نيسان صنى سوبر صالون وتقرير 100000 هام لكل الملاك

انا معايا صني سوبر صالون 2009 عاملة 100000كيلوا الشكل الجديد موديل2010 اشترتها زيروا من 8 2009 انا بحب اوضح حاجات مهمة جدا
اولا : نيسان في مصر بتصنع في مصنع نيسان المملوك بالكامل لنيسان اليابان مدير المصنع نفسة ياباني
ومعظم المهندسين يابانين يعني حجة التقفيل المصري اللي دايما يتكرر غير مبررة لان الناس دول ملتزمين وعمرهم ما هايضحوا بسمعتهم.

ثانيا: اكذوبة ان العربية غول بنزين انا باعمل 350-380 كيلو جوة البلد 33-35 لتر بنزين ولما باسافر اسكندرية رايح جاي 35 لتر من 450-480 كيلو. وعلشان توفر فى البنزين خليك على اقل من 3000 RPM.

العربية دي انا سعيد جدا بيها لها مميزات كثيرة منها انها اعتمادية جدا تستحمل السفر شنطة العربية واسعة جدا ودة اللي مخلي العربية ضيقة شوية فى الكرسى الخلفي التكييف تلاجة ولم يعطل مرة واحدة ولكن هناك بعض الاجراءات كلى تحافظ على التكييف فى فصل الشتاء لابد من تشغيل التكييف مرة واحدة علي الاقل لمدة 10 دقائق كل شهر غسل السربنتينة بالماء كل فترة كل 20000 الف راجع علي شحن الفريون فى التوكيل.

سحب العربية ممتاز لكنة بيتاثر جدا بحاجتين في الاول لما تيجى على السلانسية بالبطارية عشان كدة انا بنصح بتغيير البطارية السائلة ببطارية جافة بعد السنة الاولى. لما العربية تجي تشد وتجري بتتاثر جدا بفلتر الهوا علشان كدة انا كنت بغيرة كل15000 الف وبنضفة كل 2000 كيلو ببلور هواء علشان انتم عارفين مشكلة التراب فى مصر. وبعد كدة العربية بتبقى طلقة وبتجيب معايا 170-180 بسهولة. وحليت مشكلة الفلتر نهائيا انى جبت فلتر امريكى بيعقد مدى الحياة اسمة k&n من شركةTPS GRAGE فى الحرفيين وبتنضف كل 50000. الف كيلو وبيتزيت بمادة 120 جنية وهو تمنة 400-430 جنية.
العربية دى انا جبتها بعد دراسة كاملة فى السوق لمدة 4 شهور وفيها كل عوامل الامان. ABS,EBD,BA الخاص بالفرامل و كمان 2 air bags وكمان بارات صلب لزيادة ثبات العربية ولذلك ثبات العربية جميل جداوكمان نظام ضد السرقة nats العربية بتفصل كهربا لما تستخدم مفتاح اخر مصطنع. كل دة 103000 الف جنية.
بصوا للسوق وشوفوا العربيات بالامكانت دى بكام اما البكانتو 2011 1300 cc
96000 جندى.
العربية خلال 100000 كيلو لم تغير اى شىء غير الزيوت والتيل والسيور والكاوتش وقاعدة موتور عشان الكاوتش اللى فيها تاكل خلال اربع سنين ونصف.
نصيحة علشان تحس ان العربية ناعمة والعفشة تبقى حلوة حط نيتروجين وظبطة على 30 ورا و32 قدام.
غيروالزيت واستخدموا valvoline او lquimoly انا فرق معايا جدا لما غيرت موبيل1*
وجبت فالفولين واستهلاك البنزين فرق معايا جدا.
واخيرا انا قرات معظم التعليقات عن النيسان صنى وللاسف معظمها عن طريق السمع وليس التجربة
واى استفسار انا فى الخدمة.

تقرير واقعي من مالك للسياره فعلا .. المشكله يافندم ان الناس تعليقاتها عن السيارات غالبا بتكون سماعيه ولاتمت بصله للتجربه الحقيقيه او الامتلاك . ربنا يباركلك فيها ودمت بصحه

-حتة البطارية دي مش فاهمها الصراحة


-الفلتر k&n مش بيعمل المعجزات على فكرة و كمان ده بيزود استهلاك البنزين مش بيقلله

-توفير البنزين حسب سواقتك

-برده العربية دي فيها عيب خطير و هي ضفيرة الكهرباء اللي بتبوظ

-مبروك عليك و اللي واثق في عربيته مش محتاج يثبت للناس حاجة

I thought Nissan dealership was with Abd el Moniem Soudi , The dealer of Suzuki as well
is this still running or changed??

Note : Japanese cars are the best ever

ما شاء الله
مشكورر علي نقل التجربة

ربنا يباركلك فيها , وتكمل معاك ال مليون يارب

بس معلش تحفظ على استهلاك البنزين , التيدا افضل منها مليون مره معايا على الاقل

السفر على سرعات ما بين 100 و 140 , الاستهلاك ف التفويله 650 كيلو
السفر على سرعات عاليه ,, ما بين 150 - 180 , الاستهلاك 580 كيلوا ف التفويله

وسط البلد بصراحه مااعرفش , معظم مشوايري سفر ومسافات

بالتوفيق

مبروك يا باشا الصيانه وعقبال صيانه المليون ,, بصراحه تقرير وافي من مالك عربيه مهتم ومركز بشده وحابب عربيته ربنا يخليهاليك ., بصراحه فعلا النيسان افضل سياره في فئتها علي الاطلاااااق ,, مافيهاش كلام بس لحد 2011 بس اما بقي الشكل الجديد دا بقي نو كومنت بصراحه ,,
ممكن بقي تقولنا :


العربية خلال 100000 كيلو لم تغير اى شىء غير الزيوت والتيل والسيور والكاوتش وقاعدة موتور عشان الكاوتش اللى فيها تاكل خلال اربع سنين ونصف.

يا تري بتجيب القطع دي ياباني اصلي من التوكيل ولا بتتعامل مع تجار غير التوكيل ؟؟؟



غيروالزيت واستخدموا valvoline او lquimoly انا فرق معايا جدا لما غيرت موبيل1*
وجبت فالفولين واستهلاك البنزين فرق معايا جدا.

وياريت باردو تقولي سعر الليتر من الفالفولين والليكوي عامل كام او سعر الجركن ال 4 لتر حتي وموجود فين بسهوله ..

وشكرا ليك ,