انا معروض عليا شغل فى قطر براتب 3000 ريال + عمولة 1 فى المئة + سكن + سيارة
وانا اعزب فهل العرض ده كويس ولا موحش
عرض للطباعة
انا معروض عليا شغل فى قطر براتب 3000 ريال + عمولة 1 فى المئة + سكن + سيارة
وانا اعزب فهل العرض ده كويس ولا موحش
بص انا معرفش كتير في رواتب قطر وظروفها,
بس في حاجات بتتاخد بالعقل, لو أنت عندك هنا شغل وعربية شخصية بتتحرك بيها
ومرتاح في شغلك والمرتب مريحك, خليك مع أهلك عشان القعدة وسط أهلك متتعوضش,,
أما لو مفيش شغل, ومفيش عربية شخصية, يبقي أكيد تسافر
ومن سفرك هتاخد خبرة + هتلاقي فرص تانية قدامك بتتفتح لك وبتطلبك لما بتاخد خبرة سنة ورا سنة.
لكن طول مانت قاعد هنا, ممكن فرصة السفر متتعوضش, كله في علم الغيب,
قطر معدل الدخل فيها رقم 1 علي مستوي العالم, طبعاً دا مش لينا او اللي بيشتغلو من دول تانية هناك, بس دي تعتبر بداية كويسة.
قليل الي حد ما
الاكل هناك غالي مش رخيص .. و الحاجات المعيشيه غاليه
و خلي بالك الريال القطري مش غالي اوي ... لما ترجعه مصري مش هتلاقي الفرق الكبير
مش بحبطك .. بس اكيد في احسن
صديقي المواطن المرتب قليل عن تجارب ولكن إتكل على الله السفر بيفتح آفاق أخرى ومن غير متسأل تسافر حتى لو شغلك بمصر أحسن عشان ميجيش يوم تندم على فرصة ضيعتها بس تأكد من السكن ليكون معاك 17 هندي و20 بنغالي في الغرفة ودمتم.للنضال
اتوكل على الله يا باشا لازم تبدا صغير وواحده واحده هتتزبط
الاكل في المطاعم الشعبيه المنتشره جدا هنا في حدود 30 ريال الوجبه تزيد او تقل بس لو مثلا هتهري نفسك فراخ مشويه و رز في متوسط انفاق اليوم هيكون 50 ريال و دا لو مش مدخن فا غالبا مش هتعرف تحوش الا لو هتطبخ في البيت اغلب الوقت بس لو مش هتحوش الـ3 الاف يعيشوك كويس
نوع الشغل ايه؟
بص هو المرتب قليل بس لو انت هنا مش بتاخد زيه بالمصرى يبقى متروحش العيشه غاليه بس البلد حلوه و الناس محترمه و حسب الكفيل بتاعك ممكن تعمل شغل جمب شغلك و كده
اتاكد من موضوع السكن ده اهم حاجه عشان لو معجبكش السكن و حبيت تسكن لوحدك مرتبك ده مش حينفع تاخد بيه شقه و ربنا يوفقك
من الاخر لو انت ناجح فى شغلك خليك هنا لو الدنيا مش تمام جرب تاخد الفرصه
السفر في حد ذاته فرصة. الشغل بيجيب شغل والتعرف بالناس تانية ولغات تانية بيديك خبرات وبيغلي سعرك فالسوق. توكل علي الله وسافر و لو معجبكش الحوار مش هتغلب يعني انك تخليهم يكسرو وراك زير. توكل علي الله وجرب وربنا يوفقك أن شاء الله.
انا برا مصر برده بس فالكويت وعترف قرف وذل الكفيل بس لو الواحد اعد يفكر كدة مش هيعمل حاجة ولا هيطلع من بيته فانا رايي الشخصي يسافر ويجرب بنفسه ويحكم بنفسه من غير حكم عالسمع بس اللي يستحمله واحد غيره ميستحملوش والعكس كل واحد مختلف عن التاني. فيسافر ويشوغ رنفسه افضل.
حاول تتفاوض في الراتب و تزوده أو تضيف بند زياده سنويه في العقد .... موضوع انه ياخد الباسبور ده ممنوع قانونا بس حتى لو معاك الباسبور متقدرش تطلع من المطار بدون خروجيه (تصريح موافقه من الكفيل) ..... لو ناوي أتأكد من ظروف السكن وأنك في غرفه لوحدك
صديقي المواطن
أنا من خلال تجاربي الكثير في الغربة توصلت لنظرية في كل 90% من الناس اللي سافرت أي حد يسافر مهما تمرمط ومهما تعب ومهما كان ربك مضيقها عليه أول ميوصل ومهما تعبت في أول أيام لكن.الخلاصة.في خلال 5 سنين حتتغير خلقا وأخلاقا وماديا حتتفير أمورك أما لو حد سأل عن ال 10% فدول بتوغ أمي وحشتتي مراتي وحشاني أو واحد بيبعت شقاه كله في الغربة لمراته وأول ميرجع مراته تطرده بره وتاخد شقته وشقى عمره وكمان الناس بتاع مصر هي أمي ومقدرش أعيش من غير مشوفها كل 5 دقايق
وطبعا اللي عايز ياكل رغيف عيش مستوي لازم يقربه عالنار وده ينطبق على الرزق وفرص العمل الفلوس والفرص هناك فلازم إنت تكون قريب منها هناك عشان تعرف تعيش اللحظة
ودمتم للنضال
سافر حتى لو حتضيع سنة من عمرك تحس نفسك مش حتحوش حاجة صدقني من هناك حتتشعب القرص وأوصيك باﻷمانة وترك الفهلوة حتكسب على طول أما بالفهلوة حتكسب مرة وتخسر كل مرة وهذه نصيحتي
كلام واقعي جداً ومنطقي جداً وناتج عن خبرة لأني اعرف ناس مرت بنفس التجارب دي وقالت نفس الكلام, وناس لسه عايشة في نفس الكلام دا لحد إنهارده.
والخبرة في الأمور دي أحسن من الفتاوي من اللي مراحش ومجربش,,
وأنا من هنا بأييد كلامك, ودا اللي حاولت أقوله,, أنا اعرف ناس سافرت علي مرتبات أقل من ٣٠٠٠
ودلوقتي راكبين كرايزلر ودودج وماشاء الله عليهم,, ربنا أكرمهم أخر كرم عشان كان بيسعو,, والسعي أهم شئ.
ولصاحب الموضوع الاختيار والاستخارة. لو عنده شغل هنا مريحة ودخل كويس ومفيش التزامات يستخير ربنا,,
أما لو معندوش فالتجرية لوحدها هتديه خبرة وهتفتح قدامه أبواب كتير هناك لما يوصل ويجرب ويشوف البلد ويتعرف علي ناس جديدة.
فا ربنا يوفقه, ودمت للنضال.! :)
هتتبهدل اخر بهدله
مهم قوي معرفة سن حضرتك
واعزب ولا متزوج ولو نعم فمن امتى
لازم تعرف حضرتك ان السعي للرزق شئ مهم جدا ولكن
له ضريبة وطريق كفاح طويل يتطلب سن صغير لتكملة المشوار دون الرجوع في منتصف الطريق
وبالتوفيق ان شاء الله
وعليك قبل وبعد كل شئ بالاستخارة
من الواضح ان المرتب مش مغرى و الاقامه غير معروفه/واضحه ... ممكن تكون sharing و مش اى حد يتقبل ده ... غير موضوع الكفيل المزعج ... كما انك متردد ..
التضحيه و المغامره بالسفر تكون مقابل دخل مادى افضل ثم عيشه افضل/اريح ... و كل دا يكون قابل للزياده مع الوقت ...
بالتوفيق ... تحياتى ...