تقييم لاوبل فيكترا بي 1 من خلال 6 سنوات (تجربه شخصيه)

**gomgom3** · 14-09-2013 09:12 PM

كلام حضرتك كله صح ياستاذ فادي
بس انا شديت عربيه والدي مرتين قبل كدة وهو نوعها مرسيدس زلمكه وزنها 2 طن و200 كيلو بالظبط
فركت في الاول بس شدتها يجي 10 كيلو ومره شديت بيجو 307 الكبيره ديه تحس انها station وبردو كنت حاسسها عاديه
ازود علي عيوب حضرتك مكان الكلاكس وحش اووووووووووي ونفسي اعدله بس مش لاقي مكان تاني في العربيه

**Hesham.H** · 14-09-2013 11:35 PM

تقرير رائع ومش غريب على المتألق فادى باشا ... وفعلا الموتور الاسود أعطاله قليله وطالما مظبط عربيتك هايبقى التكييف كويس جدا والحراره طول ما انت مش مهمل فى العربيه وايدك فيها هاتبقى مظبوطه
تحياتى

**sameh_se** · 15-09-2013 01:51 PM

مقدرش اقول غير الله عليك تسلم لينا........... استاذ

**Tiar** · 15-09-2013 02:19 PM

المشاركة الأصلية كتبت بواسطة فادى محمد

السلام عليكم ورحمه الله وبركاته

..
قبل الفيكترا كنت باركب ياباني تويوتا كارينا-مازدا323-سوبارو ليون ..
الحقيقه اني كنت بدور بعد ده علي متسوبيشي لانسر كريستاله ومش لاقي
الحاله اللي انا عاوزها ووقعت قدامي الفيكترا بالصدفه وقلت لا لا. روحت البيت
وصورتها في بالي محفوظه لونها ابيض باشاواتي . تاني يوم الصبح رحت خلصت فيها ..
والحمد لله كانت احلي اختيار فعلا الالماني الماني ولو كان ربع امامي..
. بعد 6 سنوات عشره هقولكم علي مميزات الموديل ده (1600 سي سي مانوال) من وجهه نظري

المميزات..
-شكل عصري وسابق عمره بكتير
-برستيج عالي قوي + طابع رياضي
-صالون واسع ومناسب جدا لعيله واطفال
-حجم الشنطه مهوول ممكن تفرش فيها وتنام
-العربيه عاليه عن الارض ومش سهل تحك
في المطبات حتي مع الحموله الكامله
-كماليات معقوله جدا واحلي ميزه ان خاصيه
الايه بي اس اساسيه في اقل فئه
-قطع غيار مش غاليه انما متنوعه في مصادرها
بلاد وشركات ومعمره جدددددا فلتر البنزين عندنا ب45ج الماني
في حين فلتر بنزين اللانسر البومه الاصلي ب540ج ( مش عارف ليه وهو اصلا مجموعه ورق ومرشحات)والصيني ب90ج
خساره فيه الفلوس
-موتور تقريبا بلا اعطال او مشاكل , معلومه جانبيه ..
الموتور ده استخدمته شركه جي ام في اوائل الالفينات في
سياره ربع نقل جي ام ايسوزو مع تعديلات بسيطه جدا
-اداء الموتور علي السرعات العاليه مرضي جدا
-ثبات السياره ماشاء الله وهمي (وزنها 1245 كج متوزعين علي جسم السياره بذكاء )
-صعب تغرز منك في الرمل لان عزمها بيوصل 122 نيوتن انما لو غرزت ماتلومش الا نفسك
, شوف حد يشد الطن وربع وزنها )
-عزل السياره ممتاز
-فراملها ماشاء الله بيضرب بيها المثل في قوتها لو مافيش اهمال فيها
-الخامات الداخليه جيده جدا وبلاخص التابلوه
-جوده عاليه جدا في تقفيل العربيه وعاملين حساب فتحه كل مسمار ممكن تركبه للتحديث
او تركيب كماليات من موديل اعلي
-الاجزاء الكهربيه فيها (موبينه واسبراتير) عاليه جدا , في الشتاء بنزل في بحور ميه مش بيهمني
في حين عربيات تانيه احدث بتبطل وتقف.
العيوب..
-ظهر العربيه عالي زياده علي الرغم انه مهم في ديناميكيه الهوا واتساع مساحه الشنطه انما القصيرين اللي زي حالاتي بيصعب عليهم الرؤيه الخلفيه اثناء الرجوع للخلف
-طول العربيه مؤرف في الركنات وسط البلد (مش عمليه ) انما عرض العربيه قليل بيسمح لها بالدخول وسط العربيات بسهوله ( اقل من الاوكتافيا والكوروللا والنوبيرا..)
-العربيه دي جوها الداخي متطرف بمعني انك لو ركنتها في الشمس في الصيف بتلم حراره بسرعه
وتبقي نار - في الشتاء اول ماتركبها ممكن تعطس لان جوها بيبقي ابرد من الجو الخارجي ( حد خد باله؟؟) ده نتيجه استخدام مواد داخليه سميكه وطبقات عزل صوت كتير.
-الموتور ضعيف علي وزن العربيه 77 حصان قليل جدا , ده بياثر علي طلعه العربيه اول وتاي بس ( ماتحاولش تشد بيها من الثبات علشان ماتحرجش نفسك )
-الطلاء الخارجي في بعض الالوان زي الفضي والشامبين بيكلح بسرعه
-في مشاكل عامه ولو انها بسيطه جد ا بس للامانه لازم اقولها زي خرطوم راجع البنزين اللي من التانك عند معظم الناس بيشقق وينقط لو فولت للاخر - كاوتش الازاز الامامي من كتر الاستخدام بيخشن ويعيق الازاز ويحتاج يتغير
-بعيب عليهم ان معملوش مزراب صغير تحت مكان مليء البنزين علشان يصرف البنزين اللي يزيد او ميه الغسيل او المطر اللي ممكن توصل للمكان ده . كل ده بيركن في فجوه تحت مكان مليء البنزين ( اتغلبت علي المشكله دي وعدلت في المكان ده , هعمل ليها موضوع لوحدها ان شاء الله هي وتعديلات تانيه في عربيتي)
-المساحه الخلفيه مش كبيره لو الراكب الامامي وسع لنفسه . الكنبه الخلفيه كنزه , الفيكترا ايه اوسع منها
-الكراسي جودتها مش عاليه (انتاج موبيكا مصر) ومش مريحه لبعض الناس
-طبعا سعر اعاده البيع مش طبيعي نظرا لثقافه الشراء في مصر , الالماني غالي ,انت عاوز تجيب لنفسك مصيبه.. الياباني لو فاتك مش هيرجع تاني ..من الاخر هي ميزه للي بيشتري ويقني -مشكله للي عاوز يبيع .

-ماتكلمتش عن حراره ولا تكييف لان اللي مظبط عربيته ومراعيها حراره التشغيل بتبقي مظبوطه معاه ومفيش اي مشاكل كذلك التكييف لو كويس اداؤه مرضي جدا , صحيح مش زي الاسيوي بس
كويس .

الله يسامحك يا فادي

يعني عاجبك كده

شوفت انت عملت ايه

بسبب التقرير بتاعك

اه سعر فيكترا بي هيترفع فى السوق

طيار

**أبو محمد و آدم** · 19-09-2013 10:34 AM

ربنا يجزيك خير على المعلومات القيمة ده يا باشا

**abdelaziz-waleed** · 26-09-2013 11:49 PM

تقرير هايل يا فيدو كالعادة
تسلم ايدك يا باشا

**رضا جاد** · 27-03-2017 01:46 PM

انا عضو جديد عندى مشكلة فى العربية موديلها اول فكترا 95 اتوماتيك مش هاقول على مشاكل التكييف والكلام الفاضى دة اول مشكلة ظهرت لما اشتريت العربية من 3 سنين دخنة سودة اكل بنزين كتير كنت احط 100 لتر كانو بيخلصو فى اقل من ا00 كيلو الميكانيكى قالى عيب رشاشات والبى ار بيعلى وهى وقفا على سالنسية غيرت الرشاشات منعت الدخنة بس بتاكل بنزين بردو قالى الاير ماس بايظ بدور على الاير ماس مش موجود حد عندة حل ليها ولا اولع فيه احسن وياريت حد يديلنى ويرض عليا شكرا ليكو ودى اول حلقة من اعطالها
اة افتكرت لمبة الفتيس لو واقف فى اشارة وممور العربية لمبة الفتيس يتنور وانا لسة مغير الفتيس بسبب المبة دى وكل ما افتكر حاجة اقولكم

**AhmedAlex88** · 28-03-2017 01:53 PM

شكرا جدا على المعلومات

معايا اوبل فيكترا ٩٦ اوروبي، موضوع تسريب البنزين عاملي ازعاج، بقالي كام يوم بحاول اوصل فين المشكلة، لما ازود بنزين من غير ما افول بيكون فيه تسريب بسيط اثناء التزويد، ولما امشي بينتهي التسريب، لما افول بقا للاخر التسريب بيحصل اثناء التفويل وبعد ما امشي يفضل مستمر مدة لغاية ما يقف !
جيبت معايا فني نزل تحت العربية وانا بزود في محطة البنزين، وقالي التسريب جاي من فوق مش باين بالظبط منين، لازم التنك يتحل، لكن اتأكد من طرمبة البنزين من تحت الكنبة الخلفية، ومش كان فيه اي تسريب خالص، مع العلم اني بشم رائحة بنزين قوية بعد التفويل او التزويد.

هل ده له علاقة بخرطوم الراجع اللي حضرتك كنت بتقول عليه ؟

وشكراً.