السلام عليكم
انا عايز اروح بكره اسكندريه
الطريق الدولى اخباره ايه ؟
و تنصحونى انزل فين فندق او شقه كويسه يومين اتنين بس ؟
و اليومين دول اقضيهم ازاى انا مش خبره اوى فى اسكندريه
عرض للطباعة
السلام عليكم
انا عايز اروح بكره اسكندريه
الطريق الدولى اخباره ايه ؟
و تنصحونى انزل فين فندق او شقه كويسه يومين اتنين بس ؟
و اليومين دول اقضيهم ازاى انا مش خبره اوى فى اسكندريه
هاتنورنا فى اسكندرية :)
دلوقتى مش هاتلاقى اسعار الفنادق والشقق غالية لان دلوقتى موسم مدارس
والفندق اللى هاتنزل فيه هايبقى على حسب انت هاتبقى عايز تبقى فين فى اسكندرية ؟ اسكندرية كلها فنادق بس المهم انت تكون عايز تنزل فى انهى فندق
اخوك من اسكندرية :)
نصيحتى الشخصية عليك وعلى المندرة بحر
ربنا يخليك يا باشا منوره بوجودك
انا تقريبا ما اعرفش حاجه عن اسكندريه
جيتها مره من سنه يوم و لفيت كتير وماكنتش فاهم اى حاجه فى اى حاجه
لو ممكن تنصحنى كمبتدأ بالاماكن والفنادق دى فين
عندك فندق القوات المسلحة اللى فى المندرة على البحر ده جنب فندق شيراتون بالظبط
فيه كمان فندق تانى جنب فتح الله المنتزه لازق فيه على طول بس مش عارف اسمه ايه بس هو عموما قريب من فندق القوات المسلحة اللى بقولك عليه
هو انا اخترت لك المنطقة دى ليه ؟ لانها تعتبر امان خصوصا فى وقت حظر التجول + ان هايبقى جنبك المنتزه والمعمورة لو حبيت تدخل اى واحدة فيهم علشان تتفسح
خصوصا ان مثلا المعمورة بتبقى فاتحة عادى والكافيهات شغالة عادى وقت الحظر ولا كأن فيه اى حاجة
طب ما عندكش فكرة عن اسعاره او ارقام تليفوناته
هاتصل ليك بفندق القوات المسلحة دلوقتى واعرفلك اسعاره وارد عليك
يا باشا ما نتحرمش منك مش عارف اقولك ايه ربنا يجازيك خير
ولا يهمك ياباشا
بص انا اتصلت بيهم ودى اسعارهم
شقة 3 غرف مميزة بتطل على البحر ب 360
شقة 3 غرف جانبى بتطل على البحر بس من الجنب ب 310
شقة غرفتين بحرى ب 260
شقة غرفتين قبلى ب 210
لو الاسعار عالية عليك وعايزنى اسال على فنادق تانية ليك جوه المعمورة نفسها قولى
لا يا باشا الله يخليك الاسعار معقوله بس هى نظام شقق مش غرف ؟
ودى اسعار للمدنيين مش للظباط ؟
ولو ررحت فكره هحجز عادى ان شاء الله
اه ياباشا دى اسعار المدنين مش الظباط
بص هو الفندق عبارة عن عمارة واخدة ناصية على البحر وجنب فندق شيراتون بالظبط ؛ يعنى مكان مميز جدا ؛ هاتنزل من الفندق تلاقى بينك وبين البحر 10 متر بالظبط ؛ مجرد انك تعدى الطريق بس
لو مشيت دقيقة واحدة هاتلاقى نفسك قدام بوابة المنتزه
لو اخدت مشروع بجنيه هاتنزل المعمورة
ورا الفندق مطعم حسنى لو تعرفه وقبله ب 100 متر مطعم قدورة لو تعرفه
قدام الفندق فيه موقف الاتوبيس الاحمر المكيف ابو دورين وده بياخد الكورنيش كله فى اسكندرية ب 3 جنيه للتذكرة
لو عايز تروح لاى حد من صحابك فى اسكندرية بتركب مشروع لو عايز
لو حتى عايز تروح العجمى لاى حد من صحابك هاتلاقى وراك موقف الاتوبيس المكيفة اللى بيوديك للعجمى (تذكرته 3 جنيه للعجمى )
جنبك فتح الله ماركت وده تقدر تشترى منه اى حاجة بسعر الجملة سواء اكل او ادوات نظافة او اى حاجة تخطر على بالك وفعلا اسعاره ارخص من بره وبيعمل عروض جامدة
صدق اللى قال الاسكندرانية اجدع ناس
الفندق للاسف طلع كوملبيت غرف وشقق حتى يوم 20
مفيش اى اقترااحات تانيه
انا كده هاجل السفر لبكره
الفندق اللى قولتلك عليه جنب فتح الله المنتزه اسمه ( منتجع ايفو ) بس حاجة حلوة اوى
غرفة سينجل ب 400 جنيه باك فيو
غرفة سينجل 450 بتطل على حمام السباحة او بتطل على المنتزه ( على حسب اختيارك )
غرفة سينجل 500 جنيه بتطل على حمام السباحة والمنتزه مع بعض
طبعا كل الاسعار دى شاملة الفطار
لو الاسعار غالية عليك قولى اشوفلك فنادق تانية فى المعمورة
سؤال بس معلش هو الاسعار شقق دي فى يوم ولا بالاسبوع ؟ معلش لان معرفش حاجه فى اليكس كاسعار فى شقق وكدة وشكر وهل في مناطق اقل من كدة اذا كانت الاسعار دي ف يوم .؟
الراجل دة جابلك من الاخر جزاة اللة كل خير
وبصراحة توقيت ممتاز للسفر بعيد عن زحمة السيزون بتاع الاجازات
عندك كمان القلعة تقضى فيها وقت حلو وطبعا جرين بلازا
والمنتزة جامدة بحر وفسح تقضى فيها يوم كامل
ولو مالقيتش فنادق انزل بس على اول خالد ابن الوليد هتلاقى ميت سمسار واقفين هناك
شكرا جزيلا يا استاذ محمد مجدى على تعبلك يا باشا
انا سافرت تانى يوم بس جمصه لينا شقة هناك وقلت هقضى كام يوم و اطلع على راس البر
تانى يوم الصبح اخدت العربيه وطلعت على اسكندريه
من جمصه لاسكندريه فى حوالى ساعتين
دخلة اسكندرية لحد الكورنيش حيرتنى شويه بس الحمد لله وصلت
ده غير الكمين الغبى فى مدخل اسكندريه الى وقفناساعه
طلعت على الكورنيش اذا فجأه لقيت نفسى ادام صيدليه الدكتوره مروه ههه دى طلعت فى سبوريتنج
جبت دوا لبنتى عشان رجعت كتير طول الطريق من الطريق
المهم انا لفيت وركنت على الكورنيش و جيت اعدى الطريق عشان اروح الصيدليه
ساعه بعدى الطريق العربيات طايره كده ليه ودى اول ملاحظه
عديت و بعدين سالت امن الصيدليه على سكن
دلنى على عماره قديمه وفيها فندق فى الدور الخامس اسمه مش فاكره
طلعت الاسانسير عطلان والسلم ضلمه
ست شكلها من اصول مش مصريه صاحبة الشقه و بياجروها بالغرفه و الحمام مشترك
الغرفه على البحر ومنظر تحفه وغرفه نضيفه بس الحمام مشترك ده الى كان مدايقنى
وكانت ب 65 جنيه لليله يا بلاش حلوه اوى لو لشباب
المهم كملت ادور لقيت فندق الحرم تقريبا الليله ب 495 تقريبا وغرفه مش على البحر
كنت هاخدها بس الى معايا قالولى دور تانى
كملت و شفت فندق القوات المسلحة بس ملك لشركه اسمها رويال توليب
حاجه وهم بصراحه
اسعاره فوق فى السماء اقل حاجه 1000 حتى 9000
كملت و عند كوبرى استانلى شفت فندق ونفضت ليه وبعدين فكرت وقلت ارجع اسال انا مش خسران ححاجه
اسمه فندق دوفيل فوق كافى او حلويات زانيليى
الليله ب 285
فندق معقول و نالغرفه نضيفه مكيفه بتطل على كوبرى ستانلى علطول
اخدت ليله ورجعت تانى يوم لظروف شغل
كل مشى فى اليوم ونص على الكورنيش
خفت ادخل جوه عشان ما اتوهش و الزحمه
دخلت ماكدونالدز كان قريب منى و هارديز و جاد و نزلت فى شاطىء القوات المسلحة فندق 26 يوليو بس المايه مش نضيفه للاسف بس شاطىء هادى جداا وامان
لفيت الكورنيش كتير بس للاسف اكتشفت بعد ما جيت انه سوى المنتزه ده او انا كنت مفكر قصر المنتزه كان ممكن ادخله ما دخلتش
كان يوم ونص روعه
اسكندريه بلد جميله جدااا
و اهلها كلهم طيبين ناس طيبه بجد ومعاملتهم كويسه
اكتر شىء سيىء الكورنيش والعربيات الى طايره عليه
و الميكروباسات واحد كان هيطيرلى جمب العربيه وطبعا مافيش اى التزام باى حارة للاسف برضضه
التاكسيات كلها لادا وبتطير برضه
حاجه كمان انا لاحظتها انه اغلب العربيات بتبقى قافله الازار بتاع العربيه وانا لا بس ال لاحظته انه التسول كتير مش تسول يعنى حاجه لله لا لما تيجى تركن عربيه فى اى مكان تلاقى 1000 واحد طالعلك
بس بالمجمل الجو كان جميل و البلد جميله ونفسى ارجع تانى ان شاء الله فى اقرب فرصه ويا بخت الى عايش هناك
و كل سنه وانتم طيبين
شكرا يا استاذ محمد مره تانيه