هندم

وفعلا لو كان في هايلاين مانيوال كنت جبتها ومجبتش بيزلاين اوتوماتيك

**mohamed hussei** · 13-09-2013 09:34 PM

يعني مانويل حلو ؟ ممكن حد يقولي مميزات مانويل واتوماتيك علشان انا مجرب مانويل 128 فا دة مش مانويل اساسا :d

**amrelsaqqa** · 13-09-2013 09:52 PM

بص لو انت من النوع اللى بتستمتع بالسواقة وبتدقق في كل حاجة يعنى تبقى ماشى مثلا على الرابع وتطلب معاك تسقط للتاالت وتطييييييير او تبقى ماشي عادى وفجأة تطلب معاك تجيب الرابع على 25 وتطلب معاك مشي سلانسيه هادي :d
او تاخد ملف جامد وتسقط غيار عشان تحكم العربية او غيار عكسى مع الفرملة عشان تقف اسرع
كدة انت بتحب المانيوال ومش هتستريح للاوتوماتيك وهتاخد وقت على ما تتعود عليه

عيوب المانيوال السواقة في الزحمة الشديدة يعنى تتحرك 2 متر وتقف تماما وترجع تتحرك 2 متر وتقف تماااااااما ، ده اللى رخم في المانيوال بس بعض الناس ممكن تتغاضى عن الحتة دى مقابل بقية المميزات

الاوتوماتيك بقى لو انت مش بتحب تركز مع النقلات اصلا ونفسك تحس ان العربية كلها نقلة واحدة ، وما بتحبش تبص على عداد الار بي ام اصلا ! ، وطريقك كمان كله زحمة وبتستخدم العربية مجرد وسيلة للتنقل ومش بتحب السواقة اوى او بتزهق منها او مش بتستمتع بيها .. . يبقى هنا الاوتوماتيك افضل ليك بالتأكيد ..

انا بسوق الكورولا اوتو بتاعت الحاج :D وببقى حاطط ايدى على الفتيس طول مانا سايق :d كأنها مانيوال لانى كنت خدت على كدة وبحب كدة وفعلا مفتقد المانيوال جدا ودلوقتى راجعله اهو :d

عيب الاوتوماتيك انه بيعلمك الانتخة في السواقة بطريقة رهيبة والسرحان ، يعنى انت مش بتبذل اي مجهود او اي تركيز عشان تحرك العربية ، انا كتير ساعات الاقى العربية سرحت منى وانا مش واخد بالى واحس انى هلبس في اللى قدامى مثلا :d خصوصا لما يكون حد قاعد جنبى وانا عمال اكلمه ، مش زي المانيوال ، بتحسب حساب كل طلعة وكل حركة في العربية وبتبقى مركز معاها ومع صوت الموتور على طول

**mohamed hussei** · 13-09-2013 09:59 PM

المشاركة الأصلية كتبت بواسطة amrelsaqqa

بص لو انت من النوع اللى بتستمتع بالسواقة وبتدقق في كل حاجة يعنى تبقى ماشى مثلا على الرابع وتطلب معاك تسقط للتاالت وتطييييييير او تبقى ماشي عادى وفجأة تطلب معاك تجيب الرابع على 25 وتطلب معاك مشي سلانسيه هادي :d
او تاخد ملف جامد وتسقط غيار عشان تحكم العربية او غيار عكسى مع الفرملة عشان تقف اسرع
كدة انت بتحب المانيوال ومش هتستريح للاوتوماتيك وهتاخد وقت على ما تتعود عليه

عيوب المانيوال السواقة في الزحمة الشديدة يعنى تتحرك 2 متر وتقف تماما وترجع تتحرك 2 متر وتقف تماااااااما ، ده اللى رخم في المانيوال بس بعض الناس ممكن تتغاضى عن الحتة دى مقابل بقية المميزات

الاوتوماتيك بقى لو انت مش بتحب تركز مع النقلات اصلا ونفسك تحس ان العربية كلها نقلة واحدة ، وما بتحبش تبص على عداد الار بي ام اصلا ! ، وطريقك كمان كله زحمة وبتستخدم العربية مجرد وسيلة للتنقل ومش بتحب السواقة اوى او بتزهق منها او مش بتستمتع بيها .. . يبقى هنا الاوتوماتيك افضل ليك بالتأكيد ..

انا بسوق الكورولا اوتو بتاعت الحاج :d وببقى حاطط ايدى على الفتيس طول مانا سايق :d كأنها مانيوال لانى كنت خدت على كدة وبحب كدة وفعلا مفتقد المانيوال جدا ودلوقتى راجعله اهو :d

عيب الاوتوماتيك انه بيعلمك الانتخة في السواقة بطريقة رهيبة والسرحان ، يعنى انت مش بتبذل اي مجهود او اي تركيز عشان تحرك العربية ، انا كتير ساعات الاقى العربية سرحت منى وانا مش واخد بالى واحس انى هلبس في اللى قدامى مثلا :d خصوصا لما يكون حد قاعد جنبى وانا عمال اكلمه ، مش زي المانيوال ، بتحسب حساب كل طلعة وكل حركة في العربية وبتبقى مركز معاها ومع صوت الموتور على طول

لا كدة فاكس اتوماتيك هو مانويل حلو واحد يوفر باقي فلوس ويظبطها وتبئا شبة الهاي لاين وباقي نستفاد بية هي كدة كدة قسط انا ممكن الي مكرهني من مانويل 128 انت بتحارب في ناقلة ولازم وانت بتنقل ل تالت تجيب عصاية فوق ولو مجبتهاش فتيس يزرجن والخامس بيجاب بطريقة غريبة كدة فا دة كرهي في مانويل

**amrelsaqqa** · 13-09-2013 10:03 PM

المشاركة الأصلية كتبت بواسطة mohamed hussei

لا كدة فاكس اتوماتيك هو مانويل حلو واحد يوفر باقي فلوس ويظبطها وتبئا شبة الهاي لاين وباقي نستفاد بية هي كدة كدة قسط انا ممكن الي مكرهني من مانويل 128 انت بتحارب في ناقلة ولازم وانت بتنقل ل تالت تجيب عصاية فوق ولو مجبتهاش فتيس يزرجن والخامس بيجاب بطريقة غريبة كدة فا دة كرهي في مانويل

لا لو مشكلتك مع العصاية بس ما تقلقش
الجديد كله ناعم جدا جدا في الفتيس
والدبرياج كمان ناعم جدا

انما لو انت مش عاوز تدوس دبرياج خالص اصلا والمهم العربية تمشى وخلاص يبقى الاوتوماتيك في الحالة دى