دايما سعر النت اغلي بكتير من بره .. ليه ؟

**A3SAR** · 12-09-2013 01:20 AM

السلام عليكم
-------------
انا لاحظت ان دايما سعر النت اغلي من بره بفرق كبير ممكن يوصل ل 5000 جنيه
يعني مثلا علي النت العربيه الكريستالة حاله نطيفة بتعملها 50000 وبره فيه عربيات كويسه جدا وبتبقي ب 45000 او اقل كمان ..
للاسف الموضوع ده بيقفل باب التعاملات رغم انها بتبقي ممتازة لانها بعيده عن السمسره وعن التجار
وللاسف انا لقيت ده كمان هنا في المنتدى
الناس بتعرض عربيات باسعار خياليه وكأنهم جايبيين العربيه لو اتباعت ماشي ولو متباعتش اهى موجوده مش هتخسر !!
مش حاسس ان اللى بيبيع بيقول الرقم اللى هو عايزة فعلا
وياريت يكون فيه مشرف او اكتر مسئول عن القسم بيسعر العربيه ويكون كل المواضييع مزوده بالصور والتفاصيل اكتر .. عشان منلجأش للتجار بره
شكرا

**eng.salama93** · 12-09-2013 02:05 AM

الفصال

**Saforyaa** · 12-09-2013 04:45 AM

كلو بيفاصل ده غير الواحد بيبقي زهقان يقوم عارض عربيتو وهو مش عايز يبعها
فعادي يعني

**A3SAR** · 12-09-2013 05:42 AM

المشاركة الأصلية كتبت بواسطة saforyaa

كلو بيفاصل ده غير الواحد بيبقي زهقان يقوم عارض عربيتو وهو مش عايز يبعها
فعادي يعني

مهو ده اللى انا عايز اقوله
الناس تحولت لتجار وهما مش حاسيين
المفروض ان الواحد وهو بيبع عربيته يكون عنده ضمير ويقيمها صح ويقول كلمه واحده ولا يتنازل عن السعر
لكن انا كنت هاشتري ويرا وفي التليفون الراجل قالي نهائي 40 الف وهو كاتب 43 الف من غير ما اروح واشوفها اصلا
معني كده ان كل خطوة انا هاعملها هو ممكن ينزل الفين تلاته اومال لما يشوف الفلوس ؟؟
للاسف الواحد بقي محتار جدا وحاسس انه بيتعامل مع تجار رغم انهم اصحاب عربيات بالعكس دول بقوا اشطر منهم كمان ..
ادعولي ربنا يوقفلي واحد ابن حلال مبيغشش ويكون عنده ضمير

**saddam** · 12-09-2013 06:29 AM

صديقي المواطن
دلوأتي بقت عادة عند الشعب المصري ولو شلت تلفون على واحد بيبيع وقال لك كلام نهائي لا إراديا حتزعل منو وتقفل التلفون في وشو وتقول اﻹنسان ده لا يقدر رغم إنو حقه ولكن خلاص تعودنا لازم تسمع سعرين ونتعايش ودمتم للنضال

**mohammedabdallh** · 12-09-2013 10:57 AM

انت زعلان علشان السعر
انال بقى لما تشوف عربيه وتعجبك وتجى تتصل تلاقى التلفون مقفول على طوول
او ميردش عليك
او تتفقوا وبعد كدا ميردش عليك
او يقعد يعمل حورات
او يقول كلام وتروح مشوار تقعد فيه 5 ساعات وتروح تلاقى العربيه فيها كلام تانى خالص
او ناس بتستهبل تحط رقم تليفون ناس تانيه ودى كتير
او تيجى تكلم واحد يكلمك بقرف ((هو انا بشحت منك يابن التيييييييت ))
وفى الاخر هو ده الشعب المصرى ولازم تتعامل مع انك مصرى

**exelence** · 12-09-2013 11:27 AM

المشاركة الأصلية كتبت بواسطة mohammedabdallh

وفى الاخر هو ده الشعب المصرى ولازم تتعامل مع انك مصرى

هو ده الكلام

**Land_Cruiser** · 12-09-2013 11:28 AM

هو موضوع البيع عندنا بيبقي له دوره حياه : يعني بيبدأ بفكره البيع و ساعتها بيتم وضع سعر مبدأي اكتر زياده من سعر العربيه لعل و عسي يلاقي مشتري بالسعر ده خاصه و ان كانت العربيه حالتها نادره و تستأهل و من الموديلات المطلوبه في السوق او حتي لو كانت عاديه او فيها مشاكل برضه صاحبها بيبقي عايز يبيعها بأعلي سعر يمكن يلاقي حد يدبس فيها او مبيفهمش قوي في العربيات.

المرحله التانيه : تأتي بعد عدم نجاح المرحله الأولي و عده تليفونات و معاينات للعربيه و إجماع المشترين علي ان الرقم ده بعيد قوي عن تمنها فبيبدأ ساعتها صاحب العربيه يتنبه الي رينج سعرها الحقيقي و حسب احتياجه للفلوس اللي بيتوقف علي سبب البيع يشوف هيتصرف أزاي يعني هينزل السعر او هيلغي او يؤجل فكره البيع علشان ما يخسرش جامد

الخلاصه ان السعر اللي حضرتك بتشوفه زياده ده بيبقي بتاع المرحله الأولي و اذا العربيه اتباعت به احيانا الإعلان بتلاقيه لسه موجود فصاحب العربيه بيكسل يرد علي التليفونات او بيسافر مثلا فبيقفل التليفون. و تستنتج من كده انها اتباعت و إلا هتلاقيها معروضه في كل حته و سعرها كل شويه عمال ينزل نتيجه لعدم الاقبال عليها بسبب السعر او الحاله الفعليه

**asbeats** · 12-09-2013 12:29 PM

الفكرة ان اللي بيشتري من النت بيبقى معتقد ان السعر هيكون أرخص من التجار .. لكن على العكس اللي بيبيع على النت خاصة لو العربية حالتها كويسة بيبقى أغلى .. لان التجار بيقللوا سعر العربية جدا عشان يطلعوا بأكبر مكسب ساعة البيع ...واكتر العربيات المعروضة على مواقع البيع زي كونتاكت كار تجار اللي بيعرضوها وبيقللوا السعر عشان لما حضرتك تيجي تبيع يقوللك ادخل على النت وشوف الأسعار ... لكن لما تيجي تشتري منه هتشوف كلام تاني خالص ... وبالتالي صاحب العربية يلجأ لعرضها على النت بحثا عن من يقدر حالة العربية ويديها حقها ....
اقولك مثال ... تاجر اشترى من واحد قريبي عربية كرولا ب 120 الف وكان مستعجل شويتين في بيعها... وبعد مليون حلفان ان ده سعرها وانه كده مش هيكسب فيها حاجة لما يبيعها ... وبالعافية زود كمان الفين ... وبعد كده قريبي اكتشف بالصدفة البحتة وعن طريقي"انا شفت العقد بالصدفة" ان التاجر باعها ب 134 الف وبعدها بكام يوم ... يعني التاجر لقى واحد عارف قيمة العربية لانها كانت اعلى فئة وعاملة اقل من 30 الف كم ...
وانا دلوقت عارض عربيتي للبيع ... ولما جيت احدد السعر روحت لكذا تاجر وعرفت هايخدوها مني بكام وذودت على السعر ده مبلغ معقول بحيث اقتسم المكسب اللي كان هايخده التاجر بيني وبين الشاري ... وبالتالي لما حد هيشتري مني لا يمكن هانزل عن سعر معين لاني بكده هكون خسران ...

اعتقد ان البيع والشراء يحتاج الى صبر ... وفيه ناس وانا منهم مبحبش ابخس الناس قيمة حاجتها ... يعني لو حد بيبيع حاجة والسعر مش مناسبني بتفاوض معاه لكن مش لدرجة اني اشتري وهو كاره البيعة ... وأغلب الناس اللي بتحاول تضغط على الناس في سعر الحاجة بيروحوا للتاجر ويدفعوا المبلغ اللي بيطلبه وهم راضيين رغم انهم بيبقوا شاكين في العربية ...

وأخيرا المقياس هو حالة العربية .. لوحالتها ممتازة تستاهل يبقى فرق الفلوس هيهون ساعتها لأن العربية مش هتحتاج مصاريف ... ولو الحالة مش قد كده يبقى حرام كل مليم هيتحط فيها ولو ببلاش ... لأن اعطالها بتكون متسلسلة .. عطل يؤدي الى عطل وبالوعة مصاريف لا نهاية لها ... واللي اتوفر في السعر ساعة الشراء اتصرف اضعافة ساعة في التصليحات.