عنوان غريب ,, واحد بيتأسف لعربيته , فيها حاجه ديه , عربيتى اللى شايلانى و مريحانى , حد له فيه , ايه يا عم مالك داخل قافش كده علينا , طب قول سلام عليكم , مساء الخير , ايه يا عم أحمد , قوام نسيتنا كده , لا سلام و لا كلام , اش حال احنا واكلين مع بعض عيش و كبده و مخمسين مع بعض فى حجر واحد ,, ايه ده دى حتى متهونش الا على قليل ال .....

بس .... انا اسف ,, ابوس راسكم ,, محدش يزعل منى ,, ظروفى كانت صعبة الفترة اللى فاتت و ربنا يعلم

طب ايه ؟

داخل تتأسف لعربيتك اسف علنى على المنتدى و خارج تانى ؟!!

ما هو ماحدش سألنى ؟!!

سألك ايه ؟!!

سألنى هو انا بتاسف لعربيتى ليه ؟!!

بتتاسف ليه ؟!!






عشان مانزلتش الزيت الموبيل xhp 5000 اللى حطهولى الوكيل فى صيانة الالف , مانزلتوش غير على 4300 كم

من الاخر ياخوانا انا غيرت لزيت وولف 5w40 , مع إضافة EZI POWER LUBE

و بعد ...


ألف اف مبروك

الله يبارك فيك

لا و الله فرحتنى

الله يفرحك كمان و كمان بس سيبنى اخلص الكلمتين و بعدين تبدأ المباركات

و بعد ما شوفت اداء العربية بعد هذا التغيير المزدوج (وولف + ايزى) حسيت ان انا مكنتش راكب عربيه فل الاول ايام الموبيل , ده انا كنت راكب جرار متهالك !!!!!

طبعا فرق شاسع فى السحب و الجرى و التسارع و صوت الموتور

اهم حجه حصلت هى انخفاض صوت الموتور بشكل كبير على كل السرعات و على كل الار بى ام

انخفاض الاهتزازات الناتجه عن دوران الموتور سواء فى السلانسيه او عند التسارع

غيرت الزيت فى مقر وولف فى الحى السادس مدينة نصر

لو انت فى طريق النصر حتخش منه على شارع الشهيد أو بيسموه طريق المخيم الدائم , تانى تقاطع حيقابلك خش يمين , حتلاقيهم على اليمين برضه قدام مصنع الكوكاكولا

سعر الاربعه لتر 295

سعر الفلتر 25

المجموع يا متعلمين يا بتوع المدارس = 320

و خصم 30 جنيه عشان انا عضو فعال فى نايل موتورز يبقى المدفوع 290 جم فقط لا غير

زائد عطر للسيارة و استيكر

العربية خدت تلاته لتر الا شوية عشان اضافة الايزى و بقيت الجركن معايا فل بيت

و محططش الانجين فلاش عشان خطر

هاه , حد عايز معلومة تانى قبل ما اهرب

صورت ثلاثة صور حنزلهم المشاركات القادمه فى نفس الموضوع

صورة الايزى و انا حاطه على سقف العربيه قبل ما افتحه و احطه مع الزيت
صورة لعلبة الوولف بعد ما اتفتحت و الراجل حط منها شوية
صورة الراجل و هو نازل تحت عربيتى بيغير الزيت

و هذا فقط للتشويق و بالله التوفيق